فوتو: tengrinews.kz
ەلنۇر بەيسەنباەۆ دەپۋتاتتىق ساۋالىن قارجى ءمينيسترى ەرۇلان جاماۋباەۆتىڭ اتىنا قاراتا جولدادى.
«قازىرگى تاڭدا ەلىمىزدە لۋدومانيا, ياعني ويىنقۇمارلىقتىڭ ءورشىپ بارا جاتقانى جاسىرىن ەمەس. ول – قوعامنىڭ ۇلكەن دەرتىنە اينالدى. دەگەنمەن, ازاماتتارىمىزدىڭ ويىنقۇمارلىققا سالىنۋىنا لوتەرەيا ويىندارىنىڭ دا تەجەۋسىز كوپ تارالۋى العىشارت قالىپتاستىرىپ وتىر. ماسەلەن, ەلىمىزدە «LOTOMatic», «LOTOclub» سياقتى اتاۋلارمەن جۇمىس ىستەيتىن ء«ساتتى جۇلدىز» كومپانياسىنان ليتسەنزيا العان ەكى كومپانيا بار. اشىق اقپارات كوزدەرىنەن بەلگىلى بولعانداي, ەكى كومپانيانىڭ دا قۇرىلتايشىلارى ءبىر. بىرەۋى اقىلى ارنايى لوتەرەيا ساتاتىن لوتوكلۋبتاردىڭ جۇمىسىن ۇيلەستىرسە, ەندى ءبىرى ەلىمىزگە جاسىل-سارى ءتۇستى اپپاراتتاردى ەنگىزۋمەن اينالىسادى. لوتوكلۋبتىڭ ماسەلەسىن زاڭمەن قاتاڭ شەكتەيتىنىمىز انىق. ويتكەنى بۇل دا كازينونىڭ, قۇمار ويىننىڭ ءبىر ءتۇرى. ال, جاسىل-سارى ءتۇستى تەرمينالداردىڭ ەلىمىزدەگى رەسمي سانى 5 مىڭنان اسىپ جىعىلادى. ياعني ءار وبلىس ورتالىعىندا كەمى 300 تەرمينال بار, بۇل تەك قانا رەسمي تىركەلگەندەرى. بەيرەسمي, زاڭسىز جۇمىس ىستەپ جاتقان «تاجالويىن» جاسىل-سارى جاشىكتەردىڭ ەسەبىن ەشكىم بىلمەيدى», دەدى ەلنۇر بەيسەنباەۆ.
دەپۋتات ويىن تەرمينالدارىنان وڭاي اقشا تابامىز دەپ وپىق جەپ وتىرعان ازاماتتاردىڭ كوبەيۋى مەملەكەتتىك ورگانداردىڭ سالعىرتتىعى دەپ باعالادى. ول باقىلاۋسىز ورناتىلعان جاسىل-سارى ءتۇستى تەرمينالداردىڭ بيۋدجەتكە سالىق تولەمەيتىنىن دە سىنادى.
«وعان قوسا, اتالعان ويىن اۆتوماتتارىن كىمنىڭ ويناپ جاتقانىن قاداعالايتىن نە ءبىر ادام, نە ءبىر مەملەكەتتىك ورگان جوق. بۇل اۆتوماتتاردى تورۋىلداعانداردىڭ كوبى جاس جەتكىنشەك بالالار, وقۋشىلار ەكەنى انىق. مەملەكەتتىك ورگانداردىڭ سالعىرتتىعىنان وڭاي اقشا تابامىز دەپ, ءوز تاعدىرىن قيراتقان جاس بالالارىمىز وتباسىلارىن دا سان سوقتىرىپ جاتىر ەمەس پە؟! لوتەرەيا تەرمينالدارىنىڭ كوبەيىپ كەتۋى وسكەلەڭ ۇرپاقتى ويىنقۇمارلىققا ەلىكتىرۋمەن قاتار, ءتۇرلى قىلمىستاردىڭ كوزىنە دە اينالىپ وتىر. ۇرلىق جاساۋ, كولەڭكەلى بيزنەس جانە تاعى باسقالارىنىڭ دا تۇپكى سەبەبى وسىندا جاتىر. باقىلاۋسىز ورناتىلعاندىقتان, ولاردان بيۋدجەتكە سالىق تا تولەنبەيدى. ەڭ قىزىعى, وسى ويىن اۆتوماتتارى مەن ولارعا قاجەت جابدىقتار ەلىمىزدە وندىرىلمەيدى, تولىقتاي شەتەلدەردەن تاسىمالدانادى. بۇعان قۇقىعى بار زاڭدى وپەراتورلاردان بولەك, ءتۇرلى جولدارمەن استىرتىن تاسىمالداۋشىلار دا جەتىپ ارتىلادى. ولار كەدەن ارقىلى كونتراباندالىق جولمەن زاڭسىز وتكىزىلەدى. تۇنىپ تۇرعان قىلمىستىق توپتىڭ ءىس ارەكەتىنە جاتادى», دەدى دەپۋتات.
