ۇكىمەتتىڭ «قازاقستان رەسپۋبليكاسىنىڭ اۋماعىندا ۋاقىتتى ەسەپتەۋ ءتارتىبى تۋرالى» قاۋلىسىنا سايكەس استانا, الماتى, شىمكەنت قالالارى جانە اقمولا, الماتى, جامبىل, قاراعاندى, قوستاناي, پاۆلودار, اباي, جەتىسۋ, ۇلىتاۋ, تۇركىستان, سولتۇستىك قازاقستان, شىعىس قازاقستان وبلىستارىنىڭ اكىمدىكتەرى 2024 جىلعى 1 ناۋرىزعا قاراعان ءتۇنى (ساعات 00:00-دە) جەرگىلىكتى ۋاقىتتى 1 ساعات كەيىن شەگەردى.
بىرىڭعاي ۋاقىت ماسەلەسى عالىمدار مەن ساراپشىلاردىڭ قىزۋ تالقىسىنان ءوتتى. بۇعان دەيىن ەلىمىزدە UTC+5 جانە UTC+6 دەگەن ەكى ءتۇرلى ۋاقىت بەلدەۋى قولدانىلىپ كەلدى. ەلدىڭ كوپ بولىگى (باتىس وڭىرلەردى قوسپاعاندا) UTC+6 ايماعىندا ورنالاسقان. عالىمداردىڭ ايتۋىنشا, UTC+6 ۋاقىت بەلدەۋى تابيعي كۇن ۋاقىتىنا سايكەس كەلمەيدى جانە بيولوگيالىق ريتمدەر مەن ادام دەنساۋلىعىنا كەرى اسەرى بار. وسى ماسەلەنى كەشەندى پىسىقتاۋ ماقساتىندا ساۋدا جانە ينتەگراتسيا مينيسترلىگى جانىنان پارلامەنت دەپۋتاتتارى, عىلىمي ينستيتۋتتار, قوعام قايراتكەرلەرىنىڭ قاتىسۋىمەن ءتيىستى جۇمىس توبى قۇرىلدى. ءسويتىپ, ەلىمىزدە ۋاقىتتى ەسەپتەۋ ماسەلەلەرى بويىنشا جۇمىس توبىنا كىرگەن عالىمدار مەن ساراپشىلار بىرىڭعاي ۋاقىت بەلدەۋىن قۇرۋدى ۇسىنعان ەدى. جۇمىس توبىنا عىلىمي ينستيتۋتتاردىڭ, مەديتسينالىق جوعارى وقۋ ورىندارىنىڭ, ورتالىق جانە جەرگىلىكتى مەملەكەتتىك ورگانداردىڭ وكىلدەرى, پارلامەنت دەپۋتاتتارى جانە ت.ب. كىردى.
جىل بويى مەديتسينا, فيزيولوگيا, گەوگرافيا, مەترولوگيا سياقتى ءتۇرلى باعىتتى ۇسىناتىن جۇمىس توبىنىڭ مۇشەلەرى ەل اۋماعىندا قولايلى ۋاقىت بەلدەۋىن بەلگىلەۋ ماسەلەسىن زەرتتەدى. جۇمىس توبى UTC+5 بىرىڭعاي ۋاقىت بەلدەۋىنە كوشۋ قازاقستاننىڭ كوپتەگەن ءوڭىرى تابيعي ۋاقىتقا بارىنشا جاقىن ۋاقىتتى پايدالاناتىن ەڭ دۇرىس جانە وڭتايلى نۇسقا دەگەن پىكىرگە توقايلاستى.
سونىمەن, ەندى كۇندەلىكتى جۇمىسقا بۇرىنعى ۋاقىتتان ءبىر ساعات كەيىن باراسىز. وقۋشى, ستۋدەنتتەر دە سولاي. مامانداردىڭ ايتۋىنشا, ەل ەكونوميكاسىنا وتە ءتيىمدى. اسىرەسە كولىك قاتىناسى سالاسىندا ايتارلىقتاي وڭ وزگەرىستەر بولاتىنى ايتىلادى. ماسەلەن, «Air Astana», «SCAT» جانە «Qazaq Air» اۆياكومپانيالارى اۆيابيلەتتەردى ساتۋ جۇيەلەرىنە بارلىق قاجەتتى وزگەرىس ەنگىزدى, سونداي-اق جولاۋشىلارعا ءتيىستى حابارلامالار جولدانىپ جاتىر. بۇعان قوسا بۇگىننەن باستاپ قازاقستاننىڭ اۆياتسيالىق اكىمشىلىگىنىڭ جەدەل شتابىنىڭ نەگىزىندە «جەدەل جەلى» جۇمىس ىستەيدى. سونداي-اق رەيستىڭ وزەكتى مارتەبەسىن ناقتىلاۋ ءۇشىن جولاۋشىلار اۋەجايدىڭ انىقتامالىق قىزمەتتەرىنە جانە «Air Astana» اۆياكومپانيالارىنىڭ Call-ورتالىقتارىنا جۇگىنۋگە ءتيىس.
وسىعان وراي, كولىك مينيسترلىگى كورشىلەس تەمىرجول اكىمشىلىكتەرىمەن جانە «قازاقستان تەمىر جولى» ۇلتتىق كومپانياسى اكتسيونەرلىك قوعامىنىڭ قىزمەتتەرىمەن بىرلەسىپ, جولاۋشىلار كولىگىنىڭ قوزعالىس كەستەسىنە وزگەرىستەر ەنگىزۋ جۇمىستارىن جۇرگىزدى. تەمىرجول قاتىناسىنا قاتىستى بارلىق وزگەرىس رەسمي سايتتار مەن ينتەرنەت-رەسۋرستاردا جاريالاندى. ال اۋە قاتىناسى بويىنشا اۆياكومپانيالار تاراپىنان جولۋشىلارعا قولايلى جاعداي جاساۋ ءۇشىن رەسمي سايتتارىندا جانە الەۋمەتتىك جەلىلەرىندە قاجەتتى اقپاراتتىق قولداۋ كورسەتىلىپ جاتىر. بۇعان قوسا كوپشىلىك «جولاۋشىلار تاسىمالى» اق-تىڭ 1433 ءنومىرى نەمەسە Telegram بوتىنىڭ كومەگىمەن تەگىن اقپارات الا الادى.
ال ەل ىشىندە, اسىرەسە الەۋمەتتىك جەلىلەردە جۇرتشىلىق ساعاتتى قالاي وزگەرتۋ تۋرالى ءجيى سۇراپ جاتىر. بۇل قالاي جۇزەگە اسىرىلادى؟ ياعني ساعاتتى اۋىستىرۋ كەزىندە گادجەتتەر مەن تەحنيكانى قالاي دايىنداۋ كەرەك دەگەن سۇراق تۋىندايدى. تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى حالىقتىڭ جاڭا ۋاقىت بەلدەۋىنە ۋاقتىلى كوشۋى ءۇشىن امبەباپ نۇسقاۋلىقتى ۇسىنادى. بۇل – اۆتوماتتى جاڭارتۋ. گادجەتتەر مەن تەحنيكاداعى پارامەترلەردە ۋاقىت اۆتوماتتى تۇردە ينتەرنەت بايلانىسى قوسىلعان كەزدە ۋاقىت وزگەرەدى. تەك ونداي فۋنكتسياسى جوق تەحنيكا بولسا عانا ونى قولمەن وزگەرتۋگە تۋرا كەلەدى. ياعني ۋاقىتتى ءبىر ساعات كەرى شەگەرىپ قويساڭىز بولعانى.
قازاقستاننىڭ شەتەلدەردەگى ەلشىلىكتەرى ارقىلى رەسمي حاتتار جونەلتىلىپ, قازاق ەلىنىڭ ۋاقىت بىرىڭعاي ۋاقىت بەلدەۋىنە كوشكەنى تۋرالى اقپارات جاھانعا تەگىس تارادى.
