وبلىس اكىمى بەرىك ءۋالي اۋدانداعى حالىقتى ساپالى اۋىزسۋمەن قامتۋعا باعىتتالعان بىرقاتار نىساندى ارالاپ كوردى. ايماق باسشىسى اۋەلى موروزوۆ ورمان شارۋاشىلىعىنداعى سۋ بەرۋ ستانساسىندا بولدى. شاعىن ەلدى مەكەندە 254 ادام تۇرادى. بۇل اۋىلدا بۇرىن اۋىزسۋ جەلىسى بولماعان. جوبا اياسىندا ۇزىندىعى 8 شاقىرىمنان استام سۋ قۇبىرى جەلىسى تارتىلىپ, 106 اۋلا ورتالىقتاندىرىلعان اۋىزسۋ جۇيەسىنە قوسىلدى. سونىمەن قاتار كولەمى 100 تەكشە مەتر بولاتىن ەكى رەزەرۆۋار ورناتىلدى.
وبلىس اكىمى باشكول اۋىلىنداعى قايتا جاڭعىرتىلعان سۋ قۇبىرى جەلىسىن دە بارىپ كوردى. 420 تۇرعىنى بار اۋىلداعى 1974 جىلى سالىنعان سۋ جۇيەسى تولىق جاڭارتىلعان. جوبا اياسىندا ۇزىندىعى 9,781 شاقىرىم سۋ قۇبىرى جەلىسى قايتا جاڭعىرتىلىپ, 111 اۋلا ورتالىقتاندىرىلعان سۋمەن قامتىلعان. سونداي-اق جىلاندى اۋىلىنداعى سۋ بەرۋ ستانساسىنىڭ جۇمىسى دا پىسىقتالدى. بۇل اۋىلدا 355 ادام تۇرادى. مۇندا دا بۇرىن اۋىزسۋ جەلىسى بولماعان. جوبا اياسىندا ۇزىندىعى 11 شاقىرىم سۋ قۇبىرى جەلىسى تارتىلىپ, 132 اۋلا ورتالىقتاندىرىلعان اۋىزسۋ جۇيەسىنە قوسىلدى.
«مەملەكەت باسشىسى قاسىم-جومارت توقاەۆ حالىقتى ساپالى اۋىزسۋمەن قامتاماسىز ەتۋ ماسەلەسىنە ەرەكشە كوڭىل ءبولىپ كەلەدى. بەسقاراعاي اۋدانىنىڭ موروزوۆ ورمان شارۋاشىلىعى, باشكول, جىلاندى, موستيك, كىشى ۆلاديميروۆكا اۋىلدارىنا اۋىزسۋ بەرىلدى. بۇل جوبالار تۇرعىنداردىڭ تۇرمىس ساپاسىن جاقسارتىپ قانا قويماي, اۋىلداردىڭ ودان ءارى دامۋىنا تىڭ سەرپىن بەرەدى», دەدى وبلىس اكىمى.
اباي وبلىسى,
بەسقاراعاي اۋدانى
