ەلىمىزدە بودەنە ءوسىرۋ – اۋىل شارۋاشىلىعى ءوندىرىسىنىڭ سالىستىرمالى تۇردەگى جاڭا سالاسى. وكىنىشكە قاراي, كوپتەگەن شارۋا قوجالىعىنىڭ باسشىلارى بۇل قۇستىڭ پايدالى قاسيەتتەرىن, جۇمىرتقا مەن ەت ءوندىرىسىن ۇلعايتۋداعى مۇمكىندىكتەرىن ءالى كۇنگە جەتكىلىكتى باعالاماي وتىر. دەسەك تە, سولتۇستىك قازاقستاندا قۇس شارۋاشىلىعىنىڭ جاڭا سالاسى سانالاتىن بودەنە باعۋ دۇرىس جولعا قويىلعان. ونداعى بودەنە ءوسىرۋ شارۋاسى – حالىقتىڭ جۇمىرتقا مەن ەت سياقتى قۇس ونىمدەرىنە دەگەن قاجەتتىلىگىن قاناعاتتاندىرۋ كوزىنىڭ ءبىرى.
جوعارىدا ايتىلعان جوبانىڭ نەگىزگى يدەياسى مەن ەرەكشەلىگى – فيزيولوگيالىق جانە بيولوگيالىق ۇدەرىستەردى جەدەلدەتەتىن, قۇستىڭ دەنساۋلىعىن نىعايتاتىن جانە جەمنىڭ قورىتىلۋىن جاقسارتاتىن ەكسترۋدتالعان ءارى تابيعي وسىمدىك كومپونەنتتەرىن قولدانا وتىرىپ بايىتىلعان جەمدى ازىرلەۋ. بۇل عىلىمي جۇمىس قاۋىپسىز, جوعارى ساپالى بودەنە ونىمدەرىن الۋعا مۇمكىندىك بەرەدى. اتاپ ايتقاندا, اس قورىتۋ ۇدەرىستەرى, قان مەن زات الماسۋدىڭ مورفو-بيوحيميالىق جاعدايى, ەت جانە جۇمىرتقا ونىمدىلىگى, بيولوگيالىق قۇندى ونىمدەردى ارتتىرۋ وڭتايلاندىرىلادى.
وسىلاي وتاندىق عالىمداردىڭ ناتيجەلى ەڭبەگىنىڭ ارقاسىندا تابيعي وسىمدىك كومپونەنتتەرى نەگىزىندە ەت جانە جۇمىرتقا باعىتىنداعى بودەنەلەرگە ارنالعان جاڭا, جەڭىل سىڭەتىن, جوعارى قورەكتىك بايىتىلعان جەمشوپتەردىڭ رەتسەپتۋراسى جاسالدى.
ء«بىز بودەنەگە ارنالعان Start رەتسەپتۋراسىمەن جەم تۇرلەرىن ازىرلەدىك. 2023 جىلى ەت جانە جۇمىرتقا باعىتىنداعى بودەنەگە ارنالعان بارلىق جەم ءتۇرى سىنالدى: Start ء(بىرىنشى), Grower, Layer, Finish (ەكىنشى رەت جاقسارتىلعان قۇراممەن). رەتسەپتىڭ ايرىقشا ەرەكشەلىگى – ولاردا ەت-سۇيەك ۇنىنىڭ بولماۋى جانە ەكسترۋدتالعان استىق كومپونەنتتەرىنىڭ قوسىلۋى», دەيدى عىلىمي جوبا جەتەكشىسى, قاتزۋ اعا وقىتۋشىسى دينارا جاڭاباەۆا.
وسى جوبا نەگىزىندە ازىرلەنگەن جەمنىڭ قۇس اعزاسى مەن ولاردىڭ ەت پەن جۇمىرتقا ونىمدىلىگىنە اسەرى زەرتتەلدى. بودەنە ءۇشىن ازىرلەنگەن جەمنىڭ ساپاسى مەن قاۋىپسىزدىگىنە باعا بەرىلدى. ناتيجەسىندە, جەمنىڭ ۋلى جانە قاۋىپسىز ەكەنى, بارلىق نورمالار مەن تالاپتارعا ساي كەلەتىنى انىقتالدى. بۇلارمەن بىرگە, بودەنەلەردىڭ ەت جانە جۇمىرتقا ونىمدىلىگىنىڭ ايتارلىقتاي جاقسارعانىن كورسەتتى. بودەنە ءوسىرۋدى دامىتۋ, ونىڭ جوعارى ساپالى جانە پايدالى ءونىم رەتىندەگى الەۋەتىن اشۋ, ەكسپورتتىق قۋاتتىلىقتى ارتتىرۋ حالىقتىڭ دەنساۋلىعى مەن ءال-اۋقاتى ءۇشىن اسا ماڭىزدى.
