Qazaqstan.TV ارناسىنىڭ جازۋىنشا, بۇل تۋرالى يكاو حالىقارالىق ازاماتتىق اۆياتسيا ۇيىمىنىڭ قولداۋىمەن الماتىدا ءوتىپ جاتقان ايماقتىق سيمپوزيۋمدا ايتىلدى. جيىندا جولاۋشىلاردى بەت-الپەتى ارقىلى سايكەستەندىرۋ باعدارلاماسىنىڭ ارتىقشىلىقتارى تالقىلاندى. بۇل ولاردىڭ ۋاقىتىن ۇنەمدەۋگە مۇمكىندىك بەرمەك. ياعني, جولاۋشىعا تىركەۋ جانە شەكارالىق باقىلاۋ پۋنكتتەرىنە بارۋدىڭ قاجەتى بولمايدى. تەك ارنايى اركادان وتسە بولدى. وندا ادامنىڭ بەتىنە سكانەر جاسالىپ, بارلىق اقپارات ارنايى بازا ارقىلى شىعىپ تۇرادى. جوبانى ىسكە قوسۋ ءۇشىن الدىمەن ازاماتتاردىڭ بيومەتريالىق مالىمەتتەرىنە قول جەتكىزۋ كەرەك. ول ءۇشىن شەكارا, كەدەن قىزمەتى جانە اۆياكومپانيالاردى ءبىر جۇيەگە توعىستىرۋ كەرەك.
«بۇل جۇيەگە الەمنىڭ 166 ەلى قىزىعۋشىلىق تانىتتى. ءتىپتى, قازىردىڭ وزىندە ونى ەنگىزىپ جاتقاندار بار. قازاقستان دا سولاردىڭ قاتارىندا. جولاۋشىلاردى سايكەستەندىرۋ باعدارلاماسىنىڭ ارقاسىندا جولاۋشىلار اعىمى بىرنەشە ەسە ارتۋى مۇمكىن. تۋريستەر سانى دا كوبەيىپ جاتسا تاڭعالمايمىز», دەيدى اۆياتسيالىق اكىمشىلىكتىڭ باس ديرەكتورى كاتالين رادۋ
سونىمەن قاتار بۇل جۇيە جولاۋشىلاردىڭ دا ۋاقىتىن ۇنەمدەمەك.
«27-28 قاراشا كۇندەرى بەت-الپەتتى سايكەستەندىرۋ ارقىلى تەستىلەۋدەن وتكىزىپ كوردىك. جولاۋشىنىڭ ءوتۋ ۋاقىتى ۇنەمدەلەدى ەكەن. بۇرىن قۇجاتتى تەكسەرۋ 13 سەكۋندتا وتەتىن بولسا, كەشە ءبىز ءبىر ادامنىڭ 5 سەكۋندتا وتكەنىن بايقادىق. 10 مينۋتتىڭ ىشىندە 240 ادامنىڭ ءوتىپ شىعۋىنا مۇمكىندىك بەرىپ وتىر», دەيدى «نازارباەۆ حالىقارالىق اۋەجايى» اق باسقارما توراعاسى ەرعازى جولداسوۆ.
