«ۇيقىم كەلمەيدى» باعدارلاماسىنا قوناق بولعان كومپوزيتور حالىق ارتىسىنە ارناپ, «ماڭگىلىك ماحابباتىم» دەگەن ءان شىعارعانىن دا مالىمدەدى.
«مەن شىن عاشىق بولسام, ۇرىپ-جىعاتىن قاسيەتىم بار. ءازىل-شىنى ارالاس, ماقپالعا عاشىق بولعانىم راس. قۋىرشاقتاي قىز ەدى. وسىدان 33 جىل بۇرىن «ماڭگىلىك ماحابباتىم» دەگەن ءاندى ءابدىراحمان اسىلبەككە جازدىردىم. 21 جاستاعى ماقپال سول ءاندى ورىنداعان. قىز كۇنىندە سالماعى 25 كەلىگە دە جەتپەيتىن. الاقانعا سالىپ, كوتەرىپ تۇرۋعا كەلەتىن, شىناشاقتاي قىز ەدى. بىراق جۇرەگى كەڭ, ونەرگە تازالىعى كورىنىپ تۇراتىن. «گۇلدەردە»دۇركىرەپ تۇرعان كەزىندە ۇناتقانىم بار. بىراق جۇرەكتى عاشىق بولدىم دەپ بولە المايسىڭ. زامانبەك نۇرقادىلوۆكە تۇرمىسقا شىققان سوڭ, جەڭگە دەدىم. قازىر اعامىزدىڭ كوزى كەتكەن سوڭ, ول مەنى «اعا» دەپ ءجۇر», دەپ ازىلدەدى كومپوزيتور.
سونداي-اق حالىق ءارتىسى دە بۇل ءسوزدى راستاپ, جاستىق شاعىن ەسكە العان ەدى.
«ەرتەرەكتە, 20 جاسار كەزىمىزدە التىنبەك اعام ءان ۇسىنعان ەدى. «مەن ساعان عاشىقپىن» دەپ سول كەزدە ايتاتىن. بىراق جەڭگەمىزدەن قورىقتى ما, جاقىنداي العان جوق. سىرتتاي عاشىقپىن دەپ جۇرەتىن. سول كەزدە «ماڭگىلىك ماحابباتىم» دەگەن ءاندى ساعان ارنادىم دەپ الىپ كەلگەنى ەسىمدە. قازىر جەڭگەمىز قىزعانبايتىن شىعار دەپ ويلايمىن. مەن 60-قا كەلدىم, ول كىسى 75-كە كەلدى», دەپ كۇلدى ماقپال ءجۇنىسوۆا.
