«بولجام وزگەرمەيدى. ەرىكتى مىندەتتەمەلەر (وپەك+ شەڭبەرىندە) ءبىرىنشى جانە ەكىنشى توقساندا سول قالپىندا قالادى, ونىڭ سوڭىندا ءبىز مۇناي نارىعىنداعى باعا كونيۋنكتۋراسىن جانە سۇرانىس پەن ۇسىنىس تەڭگەرىمىن قاراستىرامىز. بۇل كولەمدى جالپى العاندا كەلەسى كەزەڭدە وتەۋگە مۇمكىندىگىمىز بار», دەدى A.ساتقاليەۆ.
بۇعان دەيىن ەنەرگەتيكا مينيسترلىگى وسى جىلدىڭ سوڭىندا ەلىمىزدە مۇناي ءوندىرۋ بولجامى 90,3 ميلليون توننا بولاتىنىن حابارلاعان. 2024 جىلدىڭ ناۋرىزىندا بىرقاتار وپەك+ ەلى باستاپقىدا ءبىرىنشى توقسانعا جوسپارلانعان مۇناي ءوندىرۋدى قوسىمشا ەرىكتى قىسقارتۋ شارالارىن ۇزارتۋ تۋرالى جازدى. سونداي-اق قازاقستان مۇناي ءوندىرۋدى قوسىمشا ەرىكتى قىسقارتۋ مەرزىمىن ەكىنشى توقسانعا دەيىن ۇزارتتى.
انتاليا ديپلوماتيالىق فورۋمىنا قاتىستى
انتاليادا (تۇركيا) وتكەن «ديپلوماتيانى كۇيزەلىس كەزىندە ىلگەرىلەتۋ» تاقىرىبىنا ارنالعان فورۋمعا 100-دەن استام مەملەكەت باسشىلارى جانە ۇكىمەت, سىرتقى ىستەر مينيسترلەرى, حالىقارالىق ۇيىمداردىڭ, ۇكىمەتتىك ەمەس ۇيىمدار مەن ساراپشىلىق توپتاردىڭ وكىلدەرى قاتىستى.
فورۋمنىڭ اشىلۋ سالتاناتىندا تۇركيا پرەزيدەنتى رەجەپ تايپ ەردوعان كۇردەلى جاھاندىق گەوساياسي جاعدايدا ديپلوماتيانى كۇشەيتۋ قاجەتتىگىن ايتىپ, بۇل ماسەلەنى شەشۋدەگى فورۋمنىڭ ماڭىزدى ءرولىن اتاپ ءوتتى.
فورۋمعا قازاقستان پرەمەر-ءمينيسترىنىڭ ورىنباسارى – سىرتقى ىستەر ءمينيسترى مۇرات نۇرتىلەۋ قاتىستى. «تۇركى الەمىندەگى ينستيتۋتتاندىرۋ: ءححى عاسىرداعى تۇركى مەملەكەتتەرىنىڭ ۇيىمى (تمۇ)» تاقىرىبىنا ارنالعان پانەلدىك سەسسيادا مۇرات نۇرتىلەۋ قازاقستاننىڭ تۇركى الەمىندەگى شەشۋشى رولىنە توقتالىپ, ونىڭ تمۇ-نىڭ باستاماشىسى جانە نەگىزىن قالاۋشى مۇشەسى رەتىندەگى مارتەبەسىن, سونداي-اق ۇيىم اياسىنداعى ينتەگراتسيانى ىلگەرىلەتۋدەگى بەلسەندىلىگى تۋرالى ايتتى.
الماتىدا ۆ5+1 فورۋمى ءوتتى
ورتالىق ازيانىڭ بەس رەسپۋبليكاسى مەن امەريكا قۇراما شتاتتارى بار ەلدەر توبى الماتىدا ءبىرىنشى B5+1 فورۋمىن وتكىزۋ ارقىلى العا ماڭىزدى قادام جاسادى.
ورتالىق ازيا ايماعىنداعى مەملەكەتتىك-جەكەمەنشىك ارىپتەستىكتى دامىتۋدى ماقسات تۇتاتىن حالىقارالىق جەكە كاسىپكەرلىك ورتالىعى (CIPE) ۆ5+1 توبىن قالىپتاستىرۋدا ماڭىزدى ءرول اتقاردى. بۇل جاڭا بيزنەس-پلاتفورما حالىقارالىق جانە جەرگىلىكتى كومپانيالارعا جاھاندىق بيزنەس پەن ساۋدا مۇمكىندىكتەرىنەن پايدا تابۋعا كومەكتەسۋ, سونىمەن قاتار التى ەلدىڭ ۇكىمەتتەرىنە تىكەلەي شەتەلدىك ينۆەستيتسيالاردى كوبىرەك تارتۋعا كومەكتەسۋ ءۇشىن جاسالعان. فورۋمنىڭ العاشقى كۇنى «ورتالىق ازياعا كوزقاراس» دەگەن تاقىرىپپەن ءوتتى.
ۆەنچۋرلىق كاپيتال وركەندەپ كەلەدى
«RISE Research» سەرىكتەستەرى «EA Group» جانە «BGlobal Ventures», سونداي-اق «Crunchbase جانە» ۇكىمەتتىك ۇيىمدارمەن بىرلەسىپ جۇرگىزگەن كەشەندى زەرتتەۋدىڭ سوڭعى ناتيجەلەرى قازاقستانداعى جانە ورتالىق ازيا مەن كاۆكاز ايماعىنداعى ۆەنچۋرلىق كاپيتالدىڭ وركەندەپ جاتقانىن كورسەتتى.
زەرتتەۋلەرگە سۇيەنسەك, كەيىنگى بەس جىلدا ۆەنچۋرلىق كاپيتالدى قارجىلاندىرۋ كولەمى بەس ەسەدەن استام وسكەن قازاقستانداعى ۆەنچۋرلىق كاپيتال نارىعى ايتارلىقتاي ۇلعايدى. وتكەن جىلى ايماقتاعى ۆەنچۋرلىق مامىلەلەردىڭ جالپى كولەمى 110 ميلليون دوللاردان استى.
موڭعولياعا لوكوموتيۆتەر جىبەرىلەدى
قازاقستان موڭعولياعا لوكوموتيۆتەر جەتكىزە باستادى. ءبىرىنشى پارتيامەن موڭعولياعا ارقايسىنىڭ قۇنى 4 ميلليون دوللاردان اساتىن ءتورت لوكوموتيۆ جىبەرىلدى.
يندۋستريا مينيسترلىگىنىڭ مالىمەتىنشە, قازاقستاندىق لوكوموتيۆتەرگە قازىردىڭ وزىندە تاجىكستان, وزبەكستان, ۋكراينا, مولدوۆا, ازەربايجان جانە تۇرىكمەنستان سىندى التى مەملەكەت تاپسىرىس بەرگەن. موڭعوليا قازاقستاننان لوكوموتيۆ ساتىپ العان سەگىزىنشى ەل بولىپ وتىر.
وتكەن جىلى قازاقستان مەن موڭعوليا اراسىنداعى تاۋار اينالىمى شامامەن 133 ميلليون دوللار بولدى. قازاقستاننىڭ موڭعولياعا ەكسپورتى باسىم – 124,3 ميلليون دوللار, ال موڭعوليادان 8,7 ميلليون دوللاردى قۇرايتىن يمپورت كەلدى.
