كەزدەسۋدە مەملەكەتتىك ورگاندار ستارتاپتارعا قانداي ناقتى قولداۋ كورسەتىلەتىنىن ءتۇسىندىردى. اسىرەسە ساپالى دەرەكتەرگە قولجەتىمدىلىكتى كەڭەيتۋ ماسەلەسىنە باسىمدىق بەرىلىپ وتىر.
جاساندى ينتەللەكت جانە تسيفرلىق دامۋ ۆيتسە-ءمينيسترى دميتري مۋننىڭ ايتۋىنشا, بۇل باستامانىڭ باستى ماقساتى – مەملەكەتتىك دەرەكتەرگە قولجەتىمدىلىكتى بارىنشا جەڭىلدەتۋ. ەندى ازىرلەۋشىلەر دايىن مالىمەتتەرمەن شەكتەلمەي, ءوز جوباسىنا قاجەت ناقتى دەرەكتەردى دە سۇراتا الادى. ەگەر جاساندى ينتەللەكت مودەلىن وقىتۋعا بەلگىلى ءبىر اقپارات جەتىسپەسە, ءتيىستى ءوتىنىم بەرىپ, قاجەتتى دەرەكتەردى الۋعا مۇمكىندىك بار. وسىلايشا, بۇل مۇمكىندىك جاڭا تەحنولوگيالىق شەشىمدەردىڭ پايدا بولۋىنا جانە ستارتاپتاردىڭ جۇمىسىن جەدەلدەتۋگە جول اشادى.
بۇل باعىتتاعى نەگىزگى الاڭنىڭ ءبىرى – «Ashyq Data» پورتالى. مينيسترلىك پەن «ۇلتتىق اقپاراتتىق تەحنولوگيالار» اق بىرلەسىپ ىسكە قوسقان پلاتفورمادا ءتۇرلى سالانى قامتيتىن ەكى جۇزگە جۋىق دەرەك جيىنتىعى بار. ونىڭ ىشىندە بۇرىن جاريالانباعان بىرەگەي مالىمەت تە جيناقتالعان. دەرەكتەر اپتا سايىن جاڭارتىلىپ, پايدالانۋشىلارعا تەگىن ۇسىنىلادى. پورتال 120-دان استام مەملەكەتتىك اقپاراتتىق جۇيەنى بىرىكتىرىپ, ازىرلەۋشىلەرگە قاجەتتى اقپاراتتى ءبىر جەردەن الۋعا مۇمكىندىك بەرەدى.
الايدا جاساندى ينتەللەكت جۇيەسىن جاساۋ تەك دەرەكتەرمەن شەكتەلمەيدى. ونى وڭدەپ, تالدايتىن ەسەپتەۋ قۋاتى دا قاجەت. وسى باعىتتا ازىرلەۋشىلەرگە ارنالعان «AlemLLM» پلاتفورماسى تانىستىرىلدى. بۇل قىزمەت ارقىلى كومپانيالار نەيروجەلىلەردى وقىتۋعا قاجەتتى رەسۋرستارعا ارنايى ءوتىنىم بەرۋ ارقىلى قول جەتكىزە الادى. ياعني ستارتاپتار كۇردەلى ينفراقۇرىلىم ىزدەپ اۋرە بولماي, ءوز جوباسىن تەزىرەك ىسكە قوسا الادى.
تسيفرلىق ۇكىمەتتى قولداۋ ورتالىعىنىڭ باس ديرەكتورى ءاليا وسپانوۆانىڭ ايتۋىنشا, ارنايى ارحيتەكتۋرالىق پورتال ارقىلى مەملەكەتتىك ورگانداردىڭ IT-جوسپارلارى اشىق جاريالانعان. ەندى كومپانيالار قاي سالادا قانداي دەرەكتەر بارىن, قاي باعىتتا تسيفرلاندىرۋ قاجەت ەكەنىن كورە الادى. بۇل بيزنەسكە ناقتى سۇرانىستى ءتۇسىنىپ, سوعان ساي تەحنولوگيالىق شەشىمدەر ۇسىنۋعا مۇمكىندىك بەرەدى.
مۇنداي اشىقتىق IT-نارىققا دا ءتيىمدى. ويتكەنى ازىرلەۋشىلەر ەندى مەملەكەتكە نە قاجەت ەكەنىن سىرتتاي بولجاۋمەن شەكتەلمەيدى. كەرىسىنشە, ناقتى سۇرانىسقا ساي ءونىم ازىرلەۋگە بەيىمدەلەدى. بۇل ءبىر جاعىنان مەملەكەتتىك ورگاندار مەن تەحنولوگيالىق ورتا اراسىنداعى بايلانىستى كۇشەيتسە, ەكىنشى جاعىنان جاڭا تسيفرلىق شەشىمدەردىڭ تەزىرەك پايدا بولۋىنا جول اشادى.
جيىن سوڭىندا IT-بيزنەس وكىلدەرى دەرەكتەردى الۋ جولدارى, تەحنيكالىق تەتىكتەر جانە بىرلەسكەن قاناتقاقتى جوبالاردى ىسكە قوسۋ ماسەلەلەرى جونىندە ساۋالدارىن قويدى. سپيكەرلەر مۇنداي اشىق ديالوگ الداعى ۋاقىتتا دا جالعاساتىنىن ايتتى. بۇل باستاما مەملەكەت پەن تەحنولوگيالىق نارىق اراسىنداعى بايلانىستى نىعايتىپ, يدەيادان دايىن جاساندى ينتەللەكت ونىمىنە دەيىنگى جولدى قىسقارتۋعا ىقپال ەتپەك.
