كونفۋتسيدىڭ «الەمدى زاڭدار مەن سوزدەر ەمەس, سيمۆولدار بيلەيدى» دەگەن ويىن باسشىلىققا الاتىن بولساق, ءبىزدىڭ زەرتتەۋ نىسانىمىزداعى «سەگىز قىر» مەن ء«بىر سىردىڭ» سيمۆوليكالىق ءمان ەكەندىگىن تۇسىنەمىز. دۇنيەنىڭ بارلىعى سيمۆولدار مەن وبرازدار. قاسيەتتى كىتاپتاردا «شىندىق دۇنيەگە جالاڭاش كۇيىندە كەلگەن جوق, ول نىشاندار مەن بەينەلەر ارقىلى كەلدى» دەگەن اياتتار بار. ياعني ءسىز بەن ءبىزدىڭ كورىپ, ءبىلىپ جۇرگەن ۇعىمدارىمىز ۇلى اقيقاتتىڭ كوركەم ءرامىزى عانا. ابايدىڭ «اللانىڭ ءسوزى – قارىپسىز, داۋىسسىز» دەگەن عاقلياسى دا وسى ويدى قۋاتتايدى. دەمەك «سەگىز قىر» مەن ء«بىر سىردىڭ» شىن ماعىناسى ءبىز ويلاعاننان دا تەرەڭدە جاتىر.
حاكىم اباي 38-قاراسوزىندە اللا تاعالانىڭ سەگىز «سۋبۋتي سيپاتتارىنا» تالداۋ جاسايدى.ولار مىنالار:
- حايات. ماڭگىلىك ءتىرى;
- ءىلىم. ءىلىم يەسى;
- ءساميۋ. ەستۋشى;
- باسار. كورۋشى;
- ءيرادا. بۇل سيپات «قالاۋ» دەگەن ماعىنانى بىلدىرەدى. «عىلىم بار بولسا, قالاماق تا بار»;
- قۇدىرەت. شەكسىز جانە ماڭگى قۇدىرەت يەسى;
- كالام. مۇندا «سويلەۋ» دەگەن ماعىنانى بىلدىرەدى...
- تاكۋين. بۇل سيپات جوقتى بار ەتىپ, بار نارسەدەن ەكىنشى دۇنيە جاراتۋ دەگەن ماعىنانى بىلدىرەدى. قۇداي تاعالانىڭ «كۇن», ياعني «بول!» دەگەن بۇيرىعى ارقىلى كەز كەلگەن نارسە ءاپ ساتتە بار بولادى.
ەندىگى جەردە اباي اتى اتالعان قۇدايلىق سەگىز سيپات ادامنىڭ ءوز ىشىنەن تابىلۋ كەرەكتىگىن جازادى. ء«وز پيعىلدارىڭدى سوعان ءوز حالىڭشە ۇقساتۋدى شارت قىل. اللا تاعالاعا ۇقساي الام با دەپ, ناداندىقپەن ول سوزدەن جيىركەنبە, – ءدال بىردەيلىك داعۋاسىمەنەن ەمەس, سونىڭ سوڭىندا بولماق», دەيدى حاكىم. شاكارىم قاجى بۇل كونتسەپتسيانى بىلاي تاپسىرلەيدى:
«...اللانىڭ پەندەسiنە راقىمى مول,
سەن دە وزiڭدەي ادامعا مەيiرiمدi بول.
ول جاراتتى, سەن-داعى جاراتىپ باق,
باردان باردى شىعارساڭ بولادى سول.
كەرەكسiزدi قىلمايدى يەڭ-داعى,
مەن دە سۇيتەم دەپ قارا سەن دە تاعى,
بiر قۇدايىڭ سابىرلى, سەن دە شىدا,
ءبارi وسىنداي, ويلانساڭ, ارتقى جاعى...»
قوش, سونىمەن رۋحانياتتا اللا تاعالانىڭ سەگىز سيپاتى بولۋ كەرەكتىگىن تۇسىندىك. وسى ارقىلى سەگىز قىردىڭ دا ماعىناسى اشىلعانداي بولدى. ال ەندى ء«بىر سىرىمىز» نە بولدى؟ يسلام ارحيتەكتۋراسىندا ەكى رومبىنىڭ ءبىر بۇرىشتارى ءوزارا كىرىگىپ, ورنەك قۇرايتىن ناقىشتار ءجيى كەزدەسەدى. سوندا ەكى شارشىلاردىڭ بۇرىشتارى قاباتتاسقاندا ولاردىڭ تۇيىسكەن تۇسىنان تاعى ءبىر جاڭا شارشى پايدا بولادى. بۇل دا – جوعارىدا ايتىلعان سيمۆولدىق كود. ەكى شارشىنىڭ سەگىز بۇرىشىن سەگىز سيپات دەپ الساق, ء«بىر سىرىمىز» – سول ەكى فيگۋرانىڭ «نەكەسىنەن» پايدا بولعان جاڭا شارشى.
قورىتا ايتقاندا, تۇراقتى تىركەستەگى سەگىز قىرىمىز – اللا تاعالانىڭ پەندەنىڭ بويىنان تابىلۋى ءتيىس سەگىز سيپاتى بولسا, ال ءبىر سىرىمىز سول سەگىز سيپات بىرىككەندە عانا اشىلاتىن «كوكىرەك كوزى» دەپ ۇعۋعا بولادى. سەبەبى اقيقات تەك كوكىرەك كوزى (باتين كوزى) ارقىلى عانا تانىلاتىنىن شاكارىم قاجى بىلاي تۇيىندەيدى:
«...جاسىرىپ تۇر جار ءوزiن,
باس كوزiمەن قاراما.
جۇرەگiڭنiڭ اش كوزiن,
جاردىڭ سىرىن ارالا...»
