كوشپەلى وتىرىس باق وكىلدەرىنىڭ ۋنيۆەرسيتەتتىڭ عىلىمي-يننوۆاتسيالىق الەۋەتىن تانىستىرۋمەن باستالدى. جۋرناليستەر قازۇۋ-دىڭ وزىق عىلىمي ورتالىقتارىنىڭ جۇمىسىمەن تانىسىپ, قازاقستان − قىتاي «قاشىقتىقتان زوندتاۋ تەحنولوگيالارى جانە ولاردى قولدانۋ» بىرلەسكەن زەرتحاناسى, Farabi Supercomputer Center جانە مي ينستيتۋتى, Farabi Hub يننوۆاتسيالىق ونىمدەر ورتالىعى مەن Farabi Robotics روبوتوتەحنيكا ورتالىعىن ارالادى.
وسى شارا اياسىندا «Quantum AI» زەرتحاناسىنىڭ سالتاناتتى اشىلۋ ءراسىمى ءوتتى. اقپاراتتىق تەحنولوگيالار جانە جاساندى ينتەللەكت فاكۋلتەتىنىڭ بازاسىندا قۇرىلعان جاڭا عىلىمي-ءبىلىم بەرۋ ورتالىعى رەسپۋبليكا اۋماعىنداعى بالاماسىز ءارى تەڭدەسسىز يننوۆاتسيالىق ورتالىق سانالادى.
كوشپەلى وتىرىستى قازۇۋ باسقارما توراعاسى-رەكتور جانسەيىت تۇيمەباەۆ اشىپ, باق قىزمەتكەرلەرىن كاسىبي مەرەكەسىمەن قۇتتىقتادى. ۋنيۆەرسيتەت باسشىسى زاماناۋي مەديا كەڭىستىكتەگى باسەكەلەستىك زامانىندا ساپالى كادر دايارلاۋدىڭ ماڭىزىن اتاپ ءوتىپ, وقۋ ورنىنىڭ جۋرناليستيكا سالاسىنداعى تاريحي ميسسياسىنا توقتالدى.
ء«ال-فارابي اتىنداعى قازۇۋ – وتاندىق جۋرناليستيكا ءبىلىمىنىڭ التىن بەسىگى, قارا شاڭىراعى بولىپ قالا بەرەدى. ءبىز ءۇشىن جۋرناليست دايارلاۋ – جاي عانا ديپلوم بەرۋ ەمەس, ەلدىك مۇددەنى تۋ ەتكەن, سوزىنە دە, ىسىنە دە جاۋاپتى تۇلعا قالىپتاستىرۋ», دەدى جانسەيىت تۇيمەباەۆ.
ءوز كەزەگىندە قازاقستان جۋرناليستيكا اكادەمياسىنىڭ پرەزيدەنتى ساعىمباي قوزىباەۆ ارىپتەستەرىن قۇتتىقتاپ, ادىلەتتى قازاقستاندى قالىپتاستىرۋداعى ءباسپاسوز وكىلدەرىنىڭ ماڭىزدى ميسسياسىن اتاپ ءوتتى.
ايتۋلى شارا بارىسىندا وتاندىق جۋرناليستيكانىڭ دامۋىنا ەلەۋلى ۇلەس قوسقان سالا ۇزدىكتەرىنە ارنايى ماراپاتتار مەن العىس حاتتار تابىستالدى.
قازۇۋ ەندى كۆانتتىق كومپيۋتەردە جۇمىس ىستەيتىن كادرلار دايارلاۋ ىسىنە باسىمدىق بەرەتىن بولادى. وسى ورايدا «Quantum AI» زەرتحاناسىنىڭ ماڭىزى زور. اۋقىمدى جوبا الدىڭعى قاتارلى كۆانتتىق جۇيەلەردى وندىرۋگە ماماندانعان SpinQ Technology (قحر) حالىقارالىق تەحنولوگيالىق كومپانياسىنىڭ قولداۋىمەن جۇزەگە اسىرىلدى.
جاڭا ورتالىققا زاماناۋي جەتى كۆانتتىق ەسەپتەۋ جۇيەسى جەتكىزىلدى. بۇگىنگى تاڭدا بۇل – قازاقستان اۋماعىنداعى جالعىز كۆانتتىق كومپيۋتەرلەر. بىرەگەي جابدىقتار ستۋدەنتتەر مەن ىزدەنۋشىلەرگە وقۋ ساباقتارى مەن زەرتحانالىق جۇمىستاردى جوعارى دەڭگەيدە جۇرگىزۋگە, كۇردەلى عىلىمي-زەرتتەۋ جوبالارىن ورىنداۋعا جانە ماشينالىق وقىتۋدىڭ بىرەگەي الگوريتمدەرىن ازىرلەۋگە مۇمكىندىك بەرەدى.
سالتاناتتى شارادا رەكتور جانسەيىت تۇيمەباەۆ بۇل قادامنىڭ ۋنيۆەرسيتەتتى الەمدىك دەڭگەيدەگى زەرتتەۋ ورتالىعىنا ترانسفورماتسيالاۋداعى ءرولى زور ەكەنىن قاداپ ايتتى.
«قازىرگى ۋاقىتتا جاساندى ينتەللەكت, ۇلكەن دەرەكتەر مەن كۆانتتىق ەسەپتەۋلەر الەمدىك عىلىم مەن ەكونوميكانىڭ جاڭا باعىتىن ايقىنداپ وتىر. كۆانتتىق تەحنولوگيالار مەن جي ينتەگراتسياسى كريپتوگرافيا, مەديتسينا جانە كۇردەلى جۇيەلەردى مودەلدەۋ سالاسىنداعى بۇرىن كلاسسيكالىق كومپيۋتەرلەردىڭ قاۋقارى جەتپەگەن ەڭ كۇردەلى مىندەتتەردى شەشۋگە جول اشادى», دەدى ۋنيۆەرسيتەت باسشىسى.
رەكتور ءوز سوزىندە ءبىلىم, عىلىم جانە ءوندىرىستى ۇشتاستىرۋ باعىتى جالعاساتىنىن, ال زەرتحانا ناتيجەلەرى ەلىمىزدىڭ تەحنولوگيالىق ەگەمەندىگىن نىعايتۋعا سەپتىگىن تيگىزەتىنىنە سەنىم ءبىلدىردى.
اقپاراتتىق تەحنولوگيالار جانە جاساندى ينتەللەكت فاكۋلتەتىنىڭ دەكانى تيمۋر يمانقۇلوۆتىڭ ايتۋىنشا, وتاندىق ماماندار وزىق جابدىقتارمەن جۇمىس ىستەۋگە تولىق دايىن. جاڭا زەرتحانا جوعارى كۋرس ستۋدەنتتەرىنە تاجىريبەلى تالىمگەرلەرمەن بىرلەسىپ, ناقتى وندىرىستىك جوبالارعا قاتىسا الاتىن اشىق پلاتفورما رەتىندە قىزمەت ەتەدى. بۇل بازا فاكۋلتەت تۇلەكتەرىنىڭ حالىقارالىق ەڭبەك نارىعىنداعى باسەكەگە قابىلەتتىلىگىن ايتارلىقتاي ارتتىرادى.
الماتى
