فوتو: Polisia.kz
Polisia.kz مالىمەتىنشە, مەملەكەتتىك شەكاراداعى 48 اۆتوكولىك وتكىزۋ ورنىندا پاترۋلدىك پوليتسيانىڭ 59 بەكەتى جۇمىس ىستەيدى. جانار-جاعارمايدى زاڭسىز تاسىمالداۋ فاكتىلەرىن, ونىڭ ىشىندە جول تالعامايتىن كولىكتەردى پايدالانۋ ارقىلى جۇزەگە اسىرىلاتىن ارەكەتتەردى انىقتاۋ-توقتاتۋ بويىنشا شارالار قابىلدانىپ جاتىر. شەكارا ماڭىندا ورنالاسقان جامبىل, تۇركىستان جانە ماڭعىستاۋ وبلىستارىنا ەرەكشە نازار اۋدارىلىپ, قوسىمشا شارالار قولعا الىنعان.
سونىمەن قاتار اۆتوكولىكتەردى زاڭسىز قايتا جابدىقتاۋمەن اينالىساتىن, قاجەتتى تىركەۋ جانە رۇقسات قۇجاتتارىنسىز جۇمىس ىستەيتىن تەحنيكالىق قىزمەت كورسەتۋ ستانتسيالارىنىڭ قىزمەتىن انىقتاۋ جۇمىستارى جۇرگىزىلىپ جاتىر.
«مىسالى, قورداي اۋدانىنىڭ قورداي اۋىلىندا پوليتسيا قىزمەتكەرلەرى مەملەكەتتىك كىرىستەر ورگاندارىنىڭ وكىلدەرىمەن بىرلەسىپ, قوسىمشا جانارماي باكتارىن ورناتۋمەن اينالىساتىن 16 تەحنيكالىق قىزمەت كورسەتۋ ستانتسياسىن تەكسەردى. ناتيجەسىندە 6 نىسان يەسىنە قاتىستى اكىمشىلىك ماتەريالدار جيناقتالدى. سوڭعى ءبىر ايدىڭ وزىندە پوليتسەيلەر 12 توننا جانار-جاعارمايدى زاڭسىز اكەتۋدىڭ جولىن كەستى. قايتا جابدىقتالعان جانارماي باكتارى بار 54 اۆتوكولىك انىقتالىپ, ولاردىڭ يەلەرى اكىمشىلىك جاۋاپكەرشىلىككە تارتىلدى», دەلىنگەن حابارلامادا.
مۇناي ونىمدەرى مەن جانار-جاعارمايدىڭ ەل اۋماعىنان زاڭسىز شىعارىلۋىنا جول بەرمەۋ جۇمىستارى ىشكى ىستەر ءمينيسترىنىڭ تۇراقتى باقىلاۋىندا تۇر.
ەسكە سالايىق, بۇعان دەيىن شەكارادا 60 ملن تەڭگەنىڭ جانار-جاعارمايىنىڭ زاڭسىز تاسىمالىنىڭ جولى كەسىلگەنى تۋرالى حابارلاعان ەدىك.
