سۋرەتتەردى تۇسىرگەن – جۇماباي مۇسابەك
وسى ۋاقىتقا دەيىن جەتىسۋلىقتارعا استاناعا جەتۋ وڭايعا سوقپايتىن. كوپشىلىك الدىمەن الماتىعا قاتىناپ, ودان ءارى پويىزعا وتىرۋعا ءماجبۇر ەدى. بۇل قوسىمشا ۋاقىت پەن شىعىندى تالاپ ەتەتىن. ەندى جاڭا باعىتتىڭ ىسكە قوسىلۋىمەن جول قىسقارىپ, قاتىناس جەڭىلدەدى, ال تۇرعىنداردىڭ مۇمكىندىگى كەڭەيدى. سودان دا بولار كوپشىلىك پويىزدى ەرەكشە ىقىلاسپەن قارسى الدى.
سالتاناتتى ءىس-شارادا تالدىقورعان قالاسىنىڭ اكىمى ەرنات ءبازىل بۇل باستامانىڭ ماڭىزدىلىعىنا ايرىقشا توقتالدى.
«جاڭا تەمىرجول جەلىسى – كولىك ينفراقۇرىلىمىن جاقسارتۋ عانا ەمەس, سونىمەن بىرگە ايماقتىڭ ەكونوميكالىق الەۋەتىن ارتتىرىپ, ءتۋريزمنىڭ دامۋىنا سەرپىن بەرەتىن ماڭىزدى جوبا. بۇل – تۇرعىنداردىڭ تۇرمىس ساپاسىن ارتتىرىپ, ايماقتىڭ ينۆەستيتسيالىق تارتىمدىلىعىن كۇشەيتەتىن, بولاشاققا باستايتىن جارقىن جول. وسى يگىلىكتى ىسكە ۇلەس قوسقان پارلامەنت دەپۋتاتتارىنا, كولىك مينيسترلىگىنە جانە «قازاقستان تەمىرجولى» كومپانياسىنا العىس ايتامىز», دەدى ە.ءبازىل.
ودان بولەك, وسى يگىلىكتى ءىستىڭ باسى-قاسىندا جۇرگەن ءماجىلىس دەپۋتاتى ناۋرىز سايلاۋباي, تەمىرجول جانە سۋ كولىگى كوميتەتى توراعاسىنىڭ ورىنباسارى ەلدوس نەستاي, «جولاۋشىلار تاسىمالى» اق باسقارما توراعاسى ديار نۇسىپقوجانوۆ تا اقجارما تىلەگىن ارنادى.
«جاڭا باعىت تۇرعىنداردىڭ ءوتىنىشى نەگىزىندە قولعا الىندى. پويىزدار ازىرگە كۇنارا جۇرەدى, ءسويتىپ, ەلوردا مەن جەتىسۋ وبلىسى اراسىندا تۇراقتى ءارى ىڭعايلى قاتىناس جانداندى. جىلجىمالى قۇرامدى جاڭارتۋ مەن مارشرۋتتىق جەلىنى كەڭەيتۋ كولىك سالاسىنىڭ ستراتەگيالىق مىندەتتەرىن جۇزەگە اسىرۋداعى باسىم باعىتتاردىڭ ءبىرى بولىپ قالا بەرەدى», دەدى د.نۇسىپقوجانوۆ.
وبلىس اكىمى ءباسپاسوز قىزمەتىنىڭ مالىمەتىنشە, مۇندا جولاۋشىلاردىڭ جايلىلىعىنا ەرەكشە كوڭىل بولىنگەن. پويىز باعىتىندا كليماتتى باقىلاۋ, اۋانى زالالسىزداندىرۋ, بەينەباقىلاۋ جانە ءورت قاۋىپسىزدىگى جۇيەلەرىمەن جابدىقتالعان زاماناۋي «45» سەريالى (RWS Wagon) ۆاگوندار پايدالانىلادى جولاۋشىلار ءۇشىن Wi-Fi, USB پورتتارى, روزەتكالار, ىڭعايلى ۇيىقتايتىن ورىندار قاراستىرىلعان.
تالدىقورعان تۇرعىندارىنىڭ دا قۋانىشى ەرەكشە. ولار ەندى استاناعا ساپار شەگۋ الدەقايدا جەڭىل ءارى جايلى بولاتىنىن ايتادى. سولاردىڭ ءبىرى – بالقاش قالاسىنا بارۋعا بيلەت العان بەيبىت ارسامباەۆ پەن جۇماعۇل اقباەۆانىڭ وتباسى.
ء«بىز بالقاش قالاسىنا بارا جاتىرمىز, وندا نەمەرەلەرىمىز تۇرادى. بۇرىن ۇشتوبە قالاسىنا بارىپ پويىزعا وتىرىپ, اقتوعايدا «سەمەي – استانا» باعىتىنا قايتا مىنۋگە تۋرا كەلەتىن. ەندى بالقاشقا تىكەلەي بارا الامىز, سوعان وتە قۋانىشتىمىز. اسىرەسە ءبىز سياقتى زەينەتكەرلەرگە, جالپى بارلىق قارت ادامعا بۇل وتە ىڭعايلى. وسى باعىتتى ىسكە قوسۋعا اتسالىسقان بارشا جاندارعا العىسىمىزدى بىلدىرەمىز. الداعى ۋاقىتتا ەكى ۆاگون ەمەس, ءتورت-بەس ۆاگون بولسا دەيمىز», دەدى ولار.
جالپى, ساراپشىلار تەمىرجول قاتىناسىنىڭ ىسكە قوسىلۋى ءوڭىردىڭ دامۋىنا سەرپىن بەرىپ, ەكونوميكالىق بايلانىستاردى نىعايتىپ, جەتىسۋ وبلىسىنىڭ تۋريستىك تارتىمدىلىعىن ارتتىرادى دەپ سەنەدى.
ەسكە سالساق, «استانا–تالدىقورعان» تەمىرجول باعىتى كۇنارا قاتىناپ, ەلوردا مەن جەتىسۋ وبلىسى اراسىنداعى تۇراقتى بايلانىستى قامتاماسىز ەتەدى. استانادان ۆاگوندار №122/121 «نۇرلى جول – سەمەي» پويىزىنىڭ قۇرامىندا ءجۇرىپ, اقتوعاي ستانساسىندا №631/632 «اقتوعاي – تالدىقورعان» پويىزىنا تىركەلەدى, ودان ءارى تالدىقورعان ستانساسىنا دەيىن جالعاسادى.
«28 ساعات جول ءجۇرۋ ۇزاق ۋاقىت سەكىلدى كورىنگەنىمەن, بۇرىنعىداي اۋرە-سارساڭعا سالمايدى. ماسەلەن, مەن كەشە تاڭەرتەڭ پويىزعا وتىرىپ, بۇگىن تۇستە ۇيىمە جەتتىم. ەسەپتەپ قاراساق, «استانا – الماتى» باعىتىنا دا شامامەن سول ۋاقىت كەتەدى ەكەن. بۇعان قوسا, الماتىدان تالدىقورعانعا تاكسي تابۋ, كۇتۋ جانە جول ءجۇرۋ ۋاقىتىن قوسۋ كەرەك. ال مۇندا ەش قيىندىقسىز, جايلى جاعدايدا تۋعان قالاڭا جەتۋگە بولادى. بيلەت باعالارى دا ءتيىمدى: پلاتسكارت 16 مىڭ تەڭگە, كۋپە 21 مىڭ تەڭگە. قالتاعا سالماق سالمايدى», دەيدى جولاۋشى سەرىك بايتۇرعانوۆ.
استانادان («نۇرلى جول») جونەلتۋ – تاق كۇندەرى ساعات 06.32-دە, تالدىقورعانعا كەلۋ – 11.05-تە. قايتار باعىتتا تالدىقورعاننان جۇپ كۇندەرى ساعات 12.15-تە شىعىپ, استاناعا ساعات 19.30-دا جەتەدى. جول ءجۇرۋ ۋاقىتى – شامامەن 28 ساعات.
شىن مانىندە تەمىرجول – ەل دامۋىنىڭ كۇرەتامىرى. ول تەك جولاۋشى تاسىمالىن قامتاماسىز ەتىپ قويماي, وڭىرلەر اراسىنداعى بايلانىستى نىعايتادى, ساۋدا-ساتتىقتى جانداندىرادى, جاڭا جۇمىس ورىندارىنىڭ اشىلۋىنا ىقپال ەتەدى. اسىرەسە جەتىسۋ سەكىلدى الەۋەتى زور ءوڭىر ءۇشىن مۇنداي باعىتتاردىڭ ماڭىزى ۇلكەن. ەندى تالدىقورعان تەك وبلىس ورتالىعى عانا ەمەس, ءىرى كولىك توراپتارىنىڭ بىرىنە اينالۋعا قادام جاسادى.
جەتىسۋ وبلىسى
