اتىراۋ وبلىسى اكىمىنىڭ ورىنباسارى جاسۇلان بيسەمبيەۆتىڭ ايتۋىنشا, جىلىوي اۋدانىندا سۋ تاسقىنىنا قارسى دايىندىق ەكى اپتا جۇرگىزىلگەن. كەيىنگى بىرنەشە كۇننەن بەرى سۋ تاسقىنىمەن كۇرەس جۇرىپ جاتىر.
«بىراق تاسقىن سۋ قۇلسارى قالاسىن باسىپ كەتتى. زارداپ شەككەن باۋىرلارىمىزعا بارلىق كومەك كورسەتىلىپ جاتىر. شىعىن كولەمى وتەلەدى. دەگەنمەن, اتىراۋ قالاسى دا بۇل «تاعدىردى» قايتالاۋى مۇمكىن. سۋ باسۋ قاۋپى رەسەيدەگى ورىنبور, كورشىلەس ورال قالالارىنداعى تاسقىننان كەم بولمايدى دەگەن بولجام بار. البەتتە دايىندىق ءجۇرىپ جاتىر. بەس كۇننەن بەرى وڭىردىڭ قۇرىلىس, مۇناي سالالارىنداعى 26 كومپانيا جايىق وزەنىنىڭ جاعالاۋىن بەكىتۋگە, قورعانىس بوگەتىن سالۋعا جۇمىلدىرىلدى. قاجەتتى قاپ, كۇرەك جانە ينەرتتى ماتەريالداردىڭ رەزەرۆى دايىندالدى», دەدى جاسۇلان بيسەمبيەۆ.
اكىم ورىنباسارىنىڭ پىكىرىنشە, جايىق وزەنىنە سۋ رەسەيدىڭ ورىنبور وبلىسىنداعى يريكلا سۋ قويماسىنان جىبەرىلىپ جاتىر. سۋ باتىس قازاقستان ءوڭىرى ارقىلى اتىراۋ وبلىسىنداعى يندەر, ماحامبەت اۋداندارىنىڭ اۋماعىمەن اعىپ كەلەدى.
«قازىر يندەر اۋدانىندا وزەن جاعالاۋىن بەكىتۋ جۇمىستارىنا 54 ارنايى تەحنيكا, 408 قىزمەتكەر جۇمىلدىرىلعان. اۋداندا جايىق وزەنىنىڭ جاعالاۋىنداعى قاۋىپتى اۋماقتارعا جالپى ۇزىندىعى 10 كيلومەتر بوگەت سوعىلدى. بۇل جۇمىستارعا 37 950 دانا قاپ پايدالانىلدى. ال ماحامبەت اۋدانىنداعى ەلدى مەكەندەردى تاسقىن سۋدان قورعايتىن بوگەتتىڭ جالپى ۇزىندىعى – 80 كيلومەتر. جايىق وزەنى بويىنداعى 17 ەلدى مەكەندە 9 قورعانىس بوگەتى وسال. ولار تالدىكول, بەيبارىس, العا, ماحامبەت, سارىتوعاي, ەسكى سارايشىق, ەڭبەكشىل, ەسبول جانە ورتاقشىل اۋىلدارى تۇسىندا ورنالاسقان», دەپ ءمالىم ەتتى جاسۇلان بيسەمبيەۆ.
ماحامبەت اۋدانىندا سۋ تاسقىنىنان قورعاۋ ءۇشىن 56 مىڭ قاپقا توپىراق قاپتالىپ, وزەن جاعالاۋى بەكىتىلدى. بۇل جۇمىستارعا بارلىعى 95 تەحنيكا, 142 قىزمەتكەر, 1300 ەرىكتى جۇمىلدىرىلدى.
«ال اتىراۋ قالاسىندا جايىق وزەنىنىڭ جاعالاۋىنداعى 12 اۋماقتى بەكىتۋ جۇمىستارىنا 172 تەحنيكا تارتىلدى. قازىر جاعالاۋدا بيىكتىگى 2 مەتر, ۇزىندىعى 7 كيلومەتر بوگەت سالىندى. بوگەتكە 100 مىڭ قاپ پايدالانىلدى. بۇل جۇمىس جالعاسىپ جاتىر», دەيدى اكىم ورىنباسارى.
اتىراۋ قالاسىندا جايىق جاعالاۋىنداعى جۇمىستاردى 5 مىڭنان استام ادام اتقارىپ جاتىر. ونىڭ ىشىندە اكىمدىكتىڭ, قورعانىس مينيسترىلىگىنىڭ, ۇلتتىق ۇلاننىڭ, توتەنشە جاعدايلار, پوليتسيا دەپارتامەنتتەرىنىڭ وكىلدەرى جۇمىلدىرىلعان. بۇل ىسكە 4 مىڭعا جۋىق ەرىكتىلەر توبى ۇلەس قوسۋدا.
اكىم ورىنباسارىنىڭ پىكىرىنشە, بۇل ءالى دە جەتكىلىكسىز بولىپ وتىر.
«سەبەبى, 5 ساۋىردە ورىنبور وبلىسىنداعى يريكلا سۋ قويماسىنان رەكوردتى مولشەردە سۋ جىبەرىلدى. مۇنداي سۋ وسى كەزگە دەيىن بولماعان. سوندىقتان بىرلىگىمىزدى تانىتىپ, اتىراۋ قالاسىن تاسقىن سۋ اپاتىنان امان الىپ قالۋعا جۇمىلۋىمىز كەرەك. بىزگە ءار اتىراۋلىقتىڭ كومەگى كەرەك. ءبارىمىز جايىق جاعالاۋىنداعى بوگەتتى بيىكتەتىپ, بەكىتۋىمىز قاجەت. «كوپ تۇكىرسە – كول» دەگەندەي, ءار ازامات ءبىر قاپ قۇمدى جاعاعا اكەلسە, ۇلكەن بەكەت بولارى ءسوزسىز», دەدى جاسۇلان بيسەمبيەۆ.
