ءۇي مەن جۇمىس اراسىنداعى قاربالاس ۋاقىتتا جەدەل جاردەم بريگاداسى تۇنشىعىپ جاتقان بالانى بالالار اۋرۋحاناسىنا الىپ بارا جاتادى. ءسابيدىڭ جاعدايى ءتىپتى ناشارلاي باستاعاندا دارىگەرلەر ۋاقىتتى بوسقا وتكىزبەي, جاقىن جەردەگى قازىبەك بي كوشەسىندەگى قالالىق جەدەل شۇعىل كومەك كورسەتۋ اۋرۋحاناسىنا (قجشكا) اپارۋدى ۇيعارادى.
بالا بىردەن وسى اۋرۋحانانىڭ جانساقتاۋ بولىمىنە جاتقىزىلىپ, رەانيماتولوگتەر گەيمليح ايلاسىن قولدانىپ, ىشتەگى بوتەن زاتتى الىپ تاستاۋعا بىرنەشە رەت ارەكەتتەنگەنىمەن, وكىنىشكە قاراي, ناتيجە بولماعان. قجشكا ديرەكتورىنىڭ ورىنباسارى ەرمەك جەلدىباەۆتىڭ ايتۋىنشا, ۇجىم كىشكەنتاي ناۋقاستىڭ ءومىرىن ساقتاۋدا تىعىرىققا تىرەلگەن. ەرەسەكتەر اۋرۋحاناسىندا بالالارعا ارنالعان برونحوسكوپتىڭ بولماۋىنا بايلانىستى وعان برونحوسكوپيا جاساۋ مۇمكىن ەمەس ەدى. الايدا بالانىڭ جاعدايى ناشارلاپ, ساتۋراتسياسى تومەندەپ, كوگەرە باستاعان سوڭ رەانيماتولوگتەر نۇرلان رساليەۆ, مامىرجان يۋلداشەۆ جانە حيرۋرگ باقتيار گاليەۆ شۇعىل تۇردە ينتۋباتسيا جاسادى. ينتۋباتسيا كەزىندە بالانىڭ تىنىس جولدارى اشىلىپ, وسىدان كەيىن عانا بالالار اۋرۋحاناسىنان دارىگەرلەر جەتكەنشە ونىڭ جاعدايىن تۇراقتاندىرۋعا مۇمكىندىك تۋدى.
بالالارعا شۇعىل مەديتسينالىق كومەك كورسەتۋ ورتالىعىنىڭ (بشمكو) ماماندارى كەلگەننەن كەيىن برونحوسكوپيانىڭ كومەگىمەن بالانىڭ تىنىس جولىنا تۇرىپ قالعان بۇرشاق الىندى. كىشكەنتاي عانا پاتسيەنتتىڭ جاعدايى قجشكا جانساقتاۋ بولىمىندە بىرنەشە ساعاتتان سوڭ قالپىنا كەلە باستاعاننان كەيىن, ودان ءارى قاراي ەمدەۋ ءۇشىن اتالعان ورتالىققا جەتكىزىلدى.
«بۇرشاقتى شىعارىپ الۋ وڭاي ەمەس, بۇل نەگىزىنەن برونحوسكوپيا كومەگىمەن جاسالادى. بالالار اۋرۋحاناسىنىڭ ماماندارى كەلگەنگە دەيىن ءبىزدىڭ دارىگەرلەر دەر كەزىندە ارەكەت جاسادى. سودان كەيىن بشمكو دارىگەرلەرى «ەرەسەكتەر» اۋرۋحاناسى جاعدايىندا كاسىبي تۇردە جاساعان برونحوسكوپيانىڭ ارقاسىندا بالا امان قالدى. ءبارىمىز سابيگە الاڭداپ, ونىڭ جاعدايىن ءجىتى قاداعالاپ وتىردىق, قازىر ۇيگە شىعارىلعانىن ەستىپ قۋانىپ جاتىرمىز», دەيدى دارىگەر ەرمەك جەلدىباەۆ.
بالالار اۋرۋحاناسى قابىلداۋ ءبولىمىنىڭ مەڭگەرۋشىسى مەيىرجان قۇرماناليەۆ مۇنداي ەرەسەكتەر مەن بالالار اۋرۋحانالارى ماماندارى شۇعىل تۇردە ناۋقاستى قوسىلا قۇتقاراتىن وقيعالار جىلىنا ەكى-ءۇش رەت قايتالاناتىنىن ايتادى.
«بشمكو قابىلداۋ بولىمىنە 103-تەن «ناۋقاس 2 جاستا, اسپيراتسيالىق سيندروم, رەانيماتسيالىق بريگادانى دايىنداڭىز» دەگەن قوڭىراۋ ءتۇستى. قابىلداۋ بولىمىندە 7 ماماننان تۇراتىن بريگادا كۇتىپ وتىرعان. شامامەن 30 مينۋت ءوتتى, بالا ءالى جوق: «بىزگە جەتكىزۋگە ۋاقىتى بولمادى ما؟», «بالا امان با؟» دەگەن ۇرەي تۋىپ, 103-كە ءوزىمىز قوڭىراۋ شالدىق. سويتسەك, ولار ناۋقاستى جاقىن ماڭداعى باسقا اۋرۋحاناعا اپارۋدى ۇيعارعان ەكەن. ۋاقىت ءوتىپ جاتتى. كوماندا تەز جينالىپ, 15 مينۋت ىشىندە قجشكا-عا جەتتى. كەلگەننەن كەيىن ءبىزدىڭ توپ برونحوسكوپيا جاساپ, تىنىس الۋ جولدارىنان بۇرشاقتى شىعارىپ تاستادى. ەكى اۋرۋحانانىڭ جەدەل ارەكەتىنىڭ ارقاسىندا ءسابي امان قالدى», دەيدى م.قۇرماناليەۆ.
بالالار اۋرۋحاناسىنىڭ دارىگەرلەرى بيىل ءبىر جارىم ايدىڭ ىشىندە تىنىس جولدارىندا بوگدە زات بار 10 ناۋقاستى امان الىپ قالعانىن ايتا كەتكەن ءجون. بۇل پاتسيەنتتەردىڭ بارلىعى – 1 مەن 3 جاس ارالىعىنداعى بالالار.
الماتى
