حالىقارالىق اسكەري سپورت كەڭەسى (CISM) مەن ازەربايجان قورعانىس مينيسترلىگى ۇيىمداستىرعان جەكپە-جەكتەرگە 18 ەلدەن كەلگەن 300-دەن اسا سپورتشى قاتىستى. بىرىنشىلىك قورىتىندىسى بويىنشا قارۋلى كۇشتەردىڭ وكىلدەرى «التىن», «كۇمىس» جانە ەكى «قولا» ولجالادى.
قورعانىس ءمينيسترى گەنەرال-پولكوۆنيك رۋسلان جاقسىلىقوۆ سپورتتاعى جوعارى جەتىستىكتەرى ءۇشىن امانعالي بەكبولاتوۆتى «ەل قورعانى» ۆەدومستۆولىق مەدالىمەن ماراپاتتادى. ءساتتى جەكپە-جەك ونەرىن كورسەتكەندەرى ءۇشىن سپورتشىلاردى قۇتتىقتاپ, قۇرمەت گراموتالارىن تابىس ەتتى.
«سەندەردىڭ حالىقارالىق بىرىنشىلىكتەردەگى جەڭىستەرىڭ مەن جەتىستىكتەرىڭ – ەلدىڭ بەدەلىن كوتەرۋگە قوسقان ۇلەستەرىڭ. ارميا سپورتشىلارىنىڭ مىقتىلىعى اسكەرىمىزدىڭ مارتەبەسىن ارتتىرۋعا ىقپال ەتەرى ءسوزسىز», دەدى ول.
گرەك-ريم ستيلىندەگى كۇرەستەن اسكەري قىزمەتشىلەر اراسىندا وتكەن الەم چەمپيوناتىندا 55 كەلىگە دەيىنگى سالماقتا ارميا بالۋانى امانعالي بەكبولاتوۆقا تەڭ كەلەر ەشكىم بولعان جوق. ەركىن كۇرەستەن جارىستا 79 كەلىدە ەكىنشى ورىن ورتالىق سپورت كلۋبىنىڭ سپورتشىسى رۇستەم مىرزاعاليەۆقا بۇيىردى. قولا جۇلدە يەلەنگەندەر – مەيىرجان ءاشىروۆ (70 كەلى) پەن داۋلەت تەمىرجانوۆ (57 كەلى).
سپورتشىلار دا وسى مۇمكىندىكتى پايدالانىپ, قر قورعانىس مينيسترلىگى مەن قارۋلى كۇشتەردىڭ باسشىلىعىنا سپورتتى دامىتۋعا قولداۋ كورسەتكەنى ءۇشىن العىس ءبىلدىردى.
بۇگىنگى تاڭدا اسكەري سپورتشىلار ءتۇرلى دەڭگەيدەگى 140-تان استام ءىس-شاراعا قاتىستى. جىل باسىنان بەرى حالىقارالىق جانە رەسپۋبليكالىق جارىستاردا وسك سپورتشىلارى 340 مەدال ەنشىلەدى. جالپى سانى 171 التىن, 82 كۇمىس جانە 87 قولا مەدال الدى.
