پروزا جانرىنا ارنالعان بايقاۋ قازاقستان قالالارىنىڭ تىنىس-تىرشىلىگىن كوركەم شىعارمالار ارقىلى بەينەلەيتىن جاڭا ەسىمدەردى انىقتاۋعا جانە قولداۋعا باعىتتالادى. بايقاۋعا قاتىسۋشىلارعا قالا مادەنيەتى, ادام تاعدىرى, قوعامداعى وزگەرىستەر, سونداي-اق ۇلتتىق بولمىس پەن زاماناۋي قۇندىلىقتاردىڭ ساباقتاستىعى تاقىرىپتارىن كوركەم تۋىندىلار ارقىلى جەتكىزۋ ۇسىنىلادى.
ادەبي بايگەگە قازاقستان ازاماتتارى قاتىسا الادى. قاتىسۋ ءۇشىن كولەمى كەمىندە 10 اۆتورلىق باسپا تاباق ء(بىر اۆتورلىق باس-پا تاباقتىڭ كولەمى 40 مىڭ باسپا تاڭباسىن قۇرايدى) بولاتىن, بۇرىن ەش جەردە جاريالانباعان قالا تاقىرىبىنداعى روماندار قابىلدانادى. ءار اۆتور ءبىر عانا شىعارماسىن ۇسىنا الادى.
جەڭىمپازداردى بەلگىلى جازۋشىلار مەن قوعام قايراتكەرلەرىنەن قۇرالعان قازىلار القاسى انىقتايدى. قورىتىندى شەشىم اشىق داۋىس بەرۋ ارقىلى قابىلدانادى.
ناتيجەسىندە, ۇزدىك شىعارمالاردىڭ اۆتورلارى ديپلومدارمەن جانە اقشالاي سىيلىقتارمەن ماراپاتتالادى. سونىمەن قاتار جۇلدەلى ورىن العان تۋىندىلار 15 مىڭ دانامەن باسىلىپ, ەلىمىزدىڭ كىتاپحانالارىنا تاراتىلادى.
جەڭىمپازدارعا تومەندەگىدەي سىياقىلار بەلگىلەنگەن:
باس جۇلدە – 100 مىڭ دوللار;
I ورىن – 75 مىڭ دوللار;
II ورىن – 50 مىڭ دوللار;
III ورىن – 30 مىڭ دوللار.
بايقاۋ جۇمىستارى 2026 جىلعى قىركۇيەك پەن جەلتوقسان ايلارى ارالىعىندا قابىلدانادى. قۇجات استانا قالاسى, ماڭگىلىك ەل داڭعىلى, 8, 14-كىرەبەرىس, مادەنيەت جانە اقپارات مينيسترلىگىنىڭ مەكەنجايى بويىنشا وتكىزىلۋى قاجەت.
