وڭىرلىك بولىنىستە ەڭبەك ونىمدىلىگىن ارتتىرۋ باعىتى بويىنشا ەڭ كوپ ءوتىنىم الماتى (75), استانا (65) جانە شىمكەنت (48) قالالارىنان جولدانعان. سالالىق بولىنىستە مەملەكەتتىك ىنتالاندىرۋ شارالارىنا وتىنىشتەردىڭ باسىم بولىگى ماشينا جاساۋ (100), اگروونەركاسىپ كەشەنى, ازىق-ت ۇلىك پەن سۋسىندار (61) جانە جەڭىل ونەركاسىپ (50) كاسىپورىندارىنان كەلگەن.
ءونىمدى ىلگەرىلەتۋ باعىتى بويىنشا ەڭ كوپ ءوتىنىمدى قاراعاندى وبلىسىنىڭ (62), الماتى (35) جانە اقتوبە وبلىسىنىڭ (26) كاسىپورىندارى, ال سالالىق تۇرعىدا جەڭىل ونەركاسىپ (72), ماشينا جاساۋ (68), حيميالىق جانە فارماتسەۆتيكالىق باعىتتاعى (51) كاسىپورىن جىبەرىپتى.
ەسەپتى كەزەڭدە QazIndustry ماماندارى كاسىپورىنداردىڭ شىعىندارىنىڭ ءبىر بولىگىن وتەۋ شارتتارى مەن تەتىكتەرىن ءتۇسىندىرۋ بويىنشا 550-دەن اسا اۋىزشا كەڭەس بەرگەن. سونداي-اق ماماندار ءتۇرلى كونفەرەنتسيا مەن فورۋمعا قاتىسىپ, اشىق ەسىك كۇندەرى, ءوندىرىس وكىلدەرىمەن كەزدەسۋلەر جانە وڭىرلەردە ارنايى سەمينار-كەڭەستەر ۇيىمداستىرىلدى.
ەسكە سالا كەتەيىك, QazIndustry ونەركاسىپتى ىنتالاندىرۋ جانە كاسىپورىن شىعىندارىنىڭ ءبىر بولىگىن وتەۋ بويىنشا قىزمەتتەر كورسەتەدى.
مۇنداي كومەك كاسىپورىنداردىڭ مۇمكىندىگىن مولايتىپ, ءورىسىن كەڭەيتە تۇسۋگە ۇلكەن سەپتىگىن تيگىزەدى. مىسالى, ورتالىق الماتىلىق تىگىن فابريكاسىنىڭ ۇنەمدى ءوندىرىس ەلەمەنتتەرىن ەنگىزۋ ءۇشىن كەتكەن شىعىنىنىڭ 40 پايىزىن وتەپ بەرگەن. كومپانيا مالىمەتىنشە, بۇل كومەك فابريكا جۇمىسىنداعى كەمىستىكتەردى ازايتىپ, تۇراقتىلىق پەن جۇمىس ۇدەرىسىنىڭ جۇيەسىن ساقتاي وتىرا ەڭبەك ونىمدىلىگىن 12 پايىزعا ارتتىرۋعا مۇمكىندىك بەرگەن. اتالعان الماتىلىق تىگىن فابريكاسى ارنايى كيىمدەردىڭ 100-دەن اسا ءتۇرىن شىعارادى. كيىمدەر زاماناۋي قىتايلىق قۇرىلعىلاردىڭ كومەگىمەن تىگىلەدى.
دەگەنمەن كومپانيا باسشىلىعىنىڭ ايتۋىنشا, جۇيەلى پروبلەمالار كومپانيا يميدجىنە ۇزاق ۋاقىت بويى كەرى اسەرىن تيگىزدى. ءوز كەزەگىندە بيزنەس-ستراتەگيا ساباقتارى مەن QazIndustry-ءدىڭ ىشكى نارىقتى العا جىلجىتۋداعى قولداۋى كاسىپورىنداعى جاعدايدى ايتارلىقتاي وزگەرتكەن.
«جۇمىس كيىمىن تىگۋ تسەحىندا جاپوندىق كايدزەن فيلوسوفياسىنىڭ ەنگىزىلۋىمەن جۇمىس ساپاسى تۇرعىسىنان بولسىن, جەكە ۋاقىتىن باسقارۋ تۇرعىسىنان بولسىن ءاربىر قىزمەتكەر ءوزىن-ءوزى تارتىپكە كەلتىردى. جۇمىستىڭ ءمانى ارتا ءتۇستى. ەڭبەك ونىمدىلىگى كۇشەيدى جانە كەمشىلىكتەر ازايدى. مەملەكەتتىڭ ءبىز سەكىلدى ونەركاسىپتىك ءوندىرىس وشاقتارىنا قولداۋ كورسەتىپ جاتقانى قۋانتادى», دەيدى كومپانيا باسشىسى ءادىلجان تۇرعانوۆ.
30 پايىز كولەمىندەگى وتەماقىنى «Astana Ceramic» جشس دا العان. سونىڭ ناتيجەسىندە كاسىپورىنداعى ءوندىرىستىڭ تۇرىپ قالۋ كورسەتكىشى 32 پايىزدان 7 پايىزعا تومەندەپ, كەراميكالىق كىرپىش ءوندىرىسى 15 پايىزعا ۇلعايعان.
«زاۋىت جىلىنا 30 ملن كەراميكالىق كىرپىشتى ءۇش تۇردە وندىرەدى. 2018 جىلى كاسىپورىنعا مودەرنيزاتسيا جاسالدى جانە ءبىز بەلگىلى فۋنكتسيونالدىق قىزمەت كورسەتۋ قيىندىقتارىنا تاپ بولدىق. تەزىرەك رەتكە كەلتىرمەسەك, ۇلكەن شىعىنعا باتىپ قالۋدىڭ از-اق الدىندا ەدىك», دەيدى كاسىپورىن باسشىسى سەرىك قوجاحانوۆ.
ايتا كەتەيىك, شىعىنداردى وتەۋ كومەگى ەكونوميكانىڭ باسىم سەكتورلارىندا يندۋستريالىق-يننوۆاتسيالىق جوبالاردى ىسكە اسىراتىن نە وتاندىق وڭدەلگەن تاۋارلاردى, جۇمىستار مەن كورسەتىلەتىن قىزمەتتەردى ىشكى جانە سىرتقى نارىقتارعا ىلگەرىلەتۋ جونىندەگى قىزمەتتى جۇزەگە اسىراتىن جەكە جانە زاڭدى تۇلعالارعا كورسەتىلەدى.
