س.لاۆروۆپەن اڭگىمەلەسۋ بارىسىندا اوسشك كەڭىستىگىندە بولىپ جاتقان ۇدەرىستەر, وسى الاڭدى ودان ءارى دامىتۋ پەرسپەكتيۆالارى, سونداي-اق رەسەيدىڭ اوسشك-گە قاتىسۋى مەن ۇلەسى تالقىلاندى. مينيستر رەسەيدىڭ كەڭەس جۇمىسىنا قولداۋ كورسەتەتىنىن راستادى. ءوز كەزەگىندە ق.سارىباي رەسەيدىڭ اوسشك اياسىنداعى قىزمەتىن, كەڭەستى نىعايتۋعا جانە ونى تولىققاندى حالىقارالىق ۇيىمعا اينالدىرۋعا باعىتتالعان كوپتەگەن باستاماسىن جوعارى باعالادى.
بۇدان كەيىن ق.سارىباي رەسەي سىرتقى ىستەر ءمينيسترىنىڭ ورىنباسارى اندرەي رۋدەنكومەن, سىرتقى ىستەر مينيسترلىگىنىڭ ازيا-تىنىق مۇحيتى ىنتىماقتاستىعى ديرەكتورى الەكسەي وۆچيننيكوۆپەن كەزدەستى. ەكىجاقتى اڭگىمە بارىسىندا VI سامميت كەزىندە قابىلدانعان شەشىمگە سايكەس اوسشك ترانسفورماتسيالاۋ جۇمىسىن جۇزەگە اسىرۋ جولدارى, ونىڭ كەلەشەگى جانە كەزەڭدەرى ەگجەي-تەگجەي تالقىلاندى. كەزدەسۋدە اوسشك-ءنىڭ زاماناۋي گەوساياسي ورتاداعى بىرەگەي رولىنە ەرەكشە ءمان بەرىلدى. سونىمەن قاتار يكەمدى كوزقاراسى دا ەرەكشە اتاپ ءوتىلدى.
تاراپتار جۇزەگە اسىرىلاتىن رەفورمالارعا قاتىستى كوزقاراسى مەن ۇستانىمى ورتاق ەكەنىنە نازار اۋدارىپ, جۇرگىزىلىپ جاتقان جۇمىستارعا كوڭىلى تولاتىنىن جەتكىزدى. اوسشك-ءنىڭ بيىلعا جوسپارلانعان ءىس-شارالارى تالقىلاندى. اتاپ ايتقاندا, استانادا وتەتىن ۆولونتەرلىك قوزعالىس ماسەلەلەرىنە ارنالعان اوسشك جاستار كەڭەسىنىڭ وتىرىسى تالقىلاندى. سونداي-اق كەڭەستىڭ قورشاعان ورتانى قورعاۋ ماسەلەلەرى بويىنشا مينيسترلەر كەزدەسۋىنە دايىندىق بارىسى ءسوز بولدى. بۇدان بولەك, 2024 جىلدىڭ ەكىنشى جارتىسىندا وتەتىن ىسكەرلىك كەڭەس پەن بيزنەس فورۋمنىڭ وتىرىستارى اڭگىمە ارقاۋىنا اينالدى. اوسشك اياسىنداعى ءوزارا ءىس-قيمىلدىڭ باسقا دا وزەكتى ماسەلەلەرى قوزعالدى.
رەسەي سىرتقى ىستەر ءمينيسترىنىڭ ورىنباسارى الەكساندر پانكينمەن كەزدەسۋدە كەڭەس پەرسپەكتيۆالارى تالقىلاندى. ەۋرازيا قۇرلىعىنداعى كوپجاقتى مەحانيزمدەر مەن حالىقارالىق ۇيىمداردىڭ ءوزارا ارەكەتتەسۋىنىڭ قالىپتاسىپ كەلە جاتقان جەلىلىك قۇرىلىمى ءسوز بولدى. تاراپتار اوسشك-ءنىڭ ءوزارا بايلانىستى دامىتۋداعى ماڭىزدى ءرولى, سونىڭ ىشىندە ەكونوميكالىق, تەحنولوگيالىق, گۋمانيتارلىق, مادەني جانە باسقا دا بايلانىستاردى نىعايتۋداعى ورنىنا نازار اۋداردى.
باس حاتشى رەسەي سىرتقى ىستەر ءمينيسترىنىڭ ورىنباسارى ميحايل بوگدانوۆپەن كەزدەسۋىندە باتىس ازيا ايماعىنداعى احۋالدى تالقىلاپ, قاقتىعىستى باسەڭدەتۋ جانە تۇراقتىلىق كەلىسىمىنە قول جەتكىزۋ ءۇشىن مۇددەلى تاراپتار اراسىندا ديالوگ ورناتۋداعى اوسشك الەۋەتىن تالقىلادى.
رەسەي سىرتقى ىستەر مينيسترلىگى ەكىنشى ازيا دەپارتامەنتىنىڭ ديرەكتورى, رەسەي پرەزيدەنتىنىڭ اۋعانستان بويىنشا ارنايى وكىلى زامير كابۋلوۆپەن اڭگىمە بارىسىندا كەڭەسكە مۇشە مەملەكەت اۋعانستاندى حالىقارالىق قاتىناستار جۇيەسىنە قايتارۋ باعىتىندا پىكىر الماستى. ۇيىمنىڭ وسى ەلگە كومەكتەسۋ جونىندەگى حالىقارالىق كۇش-جىگەرگە ۇلەسى ايتىلدى.
ق.سارىباي سونداي-اق اوسشك تالداۋ ورتالىقتارى فورۋمىندا رەسەي اتىنان وكىلدىك ەتەتىن حالىقارالىق قاتىناستار جونىندەگى ماسكەۋ مەملەكەتتىك ينستيتۋتىنىڭ جانىنداعى قىتاي, شىعىس ازيا جانە شىۇ ورتالىعىنىڭ ديرەكتورى الەكساندر لۋكينمەن كەزدەستى. ۇيىمنىڭ مۇشە-مەملەكەتتەرىن عىلىمي-تالدامالىق قامتاماسىز ەتۋ ماقساتىندا تۇراقتى ءوزارا ءىس-قيمىل الاڭىن بەلسەندىرۋ بويىنشا ناقتى شارالار مەن باستامالار تالقىلاندى.
ساپار بارىسىندا اوسشك باس حاتشىسى «شاعىن جانە ورتا كاسىپكەرلىكتى دامىتۋ جونىندەگى فەدەرالدىق كورپوراتسياسى» اق باس ديرەكتورىنىڭ ورىنباسارى نيكيتا بانسەكين جانە وسى ۇيىمنىڭ حالىقارالىق قىزمەت ديرەكتسياسىنىڭ باسشىسى, اوسشك ىسكەرلىك باسقارما توراعاسىنىڭ ورىنباسارى پاۆەل كوندراشوۆپەن كەزدەستى. وتىرىس بارىسىندا اوسشك ىسكەرلىك كەڭەسى قىزمەتىنىڭ ءارتۇرلى اسپەكتىلەرى, سەسسياارالىق كەزەڭدەگى قىزمەتىنىڭ مازمۇنى, ۇيىم ەلدەرىندەگى شاعىن جانە ورتا بيزنەس وكىلدەرىنىڭ حالىقارالىق ىنتىماقتاستىعىن قولداۋعا باعىتتالعان جاڭا باستامالار قوزعالدى.
باس حاتشى ق.سارىباي رەسەيدەگى جەتەكشى بۇقارالىق اقپارات قۇرالىنىڭ ءبىرى «روسسيسكايا گازەتا» باسىلىمىنا كەڭ كولەمدە سۇحبات بەردى.
