بولاشاق جۋرناليستەردىڭ شىعارماشىلىعىن شىڭداپ, جولداما بەرەتىن «جاس تىلشىلەر» فورۋمىنىڭ شەجىرەسى تەرەڭدە جاتىر. العاش رەسپۋبليكالىق «جاس تىلشىلەر» سلەتى 1975 جىلى مامىر ايىندا وتكەن ەدى. ونىڭ باستاۋىندا و.سۇلەيمەنوۆ, ف.وڭعارسىنوۆا, د.ستامبەكوۆ, ش.سماحان ۇلى سىندى تانىمال اقىن-جازۋشىلار تۇرعانى بەلگىلى.
سوڭعى جيىرما جىلدا جاڭا فورماتتا, زاماناۋي ۇلگىدە ءوتىپ جۇرگەن «جاس تىلشىلەر» فورۋمى بيىل دا بولاشاق جۋرناليستەر ءۇشىن جاڭا باعدارلامالارىمەن ەرەكشەلەندى. فورۋمنىڭ اشىلۋىندا جۋرناليستيكا فاكۋلتەتى ءباسپاسوز جانە ەلەكتروندى باق كافەدراسىنىڭ مەڭگەرۋشىسى, پروفەسسور گۇلميرا سۇلتانباەۆا مەن اعا وقىتۋشى سەرىك جۇمابەك ۇلى قوعامداعى ءجۋرناليستىڭ رولىنە توقتالىپ ءوتتى.
«جاس تىلشىلەر» فورۋمى بارىسىندا گازەت ءتىلشىسىنىڭ جۇمىسى تۋرالى بەلگىلى قالامگەر-جۋرناليست جۇسىپبەك قورعاسبەك, تەلەۆيزياداعى قىر-سىرىنا جاڭىلحان اسىلبەكوۆا, جۋرناليسيكا نەگىزدەرى بويىنشا بەرىكبول تولەگەن شەبەرلىك-سىنىپتارىن وتكىزدى.
فورۋم سوڭىندا ەڭ ۇزدىك شىعارماشىلىق جۇمىستار ماراپاتتالدى. «ەڭ ۇزدىك جاس ءتىلشى – 2024» قورىتىندىسى بويىنشا باس جۇلدەگە «ۇلان» گازەتىنىڭ جاس ءتىلشىسى, اباي وبلىسى سەمەي قالاسىنداعى №11 مەكتەپ وقۋشىسى ديانا اعزاموۆانىڭ جۇمىسى لايىق دەپ تانىلدى.
فورۋم سوڭىندا ءال-فارابي اتىنداعى قازۇۋ جۋرناليستيكا فاكۋلتەتى جەڭىمپازدارعا سىيلىقتار ۇلەستىردى.
الماتى
