جاساندى ينتەللەكتكە نەگىزدەلگەن كوپسالالى جوبادا نەيروندىق جەلىلەر جانە ماشينالىق وقىتۋ الگوريتمى قولدانىلادى. قازىر عالىمدار «ەلەكتروندى مۇرىنعا» كوپ تاپسىرمانى ورىنداۋدى ۇيرەتىپ جاتىر. ولار نەيروندىق جەلىنى ءبىر جۇيەدەن ەكىنشىسىنە اۋىستىرۋ مودەلىن جاساۋدى قولعا الدى. بۇل جوعارى دالدىگى بار بىرنەشە جاساندى ءيىس سەزۋ جۇيەلەرىن قىسقا مەرزىمدە ۇيرەتۋگە مۇمكىندىك بەرەدى.
«جاساندى ءيىس سەزۋ جۇيەلەرى جوعارى مامانداندىرىلعان سالالاردا قولدانىلادى. ەگەر جۇيەنى ءبىر اسپاپتا ۇيرەتسەڭىز, ءدال سول جۇيەنى ەكىنشى قۇرىلعىدا پايدالانا المايسىز. قازىرگى ەلەكتروندى مۇرىن جۇيەلەرىنىڭ ارقايسىسىن ءبىر-بىرىنەن بولەك ۇزاق ۋاقىت بويى وقىتادى, سىناقتان وتكىزەدى جانە بەلگىلى ءبىر سالادا عانا قولدانادى. بۇل «ەلەكتروندى مۇرىننىڭ» جاپپاي ءوندىرىسىن قالىپتاستىرۋعا جول بەرمەيدى. ءبىز وقىتۋ ادىستەمەسىن ازىرلەۋ جانە دەرەكتەردى ءبىر جۇيەدەن ەكىنشى جۇيەگە جىلدام تاسىمالداۋ جۇمىستارىمەن اينالىسامىز. ءبىر «ەلەكتروندى مۇرىندى» ءارتۇرلى زەرتتەۋ وبەكتىلەرىنە جانە ءتۇرلى ماقساتتارعا قولدانۋ ارقىلى ناتيجەلەرگە قول جەتكىزدىك. جوبانىڭ قورىتىندىسى بويىنشا بىرنەشە «مۇرىننان» جەلى قۇرۋدى جوسپارلاپ وتىرمىز. ولار دەرەكتەردى سەرۆەرگە جىبەرەدى جانە بۇل ارقىلى قالانىڭ ەكولوگيالىق مونيتورينگى جۇيەسىنىڭ ءپروتوتيپى جاسالادى», دەپ تۇسىندىرەدى جوبا جەتەكشىسى, ل.ن.گۋميلەۆ اتىنداعى ەۇۋ «اقپاراتتىق قاۋىپسىزدىك جانە كريپتولوگيا» عزي ديرەكتورى دينا ساتىبالدينا.
ەۇۋ عالىمدارى «ەلەكتروندى مۇرىن» كومەگىمەن قازاقستاننىڭ ءارتۇرلى ايماقتارىنداعى توپىراقتىڭ مۇناي ونىمدەرىمەن لاستانۋ دارەجەسىن انىقتادى. ەكسپەريمەنت رەتىندە قازاقستاننىڭ 8 كەن ورنىنان مۇناي الىندى. ونىڭ بارىسىندا جاساندى ءيىس سەزۋ جۇيەسى 95% دالدىكپەن قۇرامى ۇقساس مۇناي تۇرلەرىن اجىراتا الدى. عالىمداردىڭ سوزىنشە, مۇنداي جىلدام باعالاۋ كەيبىر قىمبات, ۇزاق مەرزىمدى زەرتحانالىق زەرتتەۋلەردى اۋىستىرۋعا مۇمكىندىك بەرەدى.
ء«بىز پلاستماسسالاردىڭ ءيىسىن انىقتاۋ ءۇشىن زەرتتەۋ جۇرگىزدىك. «ەلەكتروندى مۇرىن» ساراپشى ادامداردىڭ مۇرىندارىنا قاراعاندا سەزىمتال ەكەنى بەلگىلى بولدى. ادامدار ءيىستى انىقتاي الماعان جەردە ءبىزدىڭ قۇرىلعى ونى جوعارى دالدىكپەن اجىراتتى. دەمەك, بۇل پروتسەستى تولىعىمەن اۆتوماتتاندىرۋعا بولادى», دەپ اتاپ ءوتتى فيزيكا-ماتەماتيكا عىلىمدارىنىڭ كانديداتى.
جاساندى ءيىس سەزۋدىڭ گاز-اناليتيكالىق جۇيەسى زاتتىڭ حيميالىق قۇرامىن اجىراتادى, جىكتەيدى جانە ءدال انىقتايدى. سونداي-اق قۇرىلعى كوكونىستەر مەن جەمىستەردىڭ ۇلكەن كولەمىن ساقتاۋ پروتسەسىن باسقارۋعا جانە اۆتوماتتاندىرۋعا كومەكتەسەدى.
