فوتو: قر قورعانىس مينيسترلىگى
سالتاناتتى ءىس-شاراعا قاتىسۋشىلارمەن تانىسقان ۆەدومستۆو باسشىسى جيىنداعىلاردى حالىقارالىق ايەلدەر كۇنىمەن قۇتتىقتاپ, ەل قارۋلى كۇشتەرىندە كۇردەلى ءارى ابىرويلى اسكەري قىزمەتتە جۇرگەن ايەلدەرگە شىن جۇرەكتەن العىس ءبىلدىردى.
مينيستر قازاقستان اسكەرىندە 12 مىڭنان استام ايەل قىزمەت ەتەتىنىن, ونىڭ ىشىندە 800-گە جۋىق وفيتسەر, 6 مىڭنان اسا كەلىسىمشارت بويىنشا اسكەري قىزمەتشى جانە 5 مىڭ ازاماتتىق پەرسونال قىزمەت ەتەتىنىن ايتتى. «پولكوۆنيك» اسكەري شەنىندە 25 ايەل بولسا, 11 نازىك جاندى باسشىلىق لاۋازىمداردا, 55-ءى مەملەكەتتىك ناگرادالارمەن ماراپاتتالعان.
«اسكەري قىزمەتشى ايەلدەر وقۋ-جاۋىنگەرلىك مىندەتتەردى ەر-ازاماتتارمەن تەڭ ورىنداي وتىرىپ, ادال قىزمەت اتقارىپ ءجۇر. ولاردىڭ اراسىندا تەڭىزشىلەر, دەسانتشىلار, بارلاۋشىلار, مەرگەندەر, مەحانيك-جۇرگىزۋشىلەر دە بار. كاسىپ تاڭداۋدا ءاربىرىڭىزدىڭ ءوز جولىڭىز, ءوز تاعدىرىڭىز بار», دەدى مينيستر.
بەيرەسمي اڭگىمە بارىسىندا گەنەرال-پولكوۆنيك رۋسلان جاقسىلىقوۆ ايەلدەردىڭ وتباسىنداعى ءال-اۋقاتتى ساقتاۋعا, قوعامداعى كەلىسىم مەن تۇراقتىلىقتى نىعايتۋعا قوسقان ۇلەسىن ەرەكشە اتاپ ءوتتى.
قر ۇلتتىق قورعانىس ۋنيۆەرسيتەتى «باس شتاب اكادەمياسى» فاكۋلتەتىنىڭ مەملەكەتتىك, اسكەري باسقارۋ جانە قۇقىق كافەدراسىنىڭ اعا وقىتۋشىسى پودپولكوۆنيك ايسۇلۋ مولداشەۆا ءسوز سويلەدى. پەداگوگ جەدەل-تاكتيكالىق دەڭگەيدەگى وفيتسەرلەردى دايارلاۋعا باعىتتالعان وقىتۋشىلىق قىزمەتىنىڭ باعىتى تۋرالى ايتىپ بەردى.
اسكەردە قىزمەت پەن سپورت قاتار جۇرەدى. بۇل سالادا اسكەري قىزمەتشى-سپورتشىلار قارۋلى كۇشتەردىڭ بەدەلىن ارتتىرۋعا ەداۋىر ۇلەس قوسىپ وتىر. وعان سپورت كوميتەتى – ورتالىق سپورت كلۋبى بوكس كومانداسىنىڭ اعا مامانى قارۋلى كۇشتەر قىزمەتكەرى انگەلينا لۋكاس ايقىن مىسال بولا الادى. ناۋرىز ايىنىڭ باسىندا كاسىپقوي بوكسشى ا. لۋكاس شارشى الاڭدا جەتىنشى مارتە جەڭىسكە جەتىپ, تايلاندتان ەلگە ولجالى ورالدى. انگەلينا سپورتشىلارعا كورسەتكەن جان-جاقتى قولداۋى ءۇشىن مينيسترگە العىس ايتتى.
55765 اسكەري ءبولىمىنىڭ اسكەري بايلانىسشىسى ەفرەيتور تاتيانا سكوكوۆا شىرقاعان «ارىس جاعاسىندا» ءانى قاتىسۋشىلاردىڭ بارىنە تاماشا تارتۋ بولدى. ت. سكوكوۆا ءوز كەزەگىندە ءاربىر نازىك ايەلدىڭ بويىندا ءبىر قولىمەن بەسىكتى, ءبىر قولىمەن الەمدى تەربەتەتىن كۇشى بار ەكەنىن اتاپ ءوتتى. بۇل كۇش-جىگەر ايەلدەرگە قامقور انا, ابزال جان جانە ءوز ءىسىنىڭ مامانى بولۋعا ىقپال ەتەدى.
ءىس-شارا سوڭىندا گەنەرال-پولكوۆنيك رۋسلان جاقسىلىقوۆ قىز-كەلىنشەكتەرگە قۇتتىقتاۋ حاتتار مەن گۇل شوقتارىن تابىس ەتتى.
