ۇنەم شىعىننان ساقتايدى

اگرارلىق سالا وبلىس ەكونو­مي­كا­سىنىڭ نەگىزگى باعىتتارىنىڭ ءبىرى ەكەنىن اتاپ وتكەن وبلىس باسشىسى كەيىنگى جىلدارى سىر ديقاندارى سۋ تاپشىلىعىنىڭ زاردابىن تارتىپ كەلە جاتقانىن ايتىپ ءوتتى. بىل­تىرعى ەگىس ناۋقانىن دا شارۋا­لار قيىن جاعدايدا وتكىزدى. مەملەكەت باسشىسى مەن ۇكىمەتتىڭ قولداۋىمەن قابىلدانعان سۋ تاپشىلىعىنىڭ الدىن الۋ شارالارى ارقىلى عانا ديقاننىڭ ءۇمىتى اقتالدى.

«وتكەن جىلى ەگىس كولەمى 4 800 گەك­تارعا ۇلعايىپ, 193 400 گەكتار جەرگە ەگىن ەگىلدى. وسىنىڭ ىشىندە 89 مىڭ گەكتار كۇرىشتىڭ ءار گەكتارىنان 56,5 تسەنتنەردەن ءونىم الىندى. سالانى سۋبسيديالاۋعا 14 ملرد تەڭگە قارجى بولىنسە, 224 ملرد تەڭگەنىڭ ءونىمى ءوندىرىلدى. اۋىل شا­رۋا­شىلىعىنىڭ نەگىزگى قورىنا سا­لىنعان ينۆەستيتسيا 20 پايىزعا ءوسىپ, 12 ملرد تەڭگەگە جەتتى. بيىل دا قول­داۋ شارالارى جالعاسادى. بىراق داريا دەڭگەيى ۆەگەتاتسيا كەزەڭىنىڭ وڭاي بولمايتىنىن كورسەتىپ تۇر», دەدى ايماق باسشىسى.

ءمينيستردىڭ ايتۋىنشا, 6 اي ىشىن­دە جاڭا «سۋ كودەكسى» جوباسى ازىر­لەن­دى. سۋ تاپشىلىعىنا قارا­ماستان, ەل ەكو­نوميكاسىنا پايدا اكە­لۋ, تۇرعىن­داردىڭ كۇندەلىكتى جاع­دايىن جاساۋ جانە ەكولوگيالىق ماسە­لەلەردى شەشۋ سە­كىلدى 3 باعىتتى قامتىعان قۇجات قازىر پار­لامەنت قاراۋىندا جاتىر.

«ۇكىمەت سۋ ۇنەمدەۋ تەحنولو­گيا­لا­رىن ەنگىزەتىن شارۋا قوجا­لىق­­تارىن قول­داۋ ارقىلى تىعى­رىق­تان شىعۋدى ءجون كورەدى. تام­شى­لاتىپ جانە جاڭبىرلاتىپ سۋارۋ تەحنولوگياسىن ەنگىزگەن شارۋا­شىلىقتارعا سۋبسيديا 50%-عا, ال ۇڭعىما قازعاندارعا 80%-عا دەيىن ۇلعايتىلدى», دەدى ن.نۇرجىگىتوۆ.

كەيىنگى 60 جىل ىشىندە ەلىمىزدەگى سۋ كولەمى 12,5 شارشى شاقىرىمعا ازاي­عان. 2040 جىلعا دەيىن دە 12-15 شارشى شاقىرىمعا كەميتىنى بولجانىپ وتىر. سوندىقتان 2 جىل ىشىندە 3,5 مىڭ شاقىرىم يرريگاتسيا جۇيەسىنە ەسەپ قۇرالدارى قويىلۋى كەرەك. وسى ارقىلى 500-600 ملن شارشى مەتر سۋ ۇنەمدەۋگە بولادى. كەزدەسۋدە ەلىمىزدەگى 15 شارشى شاقىرىمنان اسا جەراستى سۋلارىنىڭ 2 پايىزى عانا پايدالانىلىپ وتىرعانى ايتىلدى. مينيسترلىك وسىنداي مول سۋدى اۋىزسۋ رەتىندە پايدالانۋ باعىتىنداعى شارالاردى قولعا الادى.

وبلىس اكىمى شارۋاشىلىقتار تاراپىنان وندىرىسكە جاڭا تەحنولوگيالاردى ەنگىزۋ وتە باياۋ ءجۇرىپ جاتقانىن ەسكە سالدى. ەسەسىنە ما­گيسترالدىق كانالدارداعى سۋدى قالا­عانىنشا پايدالانىپ, ارتىق كۇرىش ەگەتىندەر ازايماي وتىر. سون­دىقتان دا جاۋاپتى مەكەمەلەر بولى­نەتىن سۋ كولەمىن قاتاڭ باقىلاپ, ىسى­راپقا جول بەرگەندەر زاڭ اياسىندا جاۋاپ بەرۋى كەرەك. بۇل تالاپ قىزىلوردا قالاسى مەن اۋدان اكىمدەرىنە دە قاتىستى. جوسپاردان تىس داقىل ەككەندەرگە سۋ بەرىپ, تالاپتى ساقتاعانداردى تاپشىلىققا ۇرىندىرۋعا بولمايدى.

جيىندا «ارال-سىرداريا» باس­سەيندىك ينسپەكتسياسىنىڭ باسشىسى قاي­رات­بەك سارسەنباەۆ, وبلىستىق اۋىل شارۋا­شىلىعى جانە جەر قاتىناستا­رى باسقارماسىنىڭ باس­شىسى تالعات دۇي­سەباەۆ, «قاز­سۋشار» كاسىپورنى قى­زىل­وردا في­ليالىنىڭ ديرەكتورى رول­لان احمەتوۆ, ى.جاقاەۆ اتىنداعى قازاق كۇرىش شارۋاشىلىعى عىلىمي زەرت­­تەۋ ينستيتۋتىنىڭ باسقارما تور­اعاسى سۇلتانبەك تاۋىپباەۆ, قا­زاق سۋ شارۋا­شىلىعى عىلىمي زەرت­تەۋ ينستيتۋتى باس­قارما تور­اعاسىنىڭ ورىنباسارى نۇرلان بال­عاباەۆ, قازاقستاننىڭ ەڭبەك ەرى, «تاڭ لتد» سەرىكتەستىگىنىڭ باس­شىسى يمامزادا شاعىرتاەۆ, «Soil Solution» جشس ديرەكتورى راۋ­شان نۇرالى, «OMAD Start» كوم­پا­نياسىنىڭ قۇرىلتايشىسى شاحو­بيددين كاروموۆ, «BNK Group» كوم­­پانياسىنىڭ قۇرىلتايشىسى ءنياز­الي بەيسەنباەۆ بايانداما جاساپ, سۋ رەسۋرستارىن ءتيىمدى پايدالانۋ باعىتىندا ۇسىنىس-پىكىرلەر ايتتى.

قىزىلوردا