ۇكىمەت باسشىسىنىڭ توراعالىعىمەن ءوتىپ, ەلىمىزدىڭ سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسى تالقىلانعان وتىرىسقا سەلەكتورلىق رەجىمدە قاتىسقان وبلىس اكىمى نۇرلىبەك نالىباەۆ ايماقتاعى سۋارمالى سۋدى ۇنەمدەۋ جۇمىستارىنىڭ بارىسىن باياندادى.
كۇرىشتىك القاپتاردىڭ 12%-عا ازايۋىنا بايلانىستى اۋىل شارۋاشىلىعى قۇرىلىمدارى اراسىندا تۇسىندىرمە جۇمىستارى جۇرگىزىلدى. ەگىستىكتى ءارتاراپتاندىرۋدان بولەك اتىزدار لازەرلىك تەگىستەلىپ جاتىر. بۇگىندە وڭىردەگى كۇرىش القاپتارىنىڭ 55 پايىزى تەگىستەلىپتى. بيىل بۇل كورسەتكىشتى 68 پايىزعا جەتكىزۋ مەجەلەنىپ وتىر. شارۋالارعا سۋ بولەتىن مەكەمەلەر وكىلدەرىنىڭ ءجيى ايتاتىن ماسەلەسى وسى لازەرلىك تەگىستەۋ بولاتىن. تاجىريبە وسى ارقىلى سۋدى 15 پايىزعا دەيىن ۇنەمدەۋگە بولاتىنىن كورسەتىپ وتىر.
وبلىستا كۇرىشتىڭ قىسقا مەرزىمدە ءپىسىپ-جەتىلەتىن, ونىمدىلىگى جوعارى جاڭا سۇرىپتارىن وندىرىسكە ەنگىزۋ جالعاسىپ جاتىر. قازىر جەرگىلىكتى ماماندار ۋكراينا عالىمدارىمەن بىرلەسىپ «ۆيكونت», «پرەميۋم», «مارشال» سۇرىپتارى ءوڭىر كليماتىنا بەيىمدەپ اۋدانداستىرۋ ۇستىندە. بىلتىر 71 گەكتار جەرگە ەگىلگەن رەسەيلىك «ياحونت», «پاتريوت» سۇرىپتارى جاقسى ناتيجە كورسەتتى. جەرگىلىكتى تۇقىمعا قاراعاندا 10-15 كۇن ەرتە ءپىسىپ, سۋدى از قاجەت ەتەتىن بۇل سۇرىپتاردىڭ ونىمدىلىگى دە جوعارى ەكەن.
وبلىستاعى ەگىستىك القاپتىڭ 60 پايىزىن سۋلاندىراتىن سول جاعا ماگيسترالدى كانالىندا سۋدى ءبولۋ جانە ەسەپكە الۋدى اۆتوماتتاندىرۋ جۇمىستارى باستالدى. بۇگىندە اۋستراليالىق «Rubicon Water» كومپانياسىنىڭ تاجىريبەسىن ەنگىزۋ ءۇشىن جوبا-سمەتالىق قۇجاتتار ازىرلەنىپ جاتىر. جاڭا تەحنولوگيا ارقىلى كوكونىس, باقشا, كارتوپ, مال ازىقتىق جانە جۇگەرى داقىلدارى ەگىلەتىن القاپتاردى ۇلعايتۋعا بولادى. جالپى, بۇل باعىتتا بيىلدان باستاپ 5 جوبا جۇزەگە اسىرىلىپ, تولىق قۋاتىنا جەتكەندە 9 مىڭ گەكتاردى قامتيدى.
شيەلى اۋدانىندا كاسىپكەرلەر قىتايلىق «بو يان» كومپانياسىمەن بىرلەسىپ, 3 مىڭ گەكتارعا تامشىلاتىپ سۋارۋ ادىسىمەن جۇگەرى ءوسىرۋ جوباسىن باستادى. جالپى, وبلىستا 2030 جىلعا دەيىن سۋ ۇنەمدەۋ تەحنولوگيالارىن قولدانۋ اياسىن 50 مىڭ گەكتارعا دەيىن ۇلعايتۋ جوسپارلانىپ وتىر.
وبلىستىق تابيعي رەسۋرستار جانە تابيعات پايدالانۋدى رەتتەۋ, اۋىل شارۋاشىلىعى جانە جەر قاتىناستارى باسقارمالارى «قازسۋشار» مەكەمەسىنىڭ قىزىلوردا فيليالىمەن بىرلەسىپ, سالالىق مينيسترلىكپەن سۋ سالاسىن دامىتۋدىڭ 2024-2026 جىلدارعا ارنالعان كەشەندى جوسپارى جوباسىنا ايماقتاعى سۋ شارۋاشىلىعى ماسەلەلەرىن ەنگىزۋدى پىسىقتايدى.
سونداي-اق بيىلدان باستاپ ەلىمىز توراعالىق ەتەتىن حالىقارالىق ارالدى قۇتقارۋ قورى اتقارۋشى كوميتەتىنىڭ وتىرىسىن وڭىردە وتكىزۋ ويلاستىرىلىپ جاتىر.
قىزىلوردا
