فوتو: triptonkosti.ru
جامبىل جاباەۆ ۇلى ءجۇزدىڭ شاپىراشتى تايپاسىنىڭ ەكەي رۋىنان شىققان. ارعى اتالارى داۋلەتتى بولسا دا, جامبىلدىڭ اكەسى جاپا شارۋا كىسى بولعان.
جامبىلدىڭ اقىندىق دارىنى جاس كەزىنەن-اق تانىلا باستاعان. بوزبالا شاعىنان ورتاسىن ءان مەن جىرعا كەنەلتىپ, كورشىلەس قىرعىز ەلىنە دە داڭقى جايىلعان. سول كەزدە كوپشىلىكتىڭ اۋزىنان تۇسپەي جۇرگەن جامبىل جەتىسۋدىڭ ءدۇلدۇل اقىنى سۇيىنبايعا جولىعىپ, ونىڭ باتاسىن العان.
جامبىل «شاعىم», «جىلقىشى», «شابدەنگە», ء«سات سايلاناردا», «وستەپكەدە», «پاتشا ءامىرى تارىلدى», ء«زىلدى بۇيرىق» ولەڭدەرىندە ەلدىڭ الەۋمەتتىك ساياسي ءومىرىن كورسەتكەن. جامبىل جاباەۆ شىعارماشىلىعىنىڭ شارىقتاۋ شەگى توقسان جاستان اسقان شاعىنا تۋرا كەلەدى. 1936 جىلى ماسكەۋدە وتكەن قازاقستاننىڭ ونكۇندىگىندە شىمىلدىعىن جامبىل اشتى. 360 ونەرپاز بارعان بۇل مادەنيەت كۇندەرىندە جىر الىبى جامبىل جاباەۆتىڭ, ءانشى كۇلاش بايسەيىتوۆانىڭ ابىرويى اسقاقتادى. جامبىل سول جىلى «ەڭبەك قىزىل تۋ» وردەنىمەن ماراپاتتالدى.
جامبىلدىڭ شىعارمالارى الەمنىڭ ونداعان تىلىنە اۋدارىلىپ دۇنيە جۇزىنە تارادى. جامبىل كوزىنىڭ تىرىسىندە كسرو مەملەكەتتىك سىيلىعىنىڭ لاۋرەاتى اتانعان. اقىننىڭ «وتەگەن باتىر», «سۇرانشى باتىر», «كورۇعلى», «باق, داۋلەت, اقىل» داستاندارى بار.
اقىننىڭ سوعىس جىلدارى وتان قورعاۋ تاقىرىبىنا ارناپ جازعان ولەڭدەرى ءۇش مىڭ جولدى قۇرايدى. اسىرەسە, «لەنينگرادتىق ورەنىم», «موسكۆاعا», «مايدانعا حات» سىندى ولەڭدەرى بار. جامبىل اقىن ءومىر مەن ءولىم ارپالىسىنا تۇسكەن جاۋىنگەرلەرگە وتتى جىرلارى ارقىلى جىگەر بەرۋگە تىرىسقان.
جامبىل 1945 جىلدىڭ 22 ماۋسىمىندا الماتى وبلىسىنىڭ ۇزىناعاش ەلدى مەكەنىندە 99 جاسىندا دۇنيەدەن ءوتتى.
