پرەزيدەنتتىڭ ايتۋىنشا, بولاشاققا سەنىممەن قادام باسۋ ءۇشىن ءتول تاريحىمىزدىڭ اۋقىمى كەڭ ەكەنىن تولىق سەزىنىپ, مادەني مۇرامىزدى ساقتاپ, ونى دارىپتەۋىمىز قاجەت.
«قازاقستان – ۇلى دالاداعى كوشپەندىلەر وركەنيەتىنىڭ تىكەلەي مۇراگەرى. جەر جۇزىنە التىن وردا دەگەن اتپەن تانىلعان ايگىلى جوشى ۇلىسى ورتالىق ەۋرازيانىڭ بايتاق دالاسىنداعى ەڭ قۋاتتى مەملەكەت رەتىندە مويىندالعان. وسى ورتاعاسىرلىق دەرجاۆانىڭ گەوساياسي مۇراسى بىرقاتار ەۋرازيا مەملەكەتىنىڭ, سونىڭ ىشىندە قازاق حاندىعىنىڭ قۇرىلۋىنا نەگىز بولدى. ۇلىق ۇلىستىڭ جەرىندە سان الۋان ەتنوس جانە ءدىن وكىلدەرى ءبىر شاڭىراقتىڭ استىندا ءومىر ءسۇردى. ءتۇرلى مادەنيەتتەر ءوزارا استاسىپ, مەملەكەت قۇرۋ ءىسىنىڭ بىرەگەي ۇلگىسى قالىپتاستى», دەدى مەملەكەت باسشىسى ۇلتتىق قۇرىلتايدىڭ ءۇشىنشى وتىرىسىندا.
وسى تۇستا قاسىم-جومارت توقاەۆ جوشى اۋلەتى 6 عاسىر بويى ورتالىق ەۋرازيانىڭ تاعدىرىنا تىكەلەي ىقپال ەتكەنىن ايتىپ, ۇلان-عايىر اۋماقتا ءبىرتۇتاس وركەنيەت قۇرۋعا ۇمتىلعانىن تىلگە تيەك ەتتى.
«جوشى ۇلىسى ۇلى دالانى مەكەن ەتكەن حالىقتاردىڭ سان عاسىرلىق دامۋ باعدارىن ايقىنداپ وتىردى. ۇلىق ۇلىس مەملەكەتتى باسقارۋ ءىسىن جاڭا دەڭگەيگە كوتەردى. ونىڭ ريم يمپەرياسىمەن ۇقساستىعى دا – وسىندا. بيىل جوشى ۇلىسىنىڭ نەگىزى قالانعانىنا 800 جىل تولدى. بۇگىنگى جيىنىمىز دا وسى مەرەيلى بەلەسكە تۇسپا-تۇس كەلىپ وتىر. مۇنىڭ زور سيمۆولدىق ءمانى بار. ءبىز استا-توك توي جاساۋعا ەمەس, سالماقتى زەرتتەۋ جۇرگىزۋگە باسا ءمان بەرۋىمىز كەرەك. جوشى ۇلىسى قازاقستاننىڭ مەملەكەتتىلىك داستۇرىندە ايرىقشا ورىن الادى. ەلىمىزدىڭ وتكەنى, بۇگىنى مەن بولاشاعى ونىڭ تاريحي مۇراسىمەن تىعىز استاسىپ جاتىر. ەندەشە, التىن وردا تۋرالى حالىقارالىق ارەناداعى تۇسىنىك قازاقستانمەن تىكەلەي بايلانىستى بولۋى كەرەك», دەدى قاسىم-جومارت كەمەل ۇلى.
سونداي-اق پرەزيدەنت جاقىندا التىن وردانىڭ تاريحى جانە ايگىلى تۇلعالارى تۋرالى كوپ سەريالى دەرەكتى فيلم ءتۇسىرۋ جۇمىستارى باستالعانىن حابارلادى. وعان شەتەلدىڭ تانىمال ماماندارى تارتىلىپ جاتىر. فيلم بەلگىلى حالىقارالىق پلاتفورمالار ارقىلى كورسەتىلۋى كەرەك. مەملەكەت باسشىسىنىڭ پايىمىنشا, ەلىمىزدى الەمگە تانىتۋ ءۇشىن التىن وردا برەندىن جان-جاقتى جانە كەڭىنەن پايدالانۋ قاجەت. ونى تولىق زەرتتەۋ ءۇشىن تاباندى جۇمىس ىستەۋ كەرەك. ول ءۇشىن پرەزيدەنت باستاماسىمەن جوشى ۇلىسىن زەرتتەيتىن عىلىمي ينستيتۋت قۇرىلعان ەدى.
«قازىر قازاقستاننىڭ جەتى تومدىق جاڭا اكادەميالىق تاريحىن جازۋ ءۇشىن ناقتى جۇمىس جاسالىپ جاتىر. وعان 250-دەن استام عالىم, سونىڭ ىشىندە 60 شەتەلدىك مامان جۇمىلدىرىلدى. اكادەميالىق باسىلىمنىڭ وسىنداي ۇلگىسىن ازىرلەۋ تاجىريبەسىندە العاش رەت جوشى ۇلىسىنا جەكە توم ارنالماق. ونى دايىنداۋعا رەسەيدىڭ كورنەكتى تاريحشىسى ۆاديم ترەپاۆلوۆ تا اتسالىستى. وكىنىشكە قاراي, ول جاقىندا ومىردەن وزدى. بىراق ۆاديم ترەپاۆلوۆ وتە قۇندى زەرتتەۋ ماتەريالدارىن ازىرلەپ, ونى كوپتومدىقتىڭ رەداكتسيالىق القاسىنا تابىستاپ كەتتى. بۇل – قازاقستان مەن رەسەيدىڭ تاريحي مەكتەپتەرى اراسىنداعى ءتيىمدى ىقپالداستىقتىڭ جارقىن كورىنىسى», دەپ ءتۇسىندىردى قاسىم-جومارت توقاەۆ.
