فوتو: اقوردا
ماۋلەن اشىمباەۆتىڭ ايتۋىنشا, مەملەكەت باسشىسىنىڭ ەلىمىزدى جانە وڭىرلەردى دامىتۋعا باعىتتالعان تاپسىرمالارىنىڭ جۇزەگە اسىرىلۋى سەنات ءۇشىن نەگىزگى باسىمدىق سانالادى.
قازىرگى ۋاقىتتا ايەلدەردىڭ قۇقىعى مەن بالالاردىڭ قاۋىپسىزدىگىن قامتاماسىز ەتۋ, دەنساۋلىق ساقتاۋ, ترانسفەرتتىك باعا بەلگىلەۋ, حالىقتىڭ كوشى-قونى, بايلانىس جانە تسيفرلاندىرۋ, عىلىم جانە ءبىلىم ماسەلەلەرىنە قاتىستى زاڭدار سەناتورلاردىڭ قاراۋىندا جاتىر. ال سەناتورلار عىلىم, سوت جۇيەسىن رەفورمالاۋ, ورگانيكالىق ونىمدەردىڭ اينالىمى, قاۋىپسىز ەڭبەك جاعدايىن جەتىلدىرۋ جانە جۇمىسشىلاردىڭ ەڭبەك قۇقىقتارىن قورعاۋ جونىندەگى 10 زاڭ جوباسىن ءماجىلىستىڭ قاراۋىنا ۇسىندى.
بيىل بيۋدجەت, قۇرىلىس, سۋ, سالىق جانە تسيفرلىق كودەكستەرىن, سونداي-اق «مەملەكەتتىك ساتىپ الۋ تۋرالى», «ماسس-مەديا تۋرالى» جانە «جىلۋ ەنەرگەتيكاسى» تۋرالى زاڭ جوبالارىن قاراۋ جوسپارلانىپ وتىر.
سەنات توراعاسى مەملەكەت باسشىسىنىڭ تاپسىرماسىمەن قۇرىلعان قازاقستاننىڭ ورنىقتى دامۋ سالاسىنداعى ۇلتتىق ماقساتتارى مەن مىندەتتەرىنىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيانىڭ جۇمىسى تۋرالى باياندادى.
بۇعان قوسا, پرەزيدەنتكە الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ قىزمەتى تانىستىرىلدى. قازىرگى كەزدە سەزدى دامىتۋدىڭ 2023-2033 جىلدارعا ارنالعان تۇجىرىمداماسى جۇزەگە اسىرىلىپ جاتىر.
سپيكەر ماۋلەن اشىمباەۆ قاسىم-جومارت توقاەۆقا سەناتتىڭ ءماسليحات دەپۋتاتتارىمەن اراداعى جۇمىسى جاندانا تۇسكەنىن ايتتى. بۇل ىسكە ء«وڭىر» دەپۋتاتتىق توبى مەن سەنات جانىنداعى جەرگىلىكتى وكىلدى ورگاندارمەن ءوزارا ءىس-قيمىل جاساۋ جونىندەگى كەڭەس بەلسەندى اتسالىسۋدا.
بيىل ەلىمىزدەگى ءماسليحات ينستيتۋتىنىڭ قۇرىلعانىنا 30 جىل تولادى. وسىعان وراي ءساۋىر ايىندا حالىقارالىق كونفەرەنتسيا وتكىزۋ جوسپارلانىپ وتىر.
كەزدەسۋ سوڭىندا پرەزيدەنت ەلىمىزدە جۇرگىزىلىپ جاتقان رەفورمالاردى زاڭنامالىق تۇرعىدان قولداۋدىڭ ءرولى زور ەكەنىن اتاپ ءوتتى. قاسىم-جومارت توقاەۆ ايماقتاردىڭ دامۋىنا بارىنشا كومەك كورسەتۋ مەملەكەتتىك ساياساتتىڭ ماڭىزدى باعىتى دەپ سانايدى. ونىڭ پىكىرىنشە, بۇل ىسكە جەرگىلىكتى وكىلدى ورگانداردىڭ دەپۋتاتتارىن كەڭىنەن تارتۋ قاجەت.
