كۇمىس كۇلكىسى سىڭعىرلاعان جاس وسكىندەر مەن عۇمىرىن ءبىلىم جولىنا ارناپ كەلە جاتقان ۇستازدار قاۋىمى, اتا-انالار قۋانىشتى ساتكە كوزايىم بولىپ, مەكتەپتىڭ اشىلۋ سالتاناتىن اسقاق كوڭىلمەن وتكەردى. جەتىسۋلىق زيالى قاۋىم, ەل جاقسىلارى مەن شاھار تۇرعىندارى قاتىسقان №30 ورتا مەكتەپتىڭ اشىلۋ سالتاناتىندا وبلىستىق ءبىلىم باسقارماسىنىڭ باسشىسى مارات سۇلەيمەنوۆ مەملەكەت باسشىسى وسكەلەڭ ۇرپاقتىڭ تەرەڭ ءبىلىم, ءتالىمدى تاربيە الۋىنا بارلىق جاعداي جاساۋدى مىندەتتەگەنىن اتاپ ءوتتى. «سوعان وراي ەلىمىزدە, سونىڭ ىشىندە وڭىرىمىزدە ءبىلىم سالاسىن دامىتۋعا بارىنشا قولداۋ كورسەتىلىپ كەلەدى. «جايلى مەكتەپ» ۇلتتىق جوباسى اياسىندا وبلىستا 7 مەكتەپ, سونىڭ 3-ءى تالدىقورعان قالاسىندا سالىنادى. سول سياقتى وتكەن جىلى 10 ءبىلىم نىسانىنىڭ قۇرىلىسىن اياقتاۋ جوسپارلانعان ەدى. سونىڭ ءبىرى – ىنتىماق اۋىلىنداعى بۇگىن ەسىگىن ايقارا اشىپ وتىرعان 1200 ورىندىق ءبىلىم ورداسى», دەدى م.سۇلەيمەنوۆ.
بۇگىندە مەكتەپكە 661 وقۋشى قابىلداندى, 31 سىنىپ كەشەنى اشىلدى. ونىڭ ىشىندە وتەناي اۋىلىنداعى №21 ورتا مەكتەپتەن 13 سىنىپ, 345 وقۋشى كوشىپ كەلگەن. ولار جەتەكشىسىمەن جاڭا مەكتەپكە بىرگە اۋىسىپ, وقۋشىلاردى تاسىمالداۋ ماسەلەسى شەشىلدى. سونىمەن قاتار پەداگوگتەرگە 30 بوس ورىن جانە 20 كىشى قىزمەتكەرگە كونكۋرس جاريالانىپ, قابىلداۋ ءجۇرىپ جاتىر.
ارداگەر ۇستاز مينۋار بايمولدانوۆا دا ىزگى تىلەگىن ارنادى. كەلەسى كەزەكتە مەكتەپ قۇرىلىسىنا جاۋاپتى مەردىگەر كومپانيا «گۋنن ستروي سەرۆيس» كومپانياسىنىڭ باس ديرەكتورى ءسابيت قاليمولداەۆ جاڭا نىساننىڭ كىلتىن مەكتەپ ديرەكتورى ساۋلە ۇسەنوۆاعا تابىس ەتتى. ءان اسقاقتاپ, بي بيلەنگەن ءىس-شارا بارىسىندا مەكتەپ لەنتاسىن وبلىستىڭ باس ۇستازى م.سۇلەيمەنوۆ پەن ارداگەر ۇستاز م.بايمولدانوۆا قيدى.
جاڭادان اشىلعان مەكتەپ زاماناۋي تالاپقا ساي جابدىقتالعان. وقۋشىلاردىڭ ساپالى ءبىلىم الۋىنا بارلىق مۇمكىندىك جاسالعان. مەكتەپتە 50 ورىندى وقۋ زالىمەن كىتاپحانا, سپورت زال, گيمناستيكالىق زال, 405 ورىندىق اسحانا, 390 ورىندىق ءماجىلىس زالى, فيزيكا, حيميا, بيولوگيا جاڭا موديفيكاتسيالىق كابينەتتەرى, 4 مۋلتيمەديالىق كابينەت, ۇلدار مەن قىزدار شەبەرحانالارى بار. سونىمەن قاتار ءپان كابينەتتەرىنىڭ بارلىعى قاجەتتى ادىستەمەلىك, تەحنيكالىق قۇرالمەن جابدىقتالعان.
جەتىسۋ وبلىسى
