فوتو:gov.kz
قورعانىس مينيسترلىگىنىڭ ءباسپاسوز قىزمەتى ءمالىم ەتكەندەي, قۇرلىق اسكەرلەرى اسكەري ينستيتۋتى وركەسترىنىڭ سۇيەمەلدەۋىمەن بارلاۋشىنىڭ ەرلىگىنە قۇرمەت كورسەتكەن دەسانتشى جاۋىنگەرلەر مەرەيتوي يەسىنىڭ الدىنان سالتاناتتى مارشپەن ءوتتى.
«الماتىدا ەكىنشى دۇنيەجۇزىلىك سوعىسىنىڭ 32 ارداگەرى تۇرادى, ولاردىڭ سەگىزى بيىل عاسىرلىق مەرەيتويىن اتاپ وتەدى. مىندەتىمىز – قازا تاپقان جاۋىنگەرلەردى جادىمىزدا ساقتاۋ, ارامىزدا بارلارىنا قامقورلىق جاساۋ. ولار ماقتانىشىمىز, كەشەگى تاريحتى جاساۋشىلار, باتىرلاردىڭ ەرلىگى مەن جانقيارلىعىنىڭ ارقاسىندا ءبىز بەيبىت اسپان استىندا تاۋەلسىز, گۇلدەنگەن مەملەكەتتە ءومىر سۇرەمىز», دەدى قۇتتىقتاۋ سوزىندە دەسانتتىق-شابۋىلداۋ اسكەرلەرى قولباسشىسىنىڭ ورىنباسارى پولكوۆنيك رادجان جانىسوۆ.
ۆاسيلي يۆانوۆيچ 1924 جىلى 29 ناۋرىزدا التاي وبلىسىندا دۇنيەگە كەلگەن. زينچەنكونىڭ وتباسى 1939 جىلى الماتىعا كوشىپ كەلگەن. ول 17 جاسىندا 1941 جىلدىڭ قاراشاسىندا اسكەرگە شاقىرىلدى.
بارلاۋ مەكتەبىندە التى ايلىق وقۋدى اياقتاعان سوڭ قىزىل اسكەر ساربازى ستالينگراد مايدانىندا شايقاسىپ, ۋكراينا مەن پولشانى ازات ەتۋگە قاتىستى.
ۆاسيلي زينچەنكو «ستالينگرادتى قورعاعانى ءۇشىن», «گەرمانيانى جەڭگەنى ءۇشىن» مەدالدارىمەن, قىزىل جۇلدىز وردەنى جانە تاعى باسقا وردەندەرمەن ناگرادتالعان.
ۆاسيلي يۆانوۆيچ – ەلبا وزەنىندەگى كەڭەستىك جانە اعىلشىن-امەريكالىق اسكەرلەردىڭ ايگىلى كەزدەسۋىنە قاتىسقان. سول جەردە فاشيستەردى جەڭگەنى تۋرالى العاش حاباردى ەستىگەن.
سوعىس اياقتالعان سوڭ, ءبىر جىلدان كەيىن ەلگە ورالعان, جۇرگىزۋشى بولىپ جۇمىس ىستەپ, جاستاردىڭ اسكەري-پاتريوتتىق تاربيەسىنە قاتىسقان.
مايدانگەر عاسىرلىق مەرەيتويىن ءوز وتباسىندا قارسى الدى. ونىڭ ءتورت بالاسى, جەتى نەمەرەسى, ون ەكى شوبەرەسى جانە ەكى نەمەنەسى بار.
