بەينەجازبا اۆتورى اق ءۇي, دجونس حوپكينس ۋنيۆەرسيتەتىنىڭ جانە دۇنيەجۇزىلىك بانك پورتالدارىنا سۇيەنەدى. سايتتاردىڭ سكرينشوتتارىن كورسەتە وتىرىپ, ول بيلىك الداعى پاندەميا تۋرالى ءبىلىپ قانا قويماي, وعان دايىندالىپ جاتقانىن ايتادى.
اق ءۇيدىڭ سايتىندا اقش-تا پاندەمياعا دايىندىق جانە وعان دەن قويۋ ساياساتى باسقارماسى (OPPR) قۇرىلىپ جاتقاندىعى تۋرالى اقپارات بار. بىراق بۇل تەك COVID-19-عا عانا قاتىستى ەمەس. ول پوليوميەليت, RSV رەسپيراتورلىق ۆيرۋسى, قۇس جانە ادام تۇماۋى, سونداي-اق پاندەميا تۋدىرۋى ىقتيمال باسقا اۋرۋلارىنا قاتىستى ارەكەت ەتەدى. OPPR مەديتسينالىق قۇرالداردى ازىرلەۋگە, وندىرۋگە جانە ساتىپ الۋعا جاۋاپتى بولادى. ۆيدەودا كورسەتىلگەن پاراقشادا وسى باسقارمادا تاعىلىمدامادان وتۋگە قابىلداۋ جۇرگىزىلىپ جاتىر. جاڭا پاندەمياعا نەمەسە داتالارعا سىلتەمەلەر جوق.
دجونس حوپكينس دەنساۋلىقتى قورعاۋ ورتالىعىنىڭ سايتىندا دا جاڭا پاندەميا تۋرالى جازىلماعان. بەينەروليكتە 2017 جىلعى جاريالانىمعا سىلتەمە بەرىلگەن. ەگەر تاقىرىبىن اۋداراتىن بولساق, ونىڭ 2025-2028 جىلدارعا ارنالعان ويدان شىعارىلعان ستسەناري ەكەنى بەلگىلى بولادى. SPARS ۆيرۋسى دا ويدان شىعارىلعان. بۇل ناقتى پاندەميا پايدا بولعان كەزدە مەديتسينالىق قىزمەتكەرلەردىڭ داعدىلارىن پىسىقتاۋ ءۇشىن قاجەت.
ودان ءارى روليكتە اۆتور دۇنيەجۇزىلىك بانك سايتىندا جاريالانعان قۇجاتتى كورسەتەدى. ونى تەز پاراقتاي وتىرىپ, ول پايدالانۋشىعا ءمان-ماعىناسىن تۇسىنۋگە مۇمكىندىك بەرمەيدى. بىراق مانيپۋلياتسيا جاساۋ ءۇشىن قاجەت كۇندى تابادى – 2025 جىلعى 31 ناۋرىز. حالىقارالىق قارجى ۇيىمىنىڭ سايتىنداعى قۇجاتتاردىڭ ەشقايسىسىندا جاڭا پاندەمياعا سىلتەمەلەر جوق.
«بۇل فەيك. دالەلدەر مەن روليك اۆتورىنىڭ مالىمدەمەلەرى شىندىققا جاناسپايدى», دەپ قورىتىندىلادى Stopfake.kz پورتالى.
