اتالعان مينيسترلىكتىڭ حابارلاۋىنشا, «بولاشاق» ستيپەندياسىن دامىتۋدىڭ 2024–2026 جىلدارعا ارنالعان ستراتەگياسى شەڭبەرىندە كادرلاردى دايارلاۋ جانە قايتا دايارلاۋ مەملەكەتتىك ورگانداردىڭ وتىنىمدەرى بويىنشا جۇرگىزىلەدى. اتالعان جاڭا تىزىمگە ينجەنەرلىك-تەحنيكالىق قىزمەتكەرلەر, اگروونەركاسىپتىك كەشەن سالاسىنىڭ قىزمەتكەرلەرى, مەكتەپكە دەيىنگى, ورتا, تەحنيكالىق جانە كاسىپتىك ءبىلىم بەرۋ ۇيىمدارىنىڭ پەداگوگتەرى, مەديتسينا قىزمەتكەرلەرى, مەملەكەتتىك قىزمەتشىلەر, بۇقارالىق اقپارات قۇرالدارىنىڭ قىزمەتكەرلەرى, مادەنيەت, تۋريزم جانە سپورت سالاسىنىڭ قىزمەتكەرلەرى, سوتتار جانە سوت قىزمەتكەرلەرى ەنگىزىلگەن.
1 ايدان 12 ايعا دەيىنگى ۋاقىتتا 40-تان اسا ەلدىڭ جەتەكشى ۋنيۆەرسيتەتتەرىندە, عىلىمي زەرتتەۋ ورتالىقتارىندا, سالالىق ۇيىمدارىندا تاعىلىمدامادان وتۋگە بولادى.
تاعىلىمدامادان وتۋدەن ءۇمىتتى ادامداردان: تاعىلىمداماعا قابىلدايتىن شەتەلدىك ۇيىمنان شارتسىز شاقىرتۋدىڭ بولۋى; جالپى جۇمىس ءوتىلى كەمىندە 3 ء(ۇش) جىل, ونىڭ ىشىندە ماماندىعىنىڭ تاڭداعان سالاسىندا ءۇزىلىسسىز سوڭعى 12 (ون ەكى) اي جۇمىس ءوتىلىنىڭ بولۋى; كەمىندە ۆ1 دەڭگەيدە ناتيجەسى بار قازتەست بويىنشا ەمتيحان تاپسىرعانى تۋرالى جارامدى رەسمي سەرتيفيكاتىنىڭ بولۋى; IELTS: 9.0-دەن 5.0, TOEFL: IBT 120-دان 35, PBT/ ITP 677-دەن 417, DET 75-تەن جوعارى بولۋى تالاپ ەتىلەدى.
ەسكە سالا كەتكەن ءجون, تاعىلىمدامادان ءوتۋ ءۇشىن ۇمىتكەرلەر جىلجىمايتىن م ۇلىكتى كەپىلگە قويمايدى. بىراق مىندەتتەمەلەردىڭ ورىندالۋىن قامتاماسىز ەتۋ ءۇشىن كەيىنگى 12 ايدا تۇراقتى تابىسى بار 50 جاسقا دەيىنگى قازاقستان رەسپۋبليكاسىنىڭ ازاماتتارى بولا الاتىن ەكى كەپىلگەردى ۇسىنۋعا ءتيىس.
ايتا كەتەيىك, وسىعان دەيىن مەملەكەتتىك كەڭەسشى ەرلان قاريننىڭ توراعالىعىمەن شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى وتكەن ەدى. سول وتىرىس بارىسىندا 2024 جىلعا ارنالعان «بولاشاق» حالىقارالىق ستيپەندياسى بويىنشا تاعىلىمدامادان وتەتىن جۇمىسشىلار ساناتتارىنىڭ ءتىزىمىن قايتا قاراۋعا شەشىم شىعارىلدى. تاعىلىمدامادان وتەتىن مامانداردىڭ جاڭا ءتىزىمى وسى شەشىمنىڭ نەگىزىندە, ناتيجەسىندە بەكىتىلدى.
