فوتو: اشىق دەرەككوز
ءۇي مەن جۇمىس اراسىنداعى قاربالاس ۋاقىتتا جەدەل جاردەم بريگاداسى تۇنشىعىپ جاتقان بالانى بالالار اۋرۋحاناسىنا الىپ بارا جاتادى. ءسابيدىڭ جاعدايى ءتىپتى ناشارلاي باستاعاندا دارىگەرلەر ۋاقىتتى بوسقا وتكىزبەي, جاقىن جەردەگى قازىبەك بي كوشەسىندەگى قالالىق جەدەل شۇعىل كومەك كورسەتۋ اۋرۋحاناسىنا (قجشككا) اپارۋدى ۇيعارادى.
بالا بىردەن وسى اۋرۋحانانىڭ جانساقتاۋ بولىمىنە جاتقىزىلىپ, رەانيماتولوگتار گەيمليح ءتاسىلىن قولدانىپ, ىشتەگى بوتەن زاتتى الىپ تاستاۋعا بىرنەشە رەت ارەكەتتەنگەنىمەن, وكىنىشكە قاراي, ناتيجە بولماعان.
قجشككا ديرەكتورىنىڭ ورىنباسارى ەرمەك جەلدىباەۆتىڭ ايتۋىنشا, كىشكەنتاي ناۋقاستىڭ ءومىرىن امان الىپ قالۋ بارىسىندا ۇجىم تىعىرىققا تىرەلگەن. ەرەسەكتەر اۋرۋحاناسىندا بالالارعا ارنالعان برونحوسكوپتىڭ بولماۋىنا بايلانىستى, وعان برونحوسكوپيا جاساۋ مۇمكىن ەمەس ەدى.
الايدا بالانىڭ جاعدايى ناشارلاپ, ساتۋراتسياسى تومەندەپ, كوگەرە باستاعان سوڭ رەانيماتولوگتار نۇرلان رساليەۆ, مامىرجان يۋلداشەۆ جانە حيرۋرگ باقتيار گاليەۆ شۇعىل تۇردە ينتۋباتسيا جاسادى. ينتۋباتسيا كەزىندە بالانىڭ تىنىس جولدارى اشىلىپ, وسىدان كەيىن عانا بالالار اۋرۋحاناسىنان دارىگەرلەر جەتكەنشە ونىڭ جاعدايىن تۇراقتاندىرۋعا مۇمكىندىك تۋدى.
بشمككو ماماندارى كەلگەننەن كەيىن برونحوسكوپيانىڭ كومەگىمەن بالانىڭ تىنىس جولىنا تۇرىپ قالعان بۇرشاق الىندى. كىشكەنتاي عانا پاتسيەنتتىڭ جاعدايى قجشككا جانساقتاۋ بولىمىندە بىرنەشە ساعاتتان سوڭ قالپىنا كەلە باستاعاننان كەيىن, ودان ءارى قاراي ەمدەۋ ءۇشىن بالالار شۇعىل مەديتسينالىق كومەك كورسەتۋ ورتالىعىنا جەتكىزىلدى.
«بۇرشاقتى شىعارىپ الۋ وڭاي ەمەس, بۇل نەگىزىنەن برونحوسكوپيا كومەگىمەن جاسالادى. بالالار اۋرۋحاناسىنىڭ ماماندارى كەلگەنگە دەيىن ءبىزدىڭ دارىگەرلەر دەر كەزىندە ارەكەت جاساپ, وعان قوسا بالالار اۋرۋحاناسىنىڭ دارىگەرلەرىنىڭ «ەرەسەكتەر» اۋرۋحاناسى جاعدايىندا كاسىبي تۇردە جاسالعان برونحوسكوپيانىڭ ارقاسىندا بالا امان قالدى. ءبارىمىز سابيگە الاڭداپ, ونىڭ جاعدايىن ءجىتى قاداعالاپ وتىردىق, قازىر ۇيگە شىعارىلعانىن ەستىپ قۋانىپ جاتىرمىز», دەيدى دارىگەر ەرمەك جەلدىباەۆ.
بالالار اۋرۋحاناسى قابىلداۋ ءبولىمىنىڭ مەڭگەرۋشىسى مەيىرجان قۇرماناليەۆ مۇنداي ەرەسەكتەر مەن بالالار اۋرۋحانالارى ماماندارى شۇعىل تۇردە ناۋقاستى قوسىلا قۇتقاراتىن وقيعالار جىلىنا 2-3 رەت قايتالاناتىنىن ايتادى.
وسى وقيعاعا بايلانىستى بالالار شۇعىل مەديتسينالىق كومەك كورسەتۋ ورتالىعىنىڭ ءبولىم مەڭگەرۋشىسى مەيىرجان قۇرماناليەۆ: «بشمككو قابىلداۋ بولىمىنە «103»-تەن: «ناۋقاس 2 جاستا, اسپيراتسيالىق سيندروم, رەانيماتسيالىق بريگادانى دايىنداڭىز» دەپ قوڭىراۋ شالىندى. قابىلداۋ بولىمىندە 7 ماماننان تۇراتىن بريگادا كۇتىپ وتىرعان. شامامەن 30 مينۋت ءوتتى, بالانى ءالى جەتكىزبەدى: «بىزگە جەتكىزۋگە ۋاقىتى بولمادى ما؟!», «بالا امان با؟» دەگەن سۇراقتار تۋىندادى. ءبىز «103»-كە ءوزىمىز قوڭىراۋ شالدىق, ولار ناۋقاستى جاقىن ماڭداعى باسقا اۋرۋحاناعا اپارۋدى ۇيعارعان ەكەن – ۋاقىت ءوتىپ جاتتى. كوماندا تەز جينالىپ, 15 مينۋت ىشىندە قجشككا-عا جەتتى. كەلگەننەن كەيىن ءبىزدىڭ توپ برونحوسكوپيا جاساپ, تىنىس الۋ جولدارىنان بۇرشاقتى شىعارىپ تاستادى. ەكى اۋرۋحانانىڭ جەدەل ارەكەتىنىڭ ارقاسىندا ءسابي امان قالدى», دەيدى.
بشمككو دارىگەرلەرى تەك بيىلعى ءبىر جارىم ايدىڭ ىشىندە تىنىس جولدارىندا بوگدە زات بار 10 ناۋقاستى امان الىپ قالعانىن ايتۋ پارىز. بۇل پاتسيەنتتەردىڭ بارلىعى – 1 مەن 3 جاس ارالىعىنداعى بالالار.
