ماۋسىمدا مەملەكەتتىك تىركەۋدەن وتكەن مەكەمەگە 17 شتات بولىنگەن. قازىر ەكى قاباتتى عيماراتتا 14 ادام جۇمىس ىستەيدى. ولاردىڭ بارلىعى – وتباسى تاقىرىبىندا ىسىلعان بىلىكتى ماماندار.
جاڭا ورتالىقتى اشۋ سالتاناتىنا قاتىسقان اۋدان اكىمى عالىمجان مامانباەۆ ورتالىقتىڭ اتقاراتىن جۇمىسىنا قىسقاشا توقتالدى. مەكەمە مۇگەدەكتەر, كوپبالالى وتباسى, از قامتىلعان وتباسى, جالعىز باستى انالار, قيىن جاعدايعا تاپ بولعان وتباسىلارعا قىزمەت كورسەتەدى. مۇنداي ورتالىقتىڭ قاجەتتىلىگىن زامان العا قويىپ وتىر.
جەتىسۋ وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى ەرمەك ميزامباەۆ بۇل مەكەمەگە جۇگىنگەن تۇرعىندارعا الەۋمەتتىك, پسيحولوگيالىق, پەداگوگيكالىق, مادەني, قۇقىقتىق, مەديتسينالىق قىزمەت كورسەتەتىن ورتالىق قىزمەتكەرلەرىنىڭ الدىندا تۇرعان مىندەتتەردى اتاپ ءوتىپ, وبلىستا العاشقى بولىپ اشىلىپ وتىرعان ورتالىق جۇمىسىنا ساتتىلىك تىلەدى. جيىندا اۋداندىق اجەلەر كەڭەسىنىڭ ءتورايىمى شولپان اسقارعاليەۆا, اۋداندىق ارداگەرلەر ۇيىمىنىڭ توراعاسى قادىل جاناسبەكوۆ ۇجىمنىڭ الداعى جۇمىستارىنا ساتتىلىك تىلەپ, باتا بەردى.
«ورتالىقتا كەڭەس بەرۋ جۇمىستارى باستالدى. قازان ايىندا ورتالىققا جۇگىنگەن انالاردىڭ وتىنىشتەرى قارالىپ, قابىلداندى. قىزمەت الۋشىلارعا الەۋمەتتىك جاردەماقى تاعايىندالدى» دەيدى ورتالىق ديرەكتورى ءلاززات ابىلحانوۆا.
جاتىن بولمەلەر, كىر جۋاتىن ورىن, اسحانا, بالالاردىڭ ويىن بولمەسى, تىنىعۋ بولمەسى جان-جاقتى جابدىقتالعان. ورتالىققا از قامتىلعان وتباسىنان قيىن جاعدايعا تاپ بولعان جابىرلەنۋشى انا بالاسىمەن كەلىپ ءتۇسىپتى. مۇنداي ساناتتاعى ادامدار قينالعاندا كومەك قولىن سوزاتىن وڭتايلى ورىننىڭ اشىلعانىنا ريزاشىلىعىن ءبىلدىردى.
جەتىسۋ وبلىسى
