«مەنىڭ ءومىرىم» باعدارلاماسىنا سۇحبات بەرگەن رەجيسسەر-ستسەناريست الدىمەن بۇل ماماندىقتى ينتەرنەتتەن مەڭگەرگەنىن جاسىرمادى.
- قۇداي ماعان كينو تۇسىرە الاتىن تالانت بەرىپتى. العاش رەت كينو ءتۇسىرۋ ءۇشىن قاراجاتىم بولمادى. ءۇيىمدى كەپىلگە قويىپ, نەسيە العانمىن. ايەلىم قاتتى قورىقتى. سودان كەيىن مەنىڭ اتىما ەشقانداي جىلجىمايتىن م ۇلىك جازبايتىن بولدى. نەسيە العاننان سوڭ ەندى نە بولارىن مۇلدە بىلمەدىم. ءسويتىپ ءجۇرىپ «جارالى سەزىم» ءفيلمىن تۇسىردىك. جوبانى اياقتاعاننان كەيىن اقشاسىن شىعارىپ الۋدى ويلامادىم. باستى ارمانىم مەن ماقساتىم – رەجيسسەر بولۋ. جالپى, ءوزىم ەلگە بەلگىلى ادامدارمەن وتە كوپ ارالاسقانمىن. سونداي جانداردىڭ ءبىرى – سول كەزدەگى قالا اكىمى بولعان يمانعالي تاسماعامبەتوۆ, - دەدى ەركىن راقىشەۆ.
ول ەكس-شەنەۋنىكتىڭ «جارالى سەزىم» ءفيلمىنىڭ شىعۋىنا قوسقان ۇلەسى زور ەكەنىن اتاپ ءوتتى. كينو ءتۇسىرۋ ءۇشىن ءۇيىن جالعا الۋعا رۇقسات ەتكەن.
- ودان كەيىن ءفيلمنىڭ تۇساۋكەسەرىن جاساعاندا 300 دوللار بەرگەنى ەسىمدە. ءبىر كۇنى تۇساۋكەسەرگە كەرەك قۇرال-جابدىقتارىن الىپ كەلگەن جىگىت: «مىنا ءفيلمدى ءبىزدىڭ كينوتەاتردا كورسەتەيىك, كۇنىنە ءبىر ادامنان 100 تەڭگە بەرىپ وتىرامىن» دەپ ۇسىنىس تاستادى, مەن باسىندا تۇسىنبەي, ارتىنان كەلىستىم. ءبىرىنشى كۇنى كينوعا 7 ادام كەلدى, مەن 700 تەڭگە الدىم. ويلانسام, بيلەت قۇنى 800 تەڭگە, مەنىڭ الاتىنىم 100 تەڭگە, ەكىنشى كۇنى 25, ءۇشىنشى كۇنى 30 ادام كەلدى. كينونى مەن تۇسىرەمىن, بىراق پايدانىڭ كوپ بولىگىن باسقا ادام الادى. بۇل دۇرىس ەمەس قوي دەپ ويلانىپ, جاڭاعى جىگىتپەن سويلەسىپ, 50/50-گە ءبولىپ, اقشامدى شىعارىپ الدىم. سول كەزدە رەجيسسەر بولامىن دەپ تۇبەگەيلى شەشىم قابىلدادىم, – دەيدى اۋەسقوي رەجيسسەر.
