سۋرەت: Midjourney جاساندى ينتەللەكتىسى ارقىلى جاسالعان
قازىرگى زامانعى كوپتەگەن ءىرى ءارى تابىستى كومپانيالار, سونىڭ ىشىندە «Alphabet», «Apple», «Microsoft» جانە «Meta» جاساندى ينتەللەكتىنى دامىتۋعا وتە ۇلكەن كۇش جانە قارجى جۇمساپ جاتىر. ونداعى ماقسات – قىزمەت ساپاسىن جاقسارتۋ ءارى باسەكەدە وزىق بولۋ. ال ءبىزدىڭ ەلىمىزدەگى جاساندى زەردەنىڭ دامۋ قارقىنى وتە باياۋ. نەيروجەلىنىڭ شەكسىز مۇمكىندىكتەرى ايتىلعانىمەن, تاجىريبەگە دەندەپ ەنىپ كەتە قويعان جوق. اسىرەسە قازاق تىلىندەگى الگوريتم كەنجەلەپ تۇر. ازىرگە ChatGPT-ءدىڭ انا تىلىمىزدەگى ساۋاتى وتە تومەن. الايدا ونى دامىتۋعا دەگەن تالپىنىستار بارى قۋانتادى.
«Qazaq AI» پلاتفورماسىن IT-باعدارلاماشى تيمۋر بەكتۇر مەن كۆانتتىق فيزيكا جانە big datا-نى ساراپتاۋ مامانى التىنبەك مۇرات جاساندى ينتەللەكت تەحنولوگيالارىنا قازاق ءتىلىن ەنگىزۋگە جاردەمدەسۋ ماقساتىندا جاساپ شىعارعان.
«جاساندى ينتەللەكت (AI) تەحنولوگيالارىنىڭ جاھاندىق قارقىنى دەنساۋلىق ساقتاۋدان قارجىعا دەيىنگى, مەملەكەتتىك باسقارۋدان ءبىلىم سالاسىنا دەيىنگى كوپتەگەن سالادا تولقىندىق اسەرلەردى تۋدىردى. الايدا وسى تەحنولوگيا تاراپىنان از قامتىلعان تىلدەردە جاساندى ينتەللەكتىنىڭ جەتىلۋىنە قاتىستى ايتارلىقتاي الشاقتىق بار جانە ولاردىڭ ءبىرى – قازاق ءتىلى, ءبىزدىڭ انا ءتىلىمىز. بۇل ولقىلىقتى مويىنداي وتىرىپ, ونىڭ ورنىن تولتىرۋعا جانە قازاق تىلىنە بەيىمدەلگەن جاساندى ينتەللەكت تەحنولوگيالارىن ەنگىزۋگە ىقپال ەتۋ ءۇشىن «Qazaq AI» اتتى پلاتفورمانى قۇراستىردىق.
ونىڭ ايتۋىنشا, قازىرگى تاڭدا ماشينانى ۇيرەتۋدىڭ كوپتەگەن الگوريتمى مەن مودەلى اعىلشىن ءتىلى تۇرعىسىنان ازىرلەنگەندىكتەن, قازاق ءتىلىنىڭ بىرەگەي سينتاكسيستىك, سەمانتيكالىق جانە فونەتيكالىق سيپاتتامالارىنا ساي ەرەكشە ءتاسىلدى تالاپ ەتەدى. ال پلاتفورما وسى ماقساتتا جۇمىس ىستەيدى.
«Qazaq AI» پلاتفورماسى قازاق تىلىندەگى جاساندى ينتەللەكت جوبالارى بويىنشا كەڭەس بەرۋ, كونسۋلتاتسيالار ارقىلى قازاق تىلىندەگى جاساندى ينتەللەكت ەنگىزۋدىڭ ءتيىمدى جانە مادەني ەرەكشەلىكتەردى ەسكەرە وتىرىپ قامتاماسىز ەتۋ, ۇزدىك تاجىريبەلەر مەن ىقتيمال قيىنشىلىقتار تۋرالى اقپارات بەرۋ باعىتىندا جۇمىس ىستەيدى.
سونداي-اق «تۇراقتى ءوسۋ مەن ينتەگراتسيا ءۇشىن جي سالاسىندا ءبىلىم بەرۋدىڭ شۇعىل قاجەتتىلىگى بار. سوندىقتان ءبىز جي اينالاسىندا قازاقشا وقىتۋدى قولعا الامىز», دەيدى جوبا اۆتورلارى. سوعان بايلانىستى ولار وقۋ جوسپارلارىن قۇرۋ, جاساندى ينتەللەكتىنىڭ, ماشينانى ۇيرەتۋدىڭ قىر-سىرىن جانە ولاردىڭ قازاق تىلىمەن قالاي قيىساتىنىن ءتۇسىندىرۋ كۋرستارىن ازىرلەۋ, شەبەرلىك سىنىپتارى مەن سەمينارلاردى, جاڭادان باستاۋشىلار دا, ساراپشىلار دا ولاردىڭ پايداسىن كورە الاتىندىعىنا كەپىلدىك بەرەتىن ءارتۇرلى ءبىلىم دەڭگەيلەرىنە ارنالعان ءىس-شارالاردى ۇيىمداستىرۋ, زاماناۋي ۇرپاق تاربيەلەۋ, قازاق تىلىنە ءتان زەرتتەۋلەردى جەتىلدىرۋ, جاساندى ينتەللەكت سالاسىنداعى جاھاندىق ءبىلىم بازاسىن ودان ءارى بايىتۋ, قازاق تىلىنە بەيىمدەلگەن قۇرالدار جيىنتىعىن ازىرلەۋ نەمەسە ۇسىنۋ, جي سالاسىنداعى اقش-تىڭ جەتىلگەن تەحنيكالىق كومپانيالارىمەن, الەمدىك دەڭگەيدەگى ساراپشىلارمەن بايلانىس ورناتۋ سەكىلدى جۇمىستاردى جۇزەگە اسىرۋدى جوسپارلاپ وتىر.
«جاساندى ينتەللەكت تەحنولوگيالارىن قازاق تىلىنە ينتەگراتسيالاۋ تەك تەحنولوگيالىق پروگرەستى عانا بىلدىرمەيدى, بۇل, سونىمەن بىرگە, مادەنيەتتى ساقتاۋ, ءداستۇردى جەتىلدىرۋ مەن قازىرگى زامان اراسىنداعى كوپىر جانە جاھاندىق تسيفرلىق ەكوجۇيەدەگى ءتىلىمىزدىڭ ورنىن بەكىتۋ. بۇل كوشتەن ءبىز قالماۋىمىز كەرەك», دەيدى ت.بەكتۇر.
سونىمەن قاتار Qazaq AI پلاتفورماسى جاقىندا ءوزىنىڭ «JASANDY» جوباسىن جاساپ شىعاردى. JASANDY – ChatGPT مۇمكىندىكتەرىن قازاق تىلىندە پايدالانۋعا ارنالعان قوسىمشا. سول ارقىلى ChatGPT-ءدى قازاقشا تەگىن قولدانۋعا بولادى. بۇل – «Qazaq AI» پلاتفورماسىنىڭ جاساپ جاتقان كوپتەگەن جوباسىنىڭ ءبىرى. بۇعان قوسا پلاتفورمادا SozimAI – ءماتىندى سوزگە اينالدىراتىن جي دىبىس گەنەراتورى, AdemiAI – ءماتىندى سۋرەتكە اينالدىرۋ جي گەنەراتورى, BalamAi – بالالاردىڭ ءبىلىمى مەن دامۋىنا ارنالعان جي پلاتفورماسى, DamysAI –تەحنيكالىق دامۋ پلاتفورماسى, KorkemAI – ءماتىندى بەينەگە اينالدىرۋ گەنەراتورى, BilimAI – ءبىلىم مەن عىلىمعا ارنالعان جي قىزمەتى بار.
