فوتو: astana-akshamy.kz
ەلوردادا ءاز-ناۋرىز مەرەكەسىنە وراي «ارماندار شاڭىراعى» اتتى الەۋمەتتىك اكتسيا ءوتتى. نۇرا اۋدانى اكىمدىگى ۇيىمداستىرعان يگى ءىس-شارادا «جانسايا» الەۋمەتتىك قىزمەت كورسەتۋ ورتالىعىنا باراتىن بالالار ارماندارىن اق قاعازعا جازدى. كوپبالالى انا ساندۋعاش نۇرسەيىتوۆانىڭ كەنجە بالاسى قازىرگى كەزدە وسى ورتالىقتا وڭالتۋدان ءوتىپ ءجۇر.
« ۇلىم ەستاي – جەتى جاستا. بالامنىڭ سويلەۋ قابىلەتى كەش دامىپ جاتىر. بۇل ورتالىق بىزگە ۇنايدى. مۇندا بىزبەن كۇن سايىن لوگوپەد, پسيحولوگ سەكىلدى ماماندار جۇمىس ىستەيدى. ورتالىقتىڭ الەۋمەتتىك قىزمەتكەرلەرى بالالارعا جاقسى قارايدى. بۇگىن كەرەمەت اكتسيا وتكىزىلىپ جاتىر. ەرەكشە بالالاردى ەلەپ, ەسكەرىپ جاتقانى ءۇشىن ۇيىمداستىرۋشىلارعا العىسىم شەكسىز. ءبىز ءۇي جاعدايىندا قويىلعان باتۋت بولماسا, 2 دوڭگەلەكتى ۆەلوسيپەد سۇراپ وتىرمىز», دەدى اناسى.
ءىس-شارانىڭ بار ماقساتى بالالارعا قۋانىش سىيلاۋ ەكەن. «جەردە ءبىر بالا قۋانسا, كوكتە مىڭ پەرىشتە شاتتانادى» دەيدى حالقىمىز. راسىندا بالانىڭ قۋانىشىنان اسقان شاتتىق بار ما, ءتايىرى. مىنە, وسىنداي يگى ىسكە ۇمتىلعان ەلوردالىق مەتسەناتتار مەن كاسىپكەرلەر نۇرا اۋدانىنا قاراستى 70 بالانىڭ ارمانىن ورىنداۋعا شىن نيەتىمەن كىرىسىپ وتىر. ولار بالالار ارمانداعان سىيلىقتاردى 21 ناۋرىزدا تابىستاپ, مەرەكەنىڭ شىرايىن اشا تۇسپەك.
«استانا قالاسى اكىمدىگىنىڭ «جانسايا» الەۋمەتتىك قىزمەت كورسەتۋ ورتالىعى 2022 جىلى اشىلعان. مۇندا قازىرگى كەزدە 1,5 جاستان 18 جاسقا دەيىنگى 640 مۇمكىندىگى شەكتەۋلى بالا بار. كۇن سايىن 70-تەن اسا بالا وڭالتۋدان وتەدى. ولار ءارتۇرلى مامانداردىڭ قىزمەتىن الادى. سونداي-اق ورتالىقتا بي, ۆوكال سەكىلدى ۇيىرمەلەر جۇمىس ىستەيدى», دەيدى ورتالىقتىڭ ديرەكتورى ەرداۋلەت امانباي.
يگىلىكتى ءىس تەك ماتەريالدان تۇرماسا كەرەك-ءتى. ءتىپتى قول كومەكتىڭ ءوزى – ىزگى قوعامنىڭ نەگىزگى ۇستىندارىنىڭ ءبىرى. استانا جۇرتشىلىعى بۇدان دا كەندە ەمەس. يگى ىستەر مارافونى اياسىندا ەلوردالىق ەرىكتىلەر جالعىز تۇراتىن زەينەتكەرلەردىڭ اۋلاسىن تازالاپ, قارىن كۇرەپ, قاريالاردىڭ العىسىنا بولەندى.
«بالالارعا العىسىم شەكسىز. ولاردىڭ كومەگىنە ريزامىن. جاس كەلىپ, بويدان قايرات كەتكەن سوڭ, قولعا كۇرەك الىپ اۋلانىڭ قارىن كۇرەۋ دە وڭاي ەمەس. ال مىنا كومەككە كەلگەن جاستار مەنى ءبىر تىعىرىقتان الىپ شىعايىن دەپ تۇر», دەپ ۆالەنتينا سەرگيەنكو اعىنان جارىلدى.
ماسەلەن, بايقوڭىر اۋدانىندا قايىرىمدىلىق اكتسياسى اياسىندا 20-عا جۋىق بەلسەندى جاس جالعىزىلىك قارت ادامداردىڭ وتىمەن كىرىپ, قارىمەن شىعىپ ءجۇر. سەبەبى كۇن جىلىنعاننان كەيىن قار ەرىپ, اۋرەگە سالاتىنى بار. ال ەلوردالىق ەرىكتىلەر قىستاي جاۋعان اۋلانىڭ قارىن كوممۋنالدىق قىزمەتتەر الىپ كەتەتىن جەرگە وڭتايلاپ قويدى.
2021 جىلدان بەرى «استانا جاستارى» ەرىكتىلەرىنىڭ قاتارىندا اتسالىسىپ جۇرگەن ماكس التاەۆ ەسىمدى جاس جىگىتتىڭ ايتۋىنشا, بۇل – جىلدا بولاتىن ءداستۇرلى ىزگى ىستەردىڭ ءبىرى. ونىڭ ايتۋىنشا, «استانا جاستارى» بەلسەندىلەرى قالانى تاۋلىك بويى قاردان تازارتاتىن كوممۋنالدىق قىزمەت ماماندارىنا دا كومەك قولىن سوزىپ ءجۇر. ەرىكتىلەر ىستىق شاي مەن باۋىرساق تاراتۋ اكتسيالارىن ءجيى وتكىزەدى. مۇنداي قايىرىمدى جاستار باردا قوعامعا جىلۋ, كوڭىلگە سەنىم ۇيالايدى.
