جالپى العاندا, 2023 جىلى بانكتەردىڭ كرەديتتىك پورتفەلدى جانە مەملەكەتتىك باعالى قاعازدار پورتفەلىن ۇلعايتۋى ەسەبىنەن بانك سەكتورى اكتيۆتەرىنىڭ ءوسۋى بايقالادى. كليەنتتەردىڭ بانككە سەنىپ تاپسىرعان سالىمدارى قورلاندىرۋدىڭ نەگىزگى كوزىنە اينالعان. نارىق كونيۋنكتۋراسىنىڭ جاعىمسىز وزگەرىستەرىنە قاراماستان, بانك سەكتورى كاپيتال قورى مەن وتىمدىلىكتىڭ جەتكىلىكتىلىگىن, سونداي-اق بانكتەردىڭ اعىمداعى سىرتقى ەكونوميكالىق كۇيزەلىستەردى يگەرۋ مۇمكىندىگىن كورسەتتى.
كەزدەسۋ بارىسىندا SREP ءادىسناماسى بويىنشا جىل سايىنعى تولىق اۋقىمدى قاداعالاپ باعالاۋدىڭ ناتيجەلەرى تالقىلاندى, تاۋەكەلى تومەن بانكتەر سانىنىڭ ارتۋى جانە بانك سەكتورىنىڭ سىرتقى فاكتورلارعا ورنىقتىلىعى سياقتى وڭ وزگەرىستەر اتاپ ءوتىلدى. تۇراقتى AQR جانە قاداعالاپ سترەسس-تەستىلەۋگە ەرەكشە نازار اۋدارىلدى, ولاردىڭ شەڭبەرىندە اگەنتتىك ۇلتتىق بانكپەن بىرلەسىپ نەگىزگى جانە سترەستىك ستسەناريلەردى ازىرلەپ, بەكىتتى. بۇل رەتتە 2022 جىلعى سترەستىك وقيعالارعا بايلانىستى 2023 جىلعا كونسەرۆاتيۆتىك تۇرعىدان بارىنشا از ستسەناريلەر ازىرلەنگەن.
جىل سايىنعى قاداعالاۋ ۇدەرىسىنىڭ سوڭعى كەزەڭىن ىسكە اسىرۋ ماقساتىندا, اگەنتتىك 2024 جىلدان باستاپ SREP قاداعالاپ باعالاۋىنىڭ, تۇراقتى AQR جانە قاداعالاپ سترەسس-تەستىلەۋدىڭ قورىتىندىلارى بويىنشا كاپيتالعا قاداعالاۋ ۇستەمەاقىسىن قولدانۋدى جوسپارلاپ وتىر.
2023 جىلى قارجى نارىعىنداعى تاعى ءبىر ماڭىزدى وقيعا حالىقارالىق ۆاليۋتا قورى (حۆق) مەن دۇنيەجۇزىلىك بانكتىڭ قازاقستاننىڭ قارجى سەكتورىنا باعالاۋ جۇرگىزۋى بولدى. باعالاۋ قورىتىندىسى بويىنشا, سەكتوردىڭ ورنىقتىلىعى جانە تاۋەكەلگە باعدارلانعان قاداعالاۋدى دامىتۋداعى ۇدەرىس راستالدى. سونداي-اق اگەنتتىك قىزمەتىن ودان ءارى جەتىلدىرۋدىڭ جانە انىقتالعان ولقىلىقتاردى جويۋدىڭ نەگىزگى باعىتتارى ايقىندالدى.
اگەنتتىك توراعاسى 2020 جىلدان باستاپ بانك سەكتورىنداعى تاۋەكەلگە باعدارلانعان قاداعالاۋعا تولىققاندى كوشۋدىڭ جانە SREP, تۇراقتى AQR جانە قاداعالاپ سترەسس-تەستىلەۋ سياقتى نەگىزگى قوسىمشا قۇرالداردى بىرىڭعاي قاداعالاۋ ۇدەرىسىنە ينتەگراتسيالاۋدىڭ ارقاسىندا بانكتەردىڭ ەڭ تومەنگى رەتتەۋشىلىك تالاپتارعا سايكەستىگى عانا ەمەس, سونىمەن قاتار تاۋەكەلدەردى بارىنشا ساپالى باسقارۋعا كوشۋ ءۇشىن نەگىز قالانعانىن اتاپ ءوتتى.
2024 جىلى اگەنتتىك قاداعالاۋ ۇدەرىسىنىڭ كەشەندى مودەلىن قۇرۋ جۇمىسىن جالعاستىرادى, بۇل اشىقتىق پەن بانك سەكتورىنا دەگەن سەنىمدى ارتتىرۋعا مۇمكىندىك بەرمەك. وسى باعىتتا SREP ءادىسناماسى بويىنشا قاداعالاۋ ۇدەرىسىن ودان ءارى جەتىلدىرۋ جانە AQR باسىم قاداعالاۋ قۇرالدارىن جانە SREP-تە قاداعالاپ سترەسس-تەستىلەۋىن بىرىكتىرۋدى جۇزەگە اسىرۋ جوسپارلانادى.
«بيىل ەكىنشى دەڭگەيدەگى بانكتەردىڭ كليماتتىق سترەسس-تەستىلەۋىن ازىرلەۋ باستالادى. تومەن كومىرتەكتى ەكونوميكاعا جاھاندىق كوشۋ ستسەناريلەرىن ىسكە اسىرۋ كەزىندە بانكتەردىڭ ورنىقتىلىعى مەن ىقتيمال قارجىلىق شىعىندارىن باعالاۋعا باستى نازار اۋدارىلادى. اگەنتتىك مىندەتتەرىنىڭ جەكە بلوگى شوعىرلاندىرىلعان نەگىزدە بانك توپتارىن رەتتەۋدى كۇشەيتۋدى, سونداي-اق رەتتەۋشى AQR راسىمدەرىن ەسكەرە وتىرىپ, سوڭعى ساتىداعى قارىزدار تەتىگىن جەتىلدىرۋدى قوسا العاندا, بازەل قاعيداتتارىن ودان ءارى ەنگىزۋگە ارنالعان. سونىمەن قاتار ESG قاعيداتتارىن بانكتەردىڭ قىزمەتىنە كەزەڭ-كەزەڭىمەن ينتەگراتسيالاۋدى جالعاستىرامىز: ەكى ۇسىنىمدىق قۇجاتتى – ESG تاۋەكەلدەرىن باسقارۋ جونىندەگى نۇسقاۋدى جانە بانكتەردىڭ كرەديتتىك پورتفەلدەرىنىڭ كومىرتەگى ءىزىن باعالاۋ جونىندەگى نۇسقاۋدى ازىرلەۋ مەن قابىلداۋ جوسپارلانۋدا. تاعى ءبىر ماڭىزدى باعىت – تۇتىنۋشىلىق كرەديت بەرۋ تاۋەكەلدەرىن ازايتۋ. قازىرگى ۋاقىتتا اگەنتتىك حالىقتىڭ شامادان تىس كرەديت الۋىن ازايتۋ بويىنشا جاڭا جۇيەلى شارالار دايىندادى جانە زاڭنامالىق وزگەرىستەرگە باستاما جاسادى», دەدى ءمادينا ابىلقاسىموۆا.
سونىمەن قاتار 2024 جىلى اگەنتتىك بانكتەردىڭ وتىمدىلىگىن ەكونوميكانىڭ ناقتى سەكتورىنا كرەديت بەرۋگە قايتا باعدارلاۋ جونىندە شارالار قابىلداۋدى جالعاستىرادى. بيزنەسكە كرەديت بەرۋدى ىنتالاندىرۋ جونىندەگى شارالار قارجى ينستيتۋتتارىنىڭ قارجىلىق ورنىقتىلىعىنا نۇقسان كەلتىرمەي جانە بازەل كوميتەتىنىڭ حالىقارالىق ستاندارتتارى مەن ۇسىنىمدارىن ساقتاي وتىرىپ قابىلداناتىن بولادى.
«سەنىمدىلىگى جوعارى كرەديتتىك رەيتينگى بار شەتەلدىك بانكتەردى ەلگە تارتۋ ءۇشىن اگەنتتىك ۇلتتىق بانكپەن بىرلەسىپ شەتەلدىك بانكتەردى نەمەسە ولاردىڭ فيليالدارىن اشۋ تارتىبىنە قويىلاتىن قولدانىستاعى تالاپتاردى ىرىقتاندىرۋ تۋرالى زاڭ جوباسىن ازىرلەيتىن بولادى. وندا قۇجاتتار تىزبەسىن قىسقارتۋ جانە قازاقستان رەسپۋبليكاسىنىڭ بەيرەزيدەنت-بانكتەرىنىڭ فيليالدارىنا قويىلاتىن رەتتەۋشىلىك تالاپتاردى تومەندەتۋ كوزدەلەدى», دەپ مالىمدەلدى.
قاداعالاۋ ساياساتىن جانە بانك سەكتورىن دامىتۋدىڭ نەگىزگى باعىتتارىن تالقىلاۋ قورىتىندىسى بويىنشا, ەكىنشى دەڭگەيدەگى بانكتەر مەن قازاقستان قارجىگەرلەرى قاۋىمداستىعىنىڭ وكىلدەرى قوسىمشا ۇسىنىستار ايتتى. ول ۇسىنىستار 2024 جىلعا ارنالعان باسىم مىندەتتەردە ەسكەرىلەدى.
