«مەن ەكپورت كولەمىن 2026 جىلعا قاراي ءبىر ميلليارد دوللارعا جەتكىزۋ مىندەتىن جۇكتەدىم. ءبىز ءىرى ونەركاسىپتىك وندىرىستەن باستاپ, شاعىن سەرۆيستىك جوبالارعا دەيىنگى ەكونوميكانىڭ بارلىق سالاسىن ودان ءارى تسيفرلاندىرۋعا باسا ءمان بەرەمىز. بىراق بوساڭسۋعا, جەتىستىكتەرگە توقمەيىلسۋگە بولمايدى», دەيدى مەملەكەت باسشىسى.
پرەزيدەنتتىڭ ايتۋىنشا ەلىمىز جاھاندىق تسيفرلىق تەحنولوگيا ورتالىعى رەتىندەگى ورنىن نىعايتۋى كەرەك.
«قازاقستان ءىرى حالىقارالىق IT كومپانيالاردىڭ كەڭسەلەرى ورنالاساتىن اۋماق بولا الادى جانە بولۋعا ءتيىس. مۇنىڭ ءبارى – ءبىزدىڭ جۇمىسىمىزدىڭ مىندەتتەرى مەن ناقتى ناتيجەلەرىنىڭ از عانا بولىگى. بارلىق سالاداعى وزگەرىستەردىڭ قارقىنىن ارتتىرىپ, ودان ءارى دامىتا بەرۋگە مىندەتتىمىز. ءتۇرلى سالادا قوردالانعان پروبلەمالار از ەمەس. بۇل جاعدايعا ازاماتتاردىڭ الاڭداۋى – زاڭدىلىق. ۇكىمەتتىڭ كۇن سايىنعى جانە جۇيەلى جۇمىستارىنىڭ ناتيجەسىندە بارلىق وزەكتى ماسەلە بىرتىندەپ شەشىلىپ كەلەدى. دەگەنمەن ەلىمىزدىڭ دامۋ جولىندا قۋاتتى سەرپىلىس جاساۋ ءۇشىن كۇندەلىكتى ماسەلەلەردى شەشىپ قانا قويماي, مەملەكەتىمىزدىڭ بولاشاعىنا قاتىستى وزىندىك ۇستانىمىمىزدى انىقتاۋ, ۇلتتىڭ جاڭا ساپاسىن قالىپتاستىرۋ, جەكەلەگەن جانە ۇجىمدىق قۇندىلىقتار جۇيەسىن جەتىلدىرۋ ماڭىزدى», دەيدى ەل پرەزيدەنتى.
