سۋرەتتى تۇسىرگەن – جەڭىس ىسقاباي
«قازاقتىڭ ءان اۋەزدەرىنىڭ تاماشا ءبىر قاسيەتى — ونىڭ شىن جۇرەكتەن شىققان ەموتسيالىق سەزىمتالدىعى مەن سەزگىشتىگى». ونەرتانۋشى بوريس استافەۆتىڭ وسى ءبىر ويماقتاي ويىنا يلانباسقا بولماس. تاعدىر ارقالاپ جۇرگەن ءاربىر ادامنىڭ ونەردەن الار وزىندىك سەزىمى بولادى دەسەك, جالپى ادامزاتتىق ىڭكارلىكتىڭ نازىك پەرنەسىن بەبەۋلەتىپ جىبەرەتىن قۇدىرەتتى ونەردىڭ ءبىر پاراسىنا مۋزىكانى جاتقىزامىز. ال وسىناۋ ساز الەمىندەگى بيىكتىكتى وركەنيەت ورىنەن تابىلعان ەلدەر كلاسسيكالىق مۋزىكا دەپ بىلەتىنى داۋسىز.
كۇلدىر-كۇلدىر كىسىنەر تۇلپارمەن جانىن ۇندەس دەپ بىلەتىن, ءوزىن جىلقىتەكتى حالىقپىن دەپ سانايتىن قازاقتىڭ كلاسسيكالىق مۋزىكا ونەردەن العان ۇلەسى جوق ەمەس. كەشەگى عاسىردىڭ الىبى سانالعان م.تولەباەۆ باستاعان كومپوزيتورلار كلاسسيكالىق مۋزىكا تۇعىرىنا تۋ ءىلدى. وسىلاي دەپ وي تۇجىرىپ وتىرعانمەن تالدىقورعان تورىندە جاڭاشا لەپ ەسكەنىن بايقاعانداي كۇيگە بولەندىك. ويتكەنى وسى جىلدىڭ مامىر ايىندا جەتىسۋ وبلىسىنىڭ اكىمى بەيبىت يساباەۆتىڭ تىكەلەي قولداۋىمەن العاش رەت وبلىستىق فيلارمونيا جانىنان ەسترادالىق-سيمفونيالىق وركەستر قۇرىلعان-دى. وسى ءبىر قىسقا مەرزىم ىشىندە وزىندىك سۇرلەۋ-سوقپاق تاپقان ونەر ۇجىمى جەتىسۋلىقتارعا مۋزىكالىق كەش ۇسىندى.
قوس بولىمنەن تۋرعان رۋحاني شارا تىڭدارمانداردى ءتانتى ەتكەنى انىق. ەلىمىزگە تانىمال «قازاقستان كامەراتاسى» كلاسسيكالىق مۋزىكا ءانسامبلى, حالىق ءارتىسى گاۋھار مىرزابەكوۆا, قازاقستاننىڭ ەڭبەك سىڭىرگەن قايراتكەرى, پروفەسسور بەكبولات بايساعاتوۆ قوناق بولعان كەش كوڭىلدى كوكجيەكپەن استاستىرعانداي اسەر قالدىردى.
شىنىمەن دە, دانەش راقىشەۆ اتىنداعى وبلىستىق فيلارمونيانىڭ ەسترادالىق-سيمفونيالىق وركەسترى قۇرىلعالى ساز قورجىنىن تولىقتىرىپ, ونەرپازدارىنىڭ كاسىبي شەبەرلىكتەرىن شىڭداۋدا ۇلكەن جۇمىستار اتقارعانى كەش بارىسىندا كوزگە شالىندى. ارنايى كەلگەن قوناقتارمەن بىرلەسە ونەر كورسەتكەن وركەستر ەڭبەگىن تاماشالاۋعا جەتىسۋلىق زيالى قاۋىم وكىلدەرى مولىنان جينالعانىن دا ايتا كەتكەن ءجون. ايماق باسشىسىنىڭ ءوزى كورەرمەن قاتارىنان تابىلعان رۋحاني كەشتە «ۆرەمەنا گودا», «كونتسەرت دليا فلەيتى», «مەلوديا دليا فلەيتى», «سيمفونيا 29 فينال» «Happy new year», «ايتتىم سالەم قالامقاس», «Piece in jazz-rock», «Chi-mai», «Le lecon partticuliere», «You raise me up», «Vibaldiana», «Lay al your love on me», «كۇندەر-اي», «وتان تاڭى», «شۋتكا», «ۆالس» سىندى تانىمال مۋزىكا تۋىندىلارى ورىندالدى.
قازاق ساز الەمىندە ەسىمى ەرەكشە ىقىلاسپەن ايتىلاتىن ەلىمىزدەگى تۇلعالار مەن ءوڭىرىمىزدىڭ ماقتانىشتارى بىرلەسكەن كونتسەرت ونەرسۇيەر كوپشىلىكتى رۋحاني قازىنامەن كەنەلتكەن دە بولار دەپ پايىمدايمىز. سان اسپاپتان شىققان اسەم ۇنگە ەلتىگەن ءبىزدىڭ كوڭىل وسى پايىمعا ۇلاسىپ سالا بەرگەنى دە انىق. دەسە دە كومپوزيتور سەرىك ەركىمبەكتىڭ كونتسەرتكە ارنايى جازىلىپ, العاش رەت ءى.جانسۇگىروۆ اتىنداعى مادەنيەت سارايى ساحناسىندا ورىندالعان تاتتىمبەتتىڭ «سارجايلاۋ» كۇيىنىڭ تاقىرىبىنداعى jazz and rock اۆتورلىق شىعارماسىنان تارتىپ, اۆتوردىڭ ءوزى, جوعارىدا اتالعان ونەر جۇلدىزدارى, جەتىسۋلىقتاردىڭ ماقتانىشى «قۇرمەت», «پاراسات» وردەندەرىنىڭ يەگەرى ءالي الپىسباەۆ, حالىقارالىق بايقاۋلاردىڭ لاۋرەاتى مەدەت ەسبەرگەنوۆتەرمەن جالعاسقان ونەر شەرۋى كوڭىل شالقىتتى.
قازاقتىڭ اقسۇڭقار اقىنى سۇلتانماحمۇت تورايعىروۆ ء«…بىزدىڭ قازاق انقۇمار حالىق… بىرەۋ قولىنا دومبىرا ۇستاپ ءان سالا باستاسا, ويداعى-قىرداعىسى جينالىپ, سەگىزدەگى بالا, سەكسەندەگى شالىنا دەيىن قالماي قامالاپ, ايتشى-ايتشىلاپ جانىن جاعاسىنا كەلتىرەدى. بارا-بارا نە بولسا دا سول اندەگى رۋح سۇيەگىنە سىڭەدى, قۇلاعىندا قالادى», دەگەن پىكىرى ءالى دە ءوز قاسيەتىن جوعالتپاعانداي. ءبىز سوعان تاعى ءبىر مارتە كوز جەتكىزدىك.
جەتىسۋ وبلىسى
