اتىراۋ قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ سەكتور مەڭگەرۋشىسى نۇرجان ساياساتتىڭ ايتۋىنشا, بۇل باسپانالار اپاتتى تۇرعىن ۇيلەردىڭ تىزىمىنە تىركەلىپ, جول كارتاسى جاسالعان. ماقسات – ەسكى ۇيلەردىڭ تۇرعىندارىن جاڭا باسپانامەن قامتۋ.
«قالالىق اكىمدىكتىڭ بيۋدجەتىنەن اپاتتى ۇيلەردىڭ يەلەرىنە «مودەرن» تۇرعىن ءۇي كەشەنىنەن جاڭا پاتەرلەر ساتىپ الىندى. جىل سوڭىنا دەيىن تاعى ءبىر اپاتتى جاعدايداعى ەسكى تۇرعىن ءۇيدىڭ يەلەرى جاڭا باسپاناعا كوشىرىلەدى», دەدى نۇرجان ساياسات.
جاڭا قونىسقا كوشكەن تۇرعىنداردىڭ قاتارىندا يرينا گاليچ تە بار. ونىڭ وتباسى 53 جىل بۇرىن سالىنىپ, كەيىن اپاتتى جاعدايعا ۇشىراعان ۇيدە ۇزاق جىل تۇرعان.
«بۇرىن ەكى قاباتتى ەسكى ۇيدەگى ءار كۇنىمىزدى ۋايىممەن وتكىزۋشى ەدىك. اسىرەسە بالالارىمىز ءۇشىن قورقىپ, جانىمىزدى شۇبەرەككە ءتۇيىپ جۇردىك. ۇيقىمىز دا تىنىش بولمايتىن. ەندى, مىنە, كوپتەن كۇتكەن قۋانىشقا كەنەلدىك. جاڭا پاتەرگە يە بولىپ, قيىندىقتىڭ ارتتا قالعانىنا قۋاندىق», دەدى يرينا گاليچ.
جاڭا پاتەردى كوپ كۇتكەندەردىڭ قاتارىندا ايگۇل بەكەسوۆا دا بار. ول وتباسىمەن 1947 جىلى پايدالانۋعا بەرىلگەن ەسكى ۇيدە تۇرعان. وسى كەزگە دەيىن قۇلاۋ قاۋپى تونگەن باسپانانى 9 وتباسى پانالاپ كەلگەن.
«ەسكى ۇيدە تۇرۋدىڭ قيىندىعى كوپ. ءار كۇنىمىز ۋايىممەن وتەتىن ەدى. بىراق جاڭا باسپانا الۋدان ءۇمىتىمىزدى ۇزبەدىك. سول ءۇمىتىمىز اقتالىپ, جاڭا پاتەرگە يە بولدىق. اسىرەسە بالالاردىڭ قۋانىشىندا شەك جوق», دەيدى ايگۇل بەكەسوۆا.
اتىراۋ وبلىسى
