فوتو: اشىق دەرەككوز
مەملەكەت باسشىسى حالىق سانىنىڭ كوبەيۋىمەن قاتار ازاماتتاردىڭ ورتاشا ءومىر ءسۇرۋ جاسىنىڭ كوبەيگەنىن تىلگە تيەك ەتتى.
«جاقىندا قازاقستان حالقىنىڭ سانى 20 ميلليونعا جەتتى. بۇل – تاريحي بەلەس. وعان بۇكىل ەل بولىپ قۋاندىق. حالىق سانىنىڭ كوبەيۋى مەملەكەتىمىزدىڭ دامۋىنا قوسىمشا سەرپىن بەرىپ, ەلىمىزگە ابىروي اكەلەتىنىنە ەش كۇمان جوق. سوندىقتان ءبىزدىڭ نەگىزگى ماقساتىمىز – بارشا جۇرتىمىزدىڭ ساپالى تۇرمىسىن قامتاماسىز ەتۋ. بىلتىر ەلىمىزدەگى ورتاشا ءومىر ءسۇرۋ ۇزاقتىعى 74,4 جاسقا جەتتى. بۇل – ەلىمىزدەگى مەديتسينالىق قىزمەتتىڭ ساپاسىمەن قاتار, ازاماتتاردىڭ ءال-اۋقاتى جاقسارىپ جاتىر دەگەن ءسوز», دەدى پرەزيدەنت.
سونىمەن بىرگە, قاسىم-جومارت توقاەۆ حالىق اراسىندا كرەاتيۆ يندۋستريا مەن مادەنيەتتىڭ قانات جايىپ كەلە جاتقانىنا ءمان بەردى.
«ۇلت رۋحانياتى دا جاڭاشا وركەن جايىپ كەلەدى. ءىرى قالالاردا, اۋىل-ايماقتاردا مادەني جاڭعىرۋ بايقالۋدا. مىسالى, ەلىمىزدىڭ ءار تۇكپىرىندە اپتا سايىن ونداعان كونتسەرت, سپەكتاكل قويىلادى. سوعان قاراماستان جۇرت تەاترعا بيلەت تاپپاي جاتادى. قوعامىمىزدا, اسىرەسە جاستار قاۋىمىندا كرەاتيۆتى يندۋستريا قارقىندى دامىپ كەلە جاتىر. بۇل – وتە جاقسى ۇدەرىس», دەپ اتاپ ءوتتى مەملەكەت باسشىسى.
ايتا كەتەيىك, وسىدان 10 جىل بۇرىن, 2013 جىلى ەلىمىزدەگى ازاماتتاردىڭ ءومىر ءسۇرۋ ۇزاقتىعى 70, 6 جاس بولعان.
