سۋرەت ديانا رۇستەموۆانىڭ جەكە مۇراعاتىنان الىندى
21 جاستاعى ديانا رۇستەموۆا «اشتىق ويىندارى» پريكۆەلىندە قوسىمشا رولدە ويناعان جالعىز قازاق قىزى اتاندى. بويجەتكەن ءۇش جىلدان بەرى بەرليندە رەجيسسۋرا ماماندىعى بويىنشا ءبىلىم الىپ كەلەدى, ال بوس ۋاقىتىندا كينودا قوسىمشا رولدەرگە تۇسەدى.
«مەن 2022 جىلى فيلمدەردە ماسسوۆكاعا تۇسە باستادىم. ول ءۇشىن الدىمەن ارنايى پلاتفورمادا انكەتانى تولتىرىپ, ءوزىڭنىڭ سۋرەتتەرىڭدى جۇكتەۋ قاجەت. ەگەر سىرتقى پارامەترلەرگە ساي بولساڭ, تۇسىرىلىمگە قاتىسۋعا شاقىرۋ جىبەرەدى», دەيدى بويجەتكەن.
بۇعان دەيىن ديانا «بامپەر» فيلمىندە, يتالياندىق تەلەحيكايالاردا جانە ەۋروپالىق فيلمدەردە قوسىمشا رولدەردى سومدادى.
«ول فيلمدەردە مەنىڭ بەينەم كورىنبەگەن ەدى. ال «اشتىق ويىندارىندا» مەن ءوزىمدى العاش رەت ەكراننان كوردىم. ماسسوۆكادا نەگىزىنەن كورىنۋ مۇمكىندىگى وتە از. ءتۇسىرىلىم الاڭىندا مەن جالعىز قازاق بولدىم. مەنىڭ ويىمشا, بۇل بىرەگەي مۇمكىندىك جانە تاڭعاجايىپ تاجىريبە», دەپ اتاپ ءوتتى ول.
ديانانىڭ ايتۋىنشا, قوسىمشا توپتىق رولدەردى ءتۇسىرۋ شامامەن ەكى اپتاعا سوزىلعان.
«بىزگە ساعات 06:00-دە قوڭىراۋ شالدى. ءتۇسىرىلىم الاڭىنا ءوزىمىز بارىپ جۇردىك, ءتۇسىرىلىم كۇنىنە 12-13 ساعاتتان بولدى», دەپ ەسكە الادى ول.
سونداي-اق ديانا سومداعان ءرولى ءۇشىن جالاقى دا جاقسى تولەنگەنىن ايتتى.
«ولار 12 ساعاتتىق ءتۇسىرىلىم ءۇشىن كۇنىنە 120 ەۋرو تولەدى. كەيبىر كۇندەرى وقۋىما بايلانىستى تۇسە الماي قالدىم. بىزدە وتە كوپ دۋبل بولدى. باستى كەيىپكەردەگى اكتەرلەر دە قايتا-قايتا دۋبل جاساپ جاتتى. مەن تۇسكەن 2 سەكۋندتىق بەينەنى ءۇش ساعاتتاپ تۇسىردىك. ءبىر كۇنىمىز بەس سەكۋندتىق ءبىر كورىنىسكە ارنالدى», دەپ ءتۇسىندىردى بويجەتكەن.
ديانا رۇستەموۆا گەرمانيادا تاجىريبە جيناقتاپ, جاقىن ارادا قازاقستانعا ورالۋدى جوسپارلاپ وتىر. سونداي-اق ديانا تيكتوك پاراقشاسىندا ءوزى تۇسكەن كورىنىستىڭ ۆيدەوسىن جاريالاعان ەدى.
