سەنات توراعاسى وسى اپتادا پالاتانىڭ 2023 جىلداعى قورىتىندى وتىرىسى وتەتىنىن اتاپ ءوتتى. الداعى ۋاقىتتا سەناتورلاردىڭ وڭىرلەرگە ساپارلارى باستالادى. ماۋلەن اشىمباەۆ كەزدەسۋلەر بارىسىندا حالىققا جۇرگىزىلىپ جاتقان كونستيتۋتسيالىق رەفورمالاردىڭ ءمانىن جانە پارلامەنت قابىلداعان زاڭداردىڭ نەگىزگى ەرەجەلەرىن جان-جاقتى ءتۇسىندىرۋدىڭ ماڭىزدى ەكەنىن ايتتى.
«كەلەر جىلدىڭ العاشقى كۇندەرى بارلىق دەپۋتات وڭىرلەرگە شىعادى. وسى ورايدا شالعاي ەلدى مەكەندەردىڭ تۇرعىندارىمەن جانە ەڭبەك ۇجىمدارىمەن كەزدەسىپ, ازاماتتاردى الاڭداتقان ماسەلەلەردى شەشۋگە وڭ ىقپالىمىزدى تيگىزۋ اسا ماڭىزدى», دەدى پالاتا سپيكەرى.
بەكىتىلگەن كۇن تارتىبىنە سايكەس 26 جەلتوقسان كۇنى سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قويناۋىن پايدالانۋ جانە ەكولوگيا ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكىنشى وقىلىمدا قارايدى. قۇجات نورمالارى ساراپتاما مەرزىمدەرىن 8-12 ايعا قىسقارتۋدى, اكىمشىلىك شىعىنداردى جويۋدى جانە گەولوگيالىق بارلاۋدىڭ ينۆەستيتسيالىق تارتىمدىلىعىن ارتتىرۋ جونىندەگى شارالاردى قوسا العاندا, جەر قويناۋىن پايدالانۋ سالاسىنداعى زاڭنامانى جەتىلدىرۋدى كوزدەيدى.
ال 28 جەلتوقسان كۇنى وتەتىن پالاتا وتىرىسىندا سەنات دەپۋتاتى بيبىگۇل اققوجينانىڭ انت قابىلداۋى جانە ونى تۇراقتى كوميتەتتىڭ قۇرامىنا سايلاۋ ماسەلەلەرى قارالادى.
سونىمەن قاتار بۇل كۇنى دەپۋتاتتار «2002 جىلعى 7 قازانداعى ۇجىمدىق قاۋىپسىزدىك تۋرالى شارت ۇيىمىنىڭ جارعىسىنا وزگەرىستەر ەنگىزۋ تۋرالى ءتورتىنشى حاتتامانى راتيفيكاتسيالاۋ تۋرالى» زاڭدى قارايدى. اتالعان زاڭنىڭ نورمالارى ۇيىمعا مۇشە مەملەكەتتەردىڭ ءوزارا ءىس-قيمىل اياسىن كەڭەيتۋگە جانە ۇيىم حاتشىلىعىنىڭ كادر ماسەلەلەرىن جەدەل شەشۋگە ارنالعان.
وتىرىس بارىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكسپورتتىق-كرەديتتىك اگەنتتىك جانە شيكىزاتتىق ەمەس تاۋارلاردىڭ (جۇمىستاردىڭ, كورسەتىلەتىن قىزمەتتەردىڭ) ەكسپورتىن ىلگەرىلەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ دا قارالادى. قۇجات مەملەكەت باسشىسىنىڭ تاپسىرماسىن ورىنداۋ ءۇشىن ازىرلەندى. ول شيكىزاتتىق ەمەس ەكسپورتتى دامىتۋ جانە ىلگەرىلەتۋ سالاسىنداعى ۇلتتىق ينستيتۋت مارتەبەسىنە يە ەكسپورتتىق-كرەديتتىك اگەنتتىك قۇرۋدى كوزدەيدى.
سونداي-اق بيۋرو وتىرىسىندا دەپۋتاتتار سەناتتىڭ جوبالىق كەڭسەسىنىڭ تۇراقتى قۇرامى تۋرالى ماسەلەنى قارادى جانە پارلامەنت ماجىلىسىنەن كەلىپ تۇسكەن زاڭدار پالاتانىڭ تۇراقتى كوميتەتتەرىنە ءبولىنىپ بەرىلدى.
