فوتو: ەۇۋ ءباسپاسوز قىزمەتى
«Rixos President Astana» قوناق ۇيىندە ەۇۋ كافەدراسىنىڭ ەكىنشى فيليالى اشىلدى. وندا ەۋرازيا ۇلتتىق ۋنيۆەرسيتەتىنىڭ الەۋمەتتانۋشىلارى بيزنەس ءۇشىن زەرتتەۋلەر جۇرگىزەدى, بىرلەسكەن عىلىمي جوبالار جاسايدى, سونداي-اق ءبىلىم الۋشىلارعا تاجىريبەلىك جانە تەوريالىق دارىستەر وتكىزىلەدى.
«بيزنەستىڭ ءبىلىم مەن عىلىمعا دەگەن قىزىعۋشىلىعى ارتىپ كەلەدى. سەرىكتەستەرىمىزدىڭ باستاماسىمەن ۇيىمداستىرىلعان كافەدرا فيليالىنىڭ اشىلۋى وسىنى دالەلدەيدى. بىرنەشە جىل بۇرىن «Rixos President Astana» قوناق ۇيىندە ۋنيۆەرسيتەتىمىزدىڭ «تۋريزم» كافەدراسى فيليالى ىسكە قوسىلدى. بۇگىنگى تاڭدا كوپتەگەن ستۋدەنتتەرىمىز «Rixos» قوناق ۇيلەرىندە تاجىريبەدەن وتۋدە, ال ۇزدىك تۇلەكتەر قوناق ءۇي بيزنەسىندە باسشىلىق قىزمەت اتقارادى. وسىلايشا ءبىز جۇمىس بەرۋشىلەرمەن تىعىز ىنتىماقتاستىق ورناتامىز. بۇگىنگى تاڭدا ەلىمىزدىڭ تۇكپىر-تۇكپىرىندەگى وندىرىستىك ورتالىقتاردا ەۇۋ كافەدرالارىنىڭ 74 فيليالى جۇمىس ىستەيدى», دەدى ل.ن.گۋميلەۆ اتىنداعى ەۇۋ رەكتورى ەرلان سىدىقوۆ.
ەۇۋ كافەدراسى فيليالىنىڭ اشىلۋ سالتاناتىنا ۋنيۆەرسيتەت پەن قوناق ءۇي وكىلدەرى, جاس عالىمدار, وقىتۋشىلار مەن ستۋدەنتتەر قاتىستى. ءوز كەزەگىندە «Rixos President Astana» باس مەنەدجەرى تانسەل تەردجان قوناقجايلىق يندۋسترياسىن دامىتۋدىڭ ماڭىزدىلىعىنا توقتالدى.
«قوناقجايلىلىق يندۋسترياسى ادام رەسۋرستارىمەن قامتاماسىز ەتىلۋى كەرەك. قازىر «human to human» قىزمەتى بۇكىل الەمدە ماڭىزدى. مەن وسى سالاداعى بىرنەشە ماسەلەنى انىقتادىم. سوندىقتان ءبىز ەۇۋ-مەن ىنتىماقتاستىقتى 2017 جىلى باستادىق. وسى ۋاقىت ىشىندە ءبىزدىڭ سەرىكتەستىگىمىز نىعايا ءتۇستى. «Rixos» قوناق ۇيلەر جەلىسىندە ەۇۋ ستۋدەنتتەرى وزدەرىن ەركىن, ءوز ۋنيۆەرسيتەتىندە جۇرگەندەي سەزىنەدى. ءبىز ءوزارا ءتيىمدى ىنتىماقتاستىق ورناتتىق جانە ورتاق ماقسات – ەل ەكونوميكاسى ءۇشىن كاسىبي كادرلاردى دايارلاۋ», دەدى ول.
الەۋمەتتىك عىلىمدار فاكۋلتەتىنىڭ دوكتورانتى جۇلدىز كارىم كافەدرا فيليالى دوكتورانتتاردىڭ اكادەميالىق داعدىلارىن شىڭداۋعا كومەكتەسەتىن جانە عىلىمي ءوسۋ ءۇشىن جاڭا مۇمكىندىكتەر بەرەتىن الاڭعا اينالاتىنىن اتاپ ءوتتى.
«كافەدرامىزدىڭ تاعى ءبىر فيليالى اشىلىپ, دوكتورانتتاردىڭ ءبىلىمىن, كاسىبي جانە اكادەميالىق بىلىكتىلىگىن ارتتىرۋعا مۇمكىندىك ارتتى. بۇل باستاما شەتەلدىك ارىپتەستەرىمىزبەن جانە عىلىمي-زەرتتەۋ كەڭىستىگىمىزبەن ىنتىماقتاستىقتى ارتتىرۋعا كومەكتەسەدى», دەيدى جاس عالىم.
ايتا كەتەيىك, ەۇۋ-دىڭ الەۋمەتتىك عىلىمدار فاكۋلتەتىندە ەكى مىڭنان استام ستۋدەنت ءبىلىم الىپ جاتىر.
