قازاقستان اۋماعى بويىنشا 2024 جىلعى كوكتەم ايلارىنا ارنالعان ماۋسىمدىق اۋا رايى بولجامى:
كوكتەمنىڭ العاشقى ايى – ناۋرىزدا قازاقستاننىڭ سولتۇستىك وبلىستارىندا قىس مەزگىلىندەگىدەي سۋىق اۋا رايى كۇتىلەدى, قار ءجيى جاۋىپ, بۇرقاسىن بولادى. جەر كوكتايعاق بولىپ, تۇمان تۇسەدى دەپ بولجانادى. اۋا تەمپەراتۋراسى تۇندە مينۋس 15-25°س-قا ءتۇسىپ, اياز بولادى.
ەلدىڭ سولتۇستىك, ورتالىق جانە شىعىسىندا ءبىرىنشى ونكۇندىكتە اۋا تەمپەراتۋراسى كۇندىز 2-7°س كورسەتىپ, جىلىمىق سەزىلەدى. ايدىڭ ءۇشىنشى ونكۇندىگىندە اۋا تەمپەراتۋرى 5-15°س-قا كوتەرىلەدى.
ال قازاقستاننىڭ وڭتۇستىك, وڭتۇستىك-باتىس وڭىرلەرىندە ناۋرىزدا جاۋىن-شاشىن (جاڭبىر, جىلبىسقى قار) ءجيى بولادى. اۋا تەمپەراتۋراسى تۇندە 0,-10°س-تان +3+8°س-قا دەيىن, كۇندىز 0,+10°س-تان +10+18°س-قا دەيىن كوتەرىلۋى بايقالادى.
ناۋرىزدا ءبىر ايداعى ورتاشا اۋا تەمپەراتۋراسى قازاقستان اۋماعىنىڭ باسىم بولىگىندە نورماعا ساي, ەلدىڭ وڭتۇستىك-شىعىس بولىگىندە نورمادان 1°س جوعارى بولادى دەپ كۇتىلۋدە. ناۋرىز ايىندا جاۋىن-شاشىن مولشەرى رەسپۋبليكانىڭ باسىم بولىگىندە نورمادان جوعارى, قازاقستاننىڭ وڭتۇستىك-باتىس, سولتۇستىك-باتىس بولىگىندە نورماعا شامالاسادى.
ءساۋىر جانە مامىر ايلارىندا رەسپۋبليكانىڭ باسىم بولىگىندە اۋا تەمپەراتۋراسى نورمادان 1°س جوعارى بولادى دەپ كۇتىلۋدە, تەك مامىردا ەلدىڭ سولتۇستىك-باتىس جارتىسىندا تەمپەراتۋرالىق فون نورماعا شامالاس بولادى دەپ بولجانۋدا.
ءساۋىر ايىندا رەسپۋبليكانىڭ باسىم بولىگىندە جاۋىن-شاشىن كليماتتىق نورماعا سايكەس, سولتۇستىك-باتىس ايماعىندا نورمادان از, ەلدىڭ وڭتۇستىك, وڭتۇستىك-شىعىس, شىعىسىنىڭ تاۋلى ايماقتاردا نورمادان جوعارى بولادى. مامىر ايىندا رەسپۋبليكانىڭ باسىم بولىگىندە جاۋىن-شاشىن مولشەرى نورماعا سايكەس بولادى دەپ بولجانىپ وتىر.
