فوتو: gov.kz
№43 قوسىمشا ءبىلىم بەرۋ مەكتەپ-ورتالىعى نەگىزىندە قۇرىلعان رەسۋرستىق ورتالىقتىڭ اشىلۋىنا «شەۆرون» كومپانياسى, «دارا» قايىرىمدىلىق قورى قولداۋ بىلدىرگەن. ۇيىمداستىرۋشىلاردىڭ اقپاراتىنا سۇيەنسەك, اتالعان ورتالىق – مۇعالىمدەرگە وقۋ بارىسىندا ينكليۋزيا قاعيداتتارىن جۇزەگە اسىرۋعا كومەكتەسەتىن جانە ءبىلىم الۋدا ەرەكشە قاجەتتىلىگى بار بالالارعا وقۋ وشاعىندا كەدەرگىسىز الەۋمەتتىك ورتا جاساۋعا باعىتتالعان مەكتەپ كەڭىستىگىنىڭ بولىگى. وسىنداي ورتالىقتاردىڭ نەگىزىندە بالالارمەن جۇمىس جۇرگىزىلىپ, اتا-انالارعا كەڭەس بەرىلەدى, سونداي-اق مۇعالىمدەرگە ارنالعان ادىستەمەلىك ۇسىنىمدار ازىرلەنەدى.
«دارا» قورىنىڭ وكىلى ساۋلە بەكسۇلتانوۆا رەسۋرستىق ورتالىقتا ارنايى ماماندار جۇمىس ىستەيتىنىن جەتكىزدى. «جالپى ءبىلىم بەرەتىن مەكتەپتەردە وقيتىن ەرەكشە قاجەتتىلىگى بار بالالار كوبىنەسە مامانداردىڭ قولداۋىنا, مەزگىل-مەزگىل دەمالۋعا جانە رەلاكساتسياعا مۇقتاج. وسىنىڭ بارلىعى رەسۋرستىق ورتالىقتى ۇيىمداستىرۋدا, پسيحولوگ, لوگوپەد, دەفەكتولوگ جانە باسقا مۇعالىمدەردىڭ بالالارمەن جۇمىس ىستەيتىن كەڭىستىكتى ازىرلەۋ كەزىندە ەسكەرىلەدى. وسى ءتاسىلدىڭ ناتيجەسىندە بالالارعا وقۋ ۇدەرىسىنە قوسىلۋ وڭايىراق», دەدى ول.
مۇندا دامۋ ەرەكشەلىكتەرى بار بالالارمەن جۇمىس ىستەيتىن جالپى پاندەردىڭ مۇعالىمدەرى دە, سونداي-اق اتا-انالار دا كەڭەس الا الادى. سونىمەن قاتار رەسۋرستىق ورتالىقتا ۇيدە وقىتىلاتىن بالالاردى الەۋمەتتەندىرۋ بويىنشا جۇمىستار جۇرگىزىلىپ جاتىر. جاڭا رەسۋرستىق ورتالىق ارنايى جيھازدارمەن جانە دامىتۋشى ماتەريالدارمەن جابدىقتالعان, وندا ەموتسيونالدى دەمالۋ ايماعى, جەكە جانە توپتىق جۇمىس ايماقتارى ورنالاسقان. الداعى ۋاقىتتا № 43 مەكتەپتىڭ پسيحولوگيالىق-پەداگوگيكالىق سۇيەمەلدەۋ قىزمەتىنە ەرەكشە قاجەتتىلىگى بار 16 بالاعا قولداۋ كورسەتەتىن پسيحولوگ, پەداگوگ-اسسيستەنت, الەۋمەتتىك پەداگوگ, لوگوپەد-دەفەكتولوگ كىرەدى.
