فوتو: ۇلتتىق بانك ءباسپاسوز قىزمەتى.
ۇلتتىق بانك ءباسپاسوز قىزمەتىنىڭ حابارلاۋىنشا, جاڭا 5000 تەڭگە ءداستۇرلى قازاق ويۋ-ورنەگىنىڭ باستاۋشىسى بولىپ سانالاتىن جانە كوشپەندىلەردىڭ بىرەگەي مادەنيەتىنەن باستاپ بۇگىنگى قازاقستانعا دەيىنگى ەل مۇراسىن بەينەلەيتىن «ساق ءستيلى» ەلەمەنتتەرىنە نەگىزدەلگەن.
ءتۇسى — قىزىل-قىزعىلت سارى. بانكنوتتىڭ بەتكى جاعىندا:
— كوكتە قالىقتاپ ۇشقان قۇس پەن ءومىر اعاشىنىڭ بۇتاعى (ەسىك قورعانى, ب. د. د. 5-4 عع., التىن ادام باس كيىمىنىڭ ءبىر بولىگى, تابيعات پەن نانىم بايلانىسىنىڭ قاسيەتتى ماعىناسى);
— دنق ءسپيرالى جانە ادامنىڭ تابيعاتپەن بايلانىسىن بىلدىرەتىن ويۋ-ورنەك بەينەلەنگەن شەكسىزدىك سيمۆولى;
— جادىگەر-بۇركىت فيگۋراسى تۇرىندەگى بەزەندىرۋ (قورعان تالدى II, ب. د. د. 7-6 عع.; بۇركىت شەكسىز ەركىندىكتىڭ, كۇش پەن ەپتىلىكتىڭ سيمۆولى رەتىندە).
بانكنوتتىڭ سىرت جاعىندا ويۋ-ورنەكپەن بەزەندىرىلگەن قالقان فونىنداعى بۇركىت بەينەلەنگەن. نەگىزگى بەينەنىڭ ارتىندا دوڭگەلەك قازاقتىڭ ويۋ-ورنەگى ورنالاسقان.
نومينالى 5 000 تەڭگە بولاتىن جاڭا بانكنوتتار 2023 جىلعى 25 جەلتوقساننان باستاپ اينالىمعا ەندى جانە جىل بويى اينالىمداعى 2011 جىلعى ۇلگىدەگى نومينالى 5 000 تەڭگە بولاتىن ۇلتتىق ۆاليۋتا بانكنوتاسىمەن اۋىستىرىلادى.
ياعني, ەسكى ۇلگىدەگى بارلىق بانكنوتتار ءبىر جىل ىشىندە اينالىمنان بىرتىندەپ الىنادى. تيىسىنشە, بانكنوتتار اينالىمدا قاتار جۇرگەن ۋاقىتتا حالىققا ەسكى ۇلگىدەگى بانكنوتتاردى ەكىنشى دەڭگەيلى بانكتەردەگى نەمەسە قۇب فيليالدارىنداعى جاڭا بانكنوتتارعا ايىرباستاۋدىڭ قاجەتى جوق.
2023 جىلدىڭ 25 جەلتوقسانىنان 2024 جىلدىڭ 24 جەلتوقسانىنا دەيىن ەسكى جانە جاڭا ۇلگىدەگى بانكنوتتار اينالىمدا قاتار ءجۇرىپ, ەسەپ ايىرىسۋعا جارامدى سانالادى.
ۇلتتىق بانكتىڭ تۇسىندىرۋىنشە, جاڭا ۇلگىدەگى بانكنوتتار 2024 جىلدىڭ ناۋرىز ايىندا عانا جاپپاي اينالىمعا شىعادى. سەبەبى ولاردى ەلىمىزدىڭ بارلىق وڭىرىنە جەتكىزىپ, جابدىقتاردى (بانكوماتتار, تەرمينالدار جانە كاسسالىق تەحنيكا ت. ب.) بەيىمدەۋ ءۇشىن ۋاقىت قاجەت.
