رەسمي دەرەككە سايكەس, بىلتىر ەلىمىزدە 36 مىڭ جول-كولىك وقيعاسى بولعان. سالدارىنان 51 مىڭ ادام جاراقات الىپ, 2330-2331 ادام قازا تاپقان. مۇنداي ادام شىعىنى ءتىپتى سوعىس جاعدايىندا دا تىركەلە بەرمەيدى. سوراقىسى سول, بۇل كورسەتكىش جىل سايىن كوبەيمەسە, ازايماي وتىر. سوندىقتان جول قاۋىپسىزدىك شارالارىن كۇشەيتۋ كۇن تارتىبىنەن تۇسپەك ەمەس. وسى رەتتە, اباي وبلىسى پوليتسيا دەپارتامەنتى ماماندارىنا قىزمەتتىك اۆتوكولىكتەردىڭ كىلتى تاپسىرىلدى. ءىس-شاراعا وبلىس اكىمى بەرىك ءۋالي, پوليتسيا دەپارتامەنتىنىڭ باستىعى ەلدار دانياروۆ قاتىستى.
بىلتىر جەرگىلىكتى اتقارۋشى ورگاندار تاراپىنان پوليتسيا دەپارتامەنتىنىڭ ماتەريالدىق-تەحنيكالىق بازاسىن نىعايتۋعا, ارنايى تەحنيكالىق قۇرالدار ساتىپ الۋعا ءتيىستى قاراجات بولىنگەن. سول جۇمىستىڭ جالعاسى رەتىندە بيىل پوليتسيا قىزمەتىنە KIA «Cerato», «Elantra», JAC, «Cobalt» ماركىلى 137 جاڭا اۆتوكولىك بەرىلدى. كولىكتەردىڭ اراسىندا 8 اۆتوبۋس بار.
سالتاناتتى ءىس-شارادا ءوڭىر باسشىسى تابىستالعان تەحنيكالار پوليتسيا قىزمەتىن جاڭعىرتۋ, قىزمەتكەرلەرگە قولايلى جاعداي جاساۋ, جول قاۋىپسىزدىگى باعىتىنداعى كەشەندى جۇمىستىڭ ءبىر بولىگى ەكەنىن ايتتى.
«مەملەكەت باسشىسى قاسىم-جومارت توقاەۆ «ادىلدىك يدەياسى ۇستەمدىك قۇرعان قوعامدا پوليتسيا قىزمەتكەرلەرىنە جوعارى تالاپ قويىلىپ, زور جاۋاپكەرشىلىك جۇكتەلەدى. ءاربىر ءتارتىپ ساقشىسىنىڭ قىزمەتىن ءمىنسىز اتقارىپ, بىلىكتى مامان, وتانشىل ازامات بولۋى وتە ماڭىزدى», دەپ وزدەرىڭىزدىڭ تاباندى ەڭبەكتەرىڭىزدى ەرەكشە اتاپ ءوتتى. پوليتسيانىڭ قىزمەتىن قولداۋ, ولاردىڭ ماتەريالدىق-تەحنيكالىق بازاسىن ۇنەمى جەتىلدىرىپ, جاڭارتىپ وتىرۋ – زامان تالابى. وسىنى ەسكەرە وتىرىپ, بۇگىن وبلىس اكىمدىگى پوليتسيا دەپارتامەنتىنە 137 قىزمەتتىك اۆتوكولىكتى تاپسىرىپ وتىر. بۇل – تەك ماتەريالدىق-تەحنيكالىق بازانى جاڭارتۋ عانا ەمەس, سونىمەن قاتار قوعامدىق قاۋىپسىزدىكتى كۇشەيتۋگە, پوليتسيا جۇمىسىنىڭ جەدەلدىگىن جانە تيىمدىلىگىن ارتتىرۋعا باعىتتالعان قادام», دەدى وبلىس اكىمى.
اكىمنىڭ سوزىنشە, وڭىردە قۇقىق قورعاۋ ورگاندارىن ماتەريالدىق-تەحنيكالىق تۇرعىدا نىعايتۋ باعىتىندا جۇيەلى جۇمىس جۇرگىزىلىپ كەلەدى. ناتيجەسىندە, بيىلعى ءۇش ايدا وتكەن جىلدىڭ سايكەس كەزەڭىمەن سالىستىرعاندا قۇقىقبۇزۋشىلىق سانى 18 پايىزعا تومەندەدى. قوعامدىق ورىنداردا جاسالعان قۇقىقبۇزۋشىلىق 246-دان 184-كە ازايدى.
«قازىرگى جاعدايدا جەدەل ارەكەت ەتۋ, جاقسى جابدىقتالۋ جانە ۇيلەسىمدى جۇمىس ىستەۋ – ازاماتتاردىڭ قۇقىقتارىن قورعاۋدىڭ نەگىزگى كەپىلى. جاڭا تەحنيكالار ءتيىمدى پايدالانىلىپ, جۇمىستىڭ ساپاسىن ارتتىرىپ, ءوڭىر قاۋىپسىزدىگىنە قىزمەت ەتۋى كەرەك. سونىمەن قاتار وبلىس اكىمدىگى الداعى ۋاقىتتا وبلىس ورتالىعى مەن اۋدانداردا جەدەل باسقارۋ ورتالىقتارىن سالۋعا, راديوستانسالار مەن قوسىمشا اۆتوكولىكتەر الۋعا قاراجات ءبولۋدى جوسپارلاپ وتىر. بۇگىنگىدەي كوپ مولشەردەگى كولىك وبلىس تاريحىندا ءتارتىپ ساقشىلارىنا بەرىلگەن ەمەس. ءبىز مۇنىمەن شەكتەلمەي, الداعى ۋاقىتتا پوليتسيا دەپارتامەنتىنىڭ اۆتوپاركىن جاڭالاي بەرەتىن بولامىز», دەدى بەرىك ءۋالي.
كوشەدە قىزمەتتىك كولىك كوبەيگەننەن كەلەڭسىزدىك ساپ تىيىلادى دەۋ قيىن, ارينە. ويتكەنى جول قاۋىپسىزدىگى تەك ءتارتىپ ساقشىلارىنىڭ ەمەس, ءار جۇرگىزۋشىنىڭ جاۋاپكەرشىلىگى مەن جەكە مادەنيەتىنە قاتىستى ماسەلە.
اباي وبلىسى
