كونتسەرت باعدارلاماسى كورەرمەندى ءار ءداۋىردىڭ ەستەتيكالىق الەمىنە جەتەلەپ, قيمىل مەن ىرعاق ارقىلى تاريحتىڭ تىنىسىن سەزىندىرۋگە باعىتتالدى. ساحنادا پاۆانا, مەنۋەت, پولونەز, ۆالس, تانگو, لاتينو جانە قازاق ءۆالسى قاتار ءورىلىپ, ءاربىر بي ءوز ءداۋىرىنىڭ رۋحىن, مىنەزىن ءھام كوركەمدىك بولمىسىن ايقىندادى. ەۋروپالىق ساراي مادەنيەتىنەن باستاۋ العان كلاسسيكالىق ۇلگىلەر مەن حح عاسىردىڭ ىرعاقتى پلاستيكاسى ۇلتتىق حورەوگرافيانىڭ ءتول بوياۋىمەن استاسىپ, تۇتاس كوركەم جەلى ءتۇزدى.
جوبانىڭ باستى ەرەكشەلىگى – بي ونەرىنىڭ تاريحىن ساحنا ارقىلى بايانداپ قانا قويماي, ونى تانىمدىق كەڭىستىككە اينالدىرۋىندا. ءار كومپوزيتسيا تەك قيمىل ءتىلى ەمەس, مادەني جادىنىڭ كورىنىسى رەتىندە ۇسىنىلىپ, كورەرمەندى داۋىرلەر اراسىنداعى نازىك بايلانىستاردى سەزىنۋگە جەتەلەدى.
كەشتىڭ اۆتورلارى – «Gulder» ءانسامبلىنىڭ باس بالەتمەيستەرى, حالىقارالىق بايقاۋلاردىڭ لاۋرەاتى انۆارا سادىقوۆا مەن پەداگوگ-حورەوگراف دانا قۋانىشبەكوۆا. جوباعا انسامبل ارتىستەرى, ونەر مايتالماندارى, حالىقارالىق بايقاۋلار جەڭىمپازدارى, قازاق ۇلتتىق حورەوگرافيا اكادەمياسىنىڭ ستۋدەنتتەرى مەن «Samga» كۆارتەتى قاتىسىپ, ساحنالىق كەڭىستىكتى كوپقىرلى ونەر الاڭىنا اينالدىردى.
داۋىرلەر ءۇنى ديالوگ قۇرعان ايتۋلى بي كەشىندە ەرەكشە كوركەمدىك ەكپىن قازاق ۆالسىنە بەرىلدى. بۇل ءبولىم ۇلتتىق پلاستيكانىڭ نازىك ءليريزمىن ايقىنداپ, كورەرمەنگە قازاق بي ونەرىنىڭ زاماناۋي ساحناداعى جاڭعىرۋىن ايگىلەدى. كونتسەرت سوڭىندا ءداستۇر مەن جاڭاشىلدىقتىڭ توعىسى بي ءتىلى ارقىلى ۇيلەسىم تاۋىپ, ونەردىڭ ۋاقىتتان بيىك تابيعاتىن تاعى ءبىر مارتە دالەلدەدى.
