يگىلىكتى ءىس-شارادا 2006 جىلدان باستاپ الماتى وبلىسى اكىمىنىڭ قولداۋىمەن شىققان, كەيىنگى جىلدارى جەتىسۋ وبلىسىنىڭ اكىمىنىڭ باستاماسىمەن جارىق كورگەن قالامگەرلەر مەن سازگەر, سۋرەتشىلەردىڭ 300 دانا كىتابى ۇلتتىق كىتاپحاناعا سىيعا تارتۋ ءراسىمى اتقارىلدى. حالىقارالىق كىتاپ سىيلاۋ كۇنى اياسىندا وتكەن ماڭىزدى ءىس-شارا جەرلەس اقىن-جازۋشىلارىمىزدىڭ شىعارمالارىن ادەبي ءومىرى قايناپ جاتقان الماتى قالاسىنىڭ وقىرماندارىنا تانىستىرۋدى, ناسيحاتتاۋدى ماقسات ەتتى. وقىرمان قىزىعۋشىلىعىن وياتقان بۇل باسقوسۋعا وبلىستىق مادەنيەت, ارحيۆتەر جانە قۇجاتتاما باسقارماسى مەن اتالعان باسقارماعا قاراستى س.سەيفۋللين اتىنداعى وبلىستىق كىتاپحانا ۇجىمى ۇيىتقى بولدى.
جينالعاندار جەتىسۋلىق اقىن-جازۋشىلاردىڭ كىتاپتارى قويىلعان كورمەمەن تانىسقاننان كەيىن, باسقارما باسشىسى قۋانىش سۇلەيمەنوۆ ءسوز الدى.
«تارالىمى 500 دانا, ەڭ كوپ بولعاندا 1000 دانادان اسپايتىن بۇل كىتاپتار نەگىزىنەن وبلىس اۋماعىمەن عانا شەكتەلىپ, اۋدان-اۋىلدارعا عانا تاراتىلاتىن. ياكي شىعارماشىلىقتارى بىرتىندەپ شارىقتاپ كەلە جاتقان اقىن-جازۋشىلار وزگە وڭىرلەرگە تانىلماي كوپ رەتتە ءوز قازاندارىندا وزدەرى قايناپ جاتاتىن. اۋەلى استانا قالاسىنا جول باستاپ, ارتىنان الماتىعا ات باسىن تىرەگەن «جەتىسۋ: كىتاپ كەرۋەنى» جوباسىنىڭ ماقساتى دا وسىنداي ولقىلىقتىڭ ورنىن تولتىرۋ. سونداي-اق جەتىسۋلىق تالانتتاردى باسقا وڭىرلەردىڭ وقىرماندارىنا تانىستىرۋ. بۇل ماقسات بەلگىلى ءبىر مولشەردە ورىندالدى دەپ ايتۋعا بولادى. سوعان وراي وسى باعىتتاعى ءىس-شارالار الداعى ۋاقىتتا دا جۇيەلى تۇردە جالعاسادى», دەگەن ق.سۇلەيمەنوۆ كوركەم ادەبيەت جانە ونەر سالاسى بويىنشا جارىق كورگەن كىتاپتاردى ۇلتتىق كىتاپحانا قورىنا سىيعا تارتتى.
شىنىندا وڭىردە اقىن-جازۋشىلار مەن باسقا دا ونەر ادامدارىنىڭ شىعارماشىلىعىنا قولداۋ كورسەتۋ باعىتىندا جۇزەگە اسىپ جاتقان ناتيجەلى جۇمىستار جەتەرلىك. جەتىسۋدا وبلىس اكىمىنىڭ قولداۋىمەن جۇزدەگەن كىتاپ جارىققا شىعىپ, ءبارىنىڭ تۇساۋكەسەر راسىمدەرى وتكىزىلدى. اقىن-جازۋشىلاردىڭ, ءانشى-سازگەرلەردىڭ ۇيىمداسقان شىعارماشىلىق كەشتەرى قانشاما!؟
الماتى قالاسىنا كىتاپ كەرۋەنىمەن بىرگە تالدىقورعاندىق اقىن-جازۋشىلارى مەن ونەر ادامدارىنىڭ ءبىر شوعىرى كەلگەن ەدى. ولاردى الماتىلىق قالامداستارى قارسى الىپ, باسقوسۋ بارىسىندا كىتاپ جايلى ورەلى اڭگىمە ءوربىتتى.
جينالعاندار الدىندا اقىن, حالىقارالىق «الاش» ادەبي سىيلىعىنىڭ لاۋرەاتى امىرە ءارىن مەن حالىقارالىق تۇركسوي جازۋشىلار وداعىنىڭ توراعاسى, مەملەكەتتىك سىيلىقتىڭ لاۋرەاتى, اقىن ۇلىقبەك ەسداۋلەت, جازۋشى, قازاقستاننىڭ ەڭبەك سىڭىرگەن قايراتكەرى ءالي ىسقاباي, قازاقستاننىڭ ەڭبەك سىڭىرگەن قايراتكەرى, مادەنيەت سالاسىنىڭ ارداگەرى ەلەۋسىز جانپەيىس ۇلى, اقىن, حالىقارالىق «الاش» ادەبي سىيلىعىنىڭ لاۋرەاتى باقىت بەدەلحان, اقىن ءنۇسىپباي ءابدىراحىم ءسوز الىپ, جينالعان وقىرمانعا ىزگى تىلەكتەرىن ارنادى. ءسوز ورايى كەلگەندە اقىن قۋات قايرانباەۆ جەرلەستەرىمەن جولىعىسۋ قۋانىشىنا ورايلاستىرىپ «تالدىقورعاندى اڭساۋ» دەگەن ولەڭىن وقىپ بەردى.
كىتاپ مەرەكەسىندە جەتىسۋلىق جازۋشى, قازاقستان جازۋشىلار وداعىنىڭ مۇشەسى باقىت مەرەكەنوۆانىڭ «التىن بەسىك», كورنەكتى سازگەر ءالي الپىسبايدىڭ «ساعىم», اقىن جانگەلدى نەمەرەبايدىڭ «ارمان ايالداماسى» كىتاپتارىنىڭ تۇساۋى كەسىلدى. ودان كەيىن ۇلتتىق كىتاپحانا ديرەكتورى باقىتجامال وسپانوۆا وزدەرىنىڭ ايىرباس-رەزەرۆتىك قورىنان 2000 دانا كىتاپتى جەتىسۋ كىتاپحانالارىنا سىيعا تارتتى. قوماقتى سىيلىقتى وبلىستىق كىتاپحانا ديرەكتورى سامال شاياحمەتوۆا قابىلداپ الدى.
اسەرلى باسقوسۋدا قازاقستاننىڭ حالىق ءارتىسى رامازان ستامعازيەۆ پەن بەلگىلى ءداستۇرلى ءانشى نۇرجان جانپەيىسوۆ اننەن شاشۋ شاشسا, د.راقىشەۆ اتىنداعى جەتىسۋ وبلىستىق فيلارمونياسىنىڭ «كۇرەڭبەل» تريوسى ونەرىمەن ءتانتى ەتتى.
جەتىسۋ وبلىسى
