فوتو: qazaqstan.tv
«ستاليندىك رەپرەسسيا» تۇسىندا اتاقونىسىنان اجىراپ, قازاق توپىراعىنا دەپورتاتسيالانعان ياشا كوشاليوعلى اتا-باباسىنا قيىن ساتتە قامقورلىق كورسەتكەن ءبىزدىڭ حالىقتىڭ قايىرلى ءىسىن تەبىرەنىسپەن ەسكە الدى. اتاسى اۋزىنان تاستاماي ايتىپ كەتكەن كۇرسىنىسكە تولى ەستەلىكتەردى ءوزى بۇگىندە نەمەرەلەرىنىڭ قۇلاعىنا قۇيىپ وتىر. تۇركىستانعا تابان تىرەگەن كوشاليوعلىلار اۋلەتى جەرگىلىكتى جۇرتتىڭ سىن ساتتە كورسەتكەن جايساڭ كوڭىلى دوستىقتىڭ نەگىزىن قالادى دەيدى.
العىس ايتۋ كۇنى قارساڭىندا ياشا كوشاليوعلى تاعى دا قۋانىشقا كەنەلدى. «قازاق راديولارى» ۇجىمى ونى 52 جىل بۇرىن بۋرياتيادا قارۋلاس بولعان, شىمكەنتتە تۋىپ, تاريحي وتانى شەشەنستانعا ويىسقان سۇلتان احمادوۆ دوسىمەن تابىستىردى.
«مىڭ العىس» جوباسى – ءبىر مايىتتىك دونوردىڭ اعزاسى ارقىلى ەكىنشى رەت ومىرگە كەلگەن قوس الماتىلىقتى دا قاۋىشتىردى. قىزىعى, ولار وسىعان دەيىن بىرىنە باۋىر, بىرىنە جۇرەك ءبىر ادامنان سالىنعانىن بىلمەگەن. سۆەتلانا قايىپوۆاعا 2013 جىلى العاش رەت قىزى باۋىرىنىڭ بولشەگىن بەرسە, ەكىنشى رەت 2023 جىلى بەلگىسىز تۇلعانىڭ باۋىرى ترانسپلانتاتسيالانعان. ال مايىتتىك دونوردىڭ جۇرەگى كەۋدەسىندە سوعىپ تۇرعان دانيار بايبولاەۆ «ساعان ساي كەلەتىن جۇرەك تابىلدى» دەگەن ءسوزدى سەگىز جىل كۇتكەن.
«مەن الماتى قالاسىندا باۋىر ترانسپلانتاتسياسى جاسالعان العاشقى پاتسيەنتپىن. وتا ءساتتى اياقتالعاننان كەيىن اجالدان اراشالاپ قالعان ادامنىڭ تۋىستارىن سۇراستىردىق. الايدا دارىگەرلەر مەديتسينالىق قۇپيا رەتىندە قالاتىنىن ايتتى. ال بۇگىن ءبىر دونوردان اعزا العان ادامدى كەزدەستىردىم. سەنە الار ەمەسپىن. ماعان دانيار ۇلىمداي كورىنىپ تۇر», دەدى سۆەتلانا قايىپوۆا.
ايتا كەتەيىك, سۆەتلانا مەن دانيارعا ەكىنشى رەت ءومىر سىيلاعان دونوردىڭ اعزا مۇشەلەرى تاعى 2 ادامنىڭ اياقتان تۇرۋىنا سەپ بولعان.
2004 جىلى ارقالىقتان شەتەل اسقان جانىبەك ساۆەلەۆ تە كەش قوناعى بولدى. يسپانيادان ارنايى ات باسىن بۇرعان ول تۋعان اناسىن تابۋعا بارىن سالىپ جاتقان «بارمىسىڭ باۋىرىم» حابارىنىڭ ۇجىمىنا, تىلەكتەستىگىن ءبىلدىرىپ, اق باتاسىن جاۋدىرىپ جاتقان قازاق حالقىنا العىس ايتتى. بەلگيالىقتار اسىراپ الاعان جانىبەكتىڭ بيولوگيالىق اناسىن ىزدەۋى 2001-2002 جىلدارى ارقالىقتا دۇنيەگە كەلگەن 4 بالانىڭ تۋعان اناسى تابىلۋىنا تۇرتكى بولدى. ول وزىمەن تاعدىرلاس بالالاردىڭ كوپ ەكەنىنە كوزى جەتىپ, ولاردى جاقىندارىنا جەتەلەيتىن جوبانى جۇزەگە اسىرۋدى جوسپارلاپ وتىرعانىن جەتكىزدى.
«2023 جىلدىڭ جەلتوقسانىندا قازاقستانعا تۋعان انامدى ىزدەپ كەلدىم. سول ۋاقىتتان بەرى ءبىرشاما اسىراندى بالالار اناسىن ىزدەپ جاتقانىن ءبىلىپ جاتىرمىن. مەنىڭ كۇيىمدى كەشىپ جۇرگەن جاندارعا كومەكتەسۋ ءۇشىن جاڭا جوبانى ويلاستىرىپ وتىرمىن. بۇل اۋقىمدى جۇمىس بولعاندىقتان ينۆەستورلار تارتۋ, جاۋاپتى ورگاندارمەن بىرلەسە جۇمىس ىستەۋ كەرەك», دەدى جانىبەك.
جۋرناليست قىمبات دوسجان جانىبەك جۇماعۇلوۆتىڭ ءوز اناسىن ىزدەۋ ءبىر ساتكە دە ىركىلمەگەنىن تاعى دا تىلگە تيەك ەتتى.
ءىس-شارا بارىسىندا ءبىر ءۇيدىڭ 25 ونەرلى بالاسى جينالعان جۇرتتى تاڭ-تاماشا ەتتى. اقتوبەلىك جەتەسوۆتەر وتباسى 25 بالانى باۋىرىنا باسقان. ولار «مىڭ العىس» ساحناسىن ءان مەن كۇيگە بولەدى. وتاعاسى ءومىرحان دارىنسىز بالا بولمايدى, ونىڭ تالانتىن تابا المايتىن اتا-انا بولادى دەگەن ۇستانىممەن, بار بالاسىن ونەرگە باۋلىعان.
«مەن ءوزىم 6 جاسىمدا جەتىم قالدىم. قامقورشىسىز ەر جەتكەن قيىن كۇندەرىمدى وزگەلەردىڭ كورگەنىن قالامادىم. وسى وي مەنى بالا اسىراپ الۋعا اكەلدى. بالالارىمنىڭ ارقايسىسىن ءبۇلدىرشىن كۇنىنەن مۋزىكالىق اسپاپتى مەڭگەرۋگە شاقىرامىن. تالابىن شىڭدايمىن. بالالى ءۇي بازار. سوندىقتان ولاردىڭ اراسىندا كىشكەنە كەلىسپەۋشىلىكتەر بولسا كىتاپتان, تاريحي وقيعالاردان ونەگە كەلتىرىپ, تاربيەلەيمىز», دەدى ءومىرحان جەتەسوۆ.
